އަންނަ ކޮންމެ ޓޫރިސްޓަކަށް ޑޮލަރު މާރުކުރަން މަޖުބޫރުކުރުމާ ގުޅިގެން ކުރިއަށް އޮތް ތަނުގައި މުސާރަ އާއި ސާވިސް ޗާޖު ދެވޭނީ ދިވެހި ރުފިޔާއިން ކަމަށް ޕަލްސް ކުންފުނިން އެ ކުންފުނީގެ މުވައްޒަފުންނަށް މިއަދު އަންގައިފި އެވެ.
ޕަލްސް ކުންފުނީގެ ހިއްސާދާރުންނަކީ ޔުނިވާސަލް ރިސޯޓްސް ބައެއް ހިއްސާދާރުންނާއި ރައީސް ޑރ. މުހައްމަދު މުއިއްޒުގެ ޓޫރިޒަމް އެޑްވައިޒަރު މުހައްމަދު ހަލީލެވެ. އެ ކުންފުނިން ހިންގާ ރިސޯޓުތަކުގެ ތެރޭގައި ކަނޑިންމަ އާއި އޯރާ ރިސޯޓާއި ނޯވާ ރިސޯޓު ހިމެނެ އެވެ.
ޕަލްސް ކުންފުނީގެ ޗެއާމަން ސަންޖޭ މަނިކު ސޮއިކޮށް އެ ކުންފުނީގެ މުވައްޒަފުންނަށް ފޮނުވި މެމޯއެއްގެ ކޮޕީ "އަދަދު" އަށް ލިބިފައިވާއިރު، އޭގައި މައިގަނޑު ގޮތެއްގައި އޮތީ އެމްއެމްއޭއިން މިހާރު އޮތް އުސޫލު ބަދަލުނުކޮށްފި ނަމަ ޑޮލަރު ތާށިވެ، މުސާރަ އާއި ސާވިސް ޗާޖު ޑޮލަރުން ނުދެވޭނެ ކަމަށެވެ.
"މާރުކުރަން ޖެހޭ ޑޮލަރުގެ އަދަދަކީ މުޅި ޖުމްލަ އާމްދަނީގެ 30 ޕަސެންޓާއި 60 ޕަސެންޓާ ދޭތެރޭގެ އަދަދެއް. ޑޮލަރުން ބަލާ ކަމުގައި ވަނީ ނަމަ މިއާ ގުޅިގެން ރިސޯޓުގެ އޮޕަރޭޝަނަށް ގޮންޖެހުންތަކާ ކުރިމަތިވާނެ،" އެ މެމޯގައި ވެ އެވެ.
ޑޮލަރު މާރުކުރަން ޖެހުމުގެ އިތުރުން، އެއާޕޯޓު ޓެކްސްތަކާއި ގްރީން ޓެކްސް ބޮޑުކުރުމުން އިތުރު ދަތިތަކާ ކުރިމަތިވާނެ ކަމަށް ޕަލްސް ކުންފުނިން މުވައްޒަފުންނާ ހިއްސާކޮށްފައި ވެ އެވެ.
އެ ގޮތުން ރާއްޖެއަށް ހަފުތާއަކަށް ޗުއްޓީ ހޭދަކުރަން އަންނަ ހަތަރު މީހުންގެ އާއިލާއެއްގެ މިސާލު ދެމުން މެމޯގައި ބުނީ، އިކޮނޮމީ ކްލާހުގައި ދަތުރުކުރާ ނަމަ 360 ޑޮލަރު އަދި ބިޒްނަން ކްލާހުން ނަމަ 700 ޑޮލަރު ދައްކަން ޖެހޭނެ ކަމަށެވެ.
މި ބަދަލާ ގުޅިގެން އެ ކުންފުންޏާ އެކީ މަސައްކަތް ކުރާ ބޭރުގެ ޓުއާ އޮޕަރޭޓަރުން ވެސް ނުރުހުންވެ، މިއަށް ވުރެ އަގު ހެޔޮ މަންޒިލުތައް އިހުތިޔާރުކޮށް ރާއްޖެއަށް ޑިމާންޑަށް އަސަރުކުރާނެ ކަމަށް ބުނެފައިވާ ކަމަށް ޕަލްސް ކުންފުނިން ފާހަގަކުރި އެވެ.
އެހެން ކަމުން، ޑިމާންޑު ހިފެހެއްޓުމުގެ ގޮތުން އަގު އިތުރު ވުމުގެ ބުރަ ނަގައި، ރޫމް ރޭޓުތަކަށް ބަދަލެއް ނާންނަ ގޮތަށް ބަދަލުތައް ގެންނަން މަޖުބޫރުވެފައިވާ ކަމަށް ވެސް ޕަލްސް ކުންފުނިން މުވައްޒަފުން ގާތު ބުނެފައި ވެ އެވެ.
ޑޮލަރު މާރުކުރަން މަޖުބޫރު ކުރުމާ ގުޅިގެން އެހެން ކުންފުންޏަކުން އަދި މިފަދަ ނިންމުމެއް ނިންމިކަން އެނގެން ނެތް ނަމަވެސް، އެހެން ކުންފުނިތަކުން އެމްއެމްއޭއަށް ފޮނުވި ސިޓީތަކުގައި ވެސް މި ބަދަލު ގެންނަން ޖެހިދާނެ ކަމަށް ފާހަގަކޮށްފައި ވެ އެވެ.
