ދަރަނި ނުދެއްކިދާނެ ކަމުގެ ހިރާސް އިންތިހާއަށް ބޮޑު ކަމަށް ބަލައި ބައިނަލްއަގުވާމީ ރޭޓިން އެޖެންސީތަކުން ރާއްޖޭގެ ކްރެޑިޓް ރޭޓިން ދަށްކުރުމާއި އިޒްރޭލްގެ ޕާސްޕޯޓު މަނާކުރަން އުޅުމާ ގުޅުމެއް އޮތް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ބައިނަލްއަގުވާމީ ރޭޓިން އެޖެންސީތައް ކަމަށްވާ ފިޗް ރޭޓިންސް އިން ރާއްޖޭގެ ކްރެޑިޓު ރޭޓިން "ސީސީ" އަށް ދަށްކުރީ އޮގަސްޓު 29، ގަ އެވެ. މޫޑީސް އިން ރާއްޖެ ކްރެޑިޓް ރޭޓިން ސީއޭއޭ-2 އަށް ދަށްކުރީ ސެޕްޓެމްބަރު 11، ގަ އެވެ. މި ދެ އެޖެންސީން ރާއްޖޭގެ ރޭޓިން ދަށްކުރި ސަބަބުތަކުގެ ތެރޭގައި އިޒްރޭލު ޕާސްޕޯޓު މަނާކުރުމެއް ނުހިމެނެ އެވެ.
ނަމަވެސް، އަންނަ އަހަރަށް ލަފާކޮށް މަޖިލީހަށް ހުށަހަޅާފައިވާ ބަޖެޓު ދިރާސާކުރާ ކޮމިޓީން ބުރާސްފަތި ދުވަހު ބޭއްވި ބައްދަލުވުމެއްގައި ވާހަކަ ދައްކަވަމުން ޒަމީރު ވިދާޅުވީ ކްރެޑިޓް ރޭޓިން ދަށް ކުރުމާއި ރާއްޖޭގެ އެތެރޭގެ ސިޔާސީ ނިންމުންތަކާ ގުޅުމެއްވާ ކަމަށެވެ.
"[ކްރެޑިޓް ރޭޓު ކުރުން] ރާއްޖޭގެ ޑޮމެސްޓިކް ޕޮލިޓިކްސް އާ ގުޅިފަ ހުންނަނީ. މިސާލަކަށް އިޒްރޭލު ޕާސްޕޯޓު ބޭން ކުރަން ވެގެން ވާހަކަ ދެއްކި ހިސާބުން ފެށިގެން އަޅުގަނޑުމެންނަށް ފެނުނު ބައެއް މީހުން ޓުވީޓު ކޮށްފަ އެބަހުރި. އަޅުގަނޑުމެންނަށް އެބަ އެނގޭ ކީއްކަން މި ވަނީ،" އޭނާ ވިދާޅުވި އެވެ.
ނަމަވެސް، އިޒްރޭލު ޕާސްޕޯޓު މަނާކުރަން ވަޒީރުންގެ މަޖިލީހުން ނިންމާ އެކަން އިއުލާނުކުރިއިރު ފޮރިން މިނިސްޓަރަކަށް ހުންނެވި ޒަމީރު މިކަމުގެ ތަފުސީލަކަށް ވަޑައިނުގަތެވެ. އެނގޭ ކަމަށް ބުނި ކަންކަމެއް ހާމައެއް ނުކުރައްވަ އެވެ.
"އެ ވަގުތު ޖަސްޓިފިކޭޝަނަކަށް ހުރީ އަޅުގަނޑުމެންގެ ރިޒާވުގެ މައްސަލަ. ކޮންމެހެން ރިޒާވަށް ހިޓުކޮށްގެން ކަމެއް ވެގެންނެއްވެސް ނޫން،" ޒަމީރު ވިދާޅުވި އެވެ.
މާލީ ވަޒީރު މިހެން ވިދާޅުވި ނަމަވެސް، ފިޗުން ރޭޓިން ދަށްކުރި ސަބަބުތަކުގެ ތެރޭގައި ރާއްޖޭގެ ރިޒާވުތައް އިންތިހާއަށް ދަށްވުމާއި ބޭރުގެ ދަަރަނި އަދާކުރަން ހުރި ހިރާސްތައް، ހާއްސަކޮށް މި އަހަރުގެ ފަހު ކުއާޓަރާއި ކުރިއަށް އޮތް ދެ އަހަރުން ދަައްކަން ހުރި ބޮޑެތި ދަރަނިތައް ފާހަގަކޮށްފައިވެ އެވެ.
ފިޗުން އިތުރަށް ފާހަގަކޮށްފައިވާ ގޮތުގައި ބޭރު ފައިސާގެ ދަތިކަން ކުރިއަށް އޮތް ދުވަސްތަކުގެ ތެރޭގައި ވެސް ދެމިއޮންނާނެ އެވެ. މީގެ މަައިގަނޑު ސަބަބެއްގެ ގޮތުގައި ޕަބްލިކް އިންވެސްޓްމަންޓް އިތުރުވުމާއި ރާއްޖޭން އިމްޕޯޓަށް ކުރާ ހަރަދުތައް ކުރިއަށް އޮތް ތަނުގައި ވެސް ކުރަމުން ގެންދަން ޖެހުން ހިމެނެ އެވެ.
މޫޑީސް އިން ރާއްޖޭގެ ރޭޓިން ދަށް ކުރި ސަބަބުތަކުގެ ތެރޭގައި ޑޮލަރުގެ ރިޒާވް ދަށްވުމާއި ދަރަނި އިތުރުވުމާއި ދަރަނި ނުދެއްކޭނެކަމުގެ ބިރު ބޮޑުވުން ހިމަނާފައިވެ އެވެ.
ރާއްޖޭގެ ބޭނުންކުރެވޭ ރިޒާވުގައި ހުރި ފައިސާގެ އަދަދު ވެސް މި އަހަރު ދަނީ މަހަކަށްވުރެ މަހެއް ދަށްވަމުންނެވެ. ރިޒާވުގެ އަދަދު އިތުރުވީ އޯގަސްޓު މަހުގެ ތެރޭގައި އެކަންޏެވެ.
އެންމެ ފަހުގެ ތަފާސްހިސާބުތައް ދައްކާ ގޮތުން، އޮކްޓޯބަރު މަހުގެ ނިޔަލަށް ބޭނުންކުރެވޭ ރިޒާވުގައި ހުރީ 31.5 މިލިއަން ޑޮލަރެވެ. މި އަދަދަކީ ރާއްޖޭގެ ޒަރޫރީ އިމްޕޯޓުތަކަށް މަހަކަށް ބޭނުންކުރެވޭ ވަރަށް ވުރެ މަދު މިންވަރެކެވެ.
އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން އިދިކޮޅު އެމްޑީޕީން ރައްޔިތުންގެ މަޖިލީހަށް މީގެ ފަސް މަސް ކުރިން ހުށަހެޅި ބިލުގެ ކޮމިޓީ މަސައްކަތް އަންނަ އަހަރުގެ ފެބްރުއަރީއާ ހަމައަށް ދިގުދަންމާލަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން މިހާރު ވަނީ ފާސްކޮށްފަ އެވެ.
މި ބިލު ލަސްވުމާ ގުޅިގެން ރައްޔިތުންނާއި ސިޔާސީންގެ އެތައް ބަޔަކު ދަނީ ސަރުކާރަށް ފާޑުކިޔަމުންނެވެ. ސަރުކާރުން ބުނަނީ ބިލުގެ މަސައްކަތް އަދިވެސް ލަސްނުވާ ކަމަށެވެ.
