އަންނަ އަހަރަށް ލަފާކުރާ ދައުލަތުގެ ބަޖެޓުގައި ގާނޫނުގައި ބުނާ މިންވަރަށްވުރެ މަދު އަދަދެއް ކައުންސިލްތަކުގެ ބަޖެޓުގައި ހިމަނާފައިވުމުން، އެ ބަޖެޓު ލާމަރުކަޒީ ގާނޫނާ ހިލާފު ކަމަށް މޯލްޑިވްސް ލޯކަލް ކައުންސިލްސް އެސޯސިއޭޝަން (އެމްއެލްސީއޭ) އިން ބުނެފި އެވެ.
އެ ޖަމިއްޔާއިން ނެރުނު ނޫސް ބަޔާނެއްގައި ބުނީ ލާމަރުކަޒީ ގާނޫނުގައި ކައުންސިލްތަކަށް ލިބެންވާ ވަސީލަތްތައް ސާފުކޮށް ބަޔާން ކޮށްފައިވާހިނދު، ސަރުކާރުން އޮކްޓޯބަރު 30، ގައި މަޖިލީހަށް ހުށަހެޅި ބަޖެޓު ވެގެންދިޔައީ ލާމަރުކަޒީ ގާނޫނުގެ 79 މާއްދާގައި ބަޔާން ކޮށްފައިވާ ގޮތާ ހިލާފަށް ކަމަށެވެ.
"2025 ގެ 56.6 ބިލިއަން ރުފިޔާގެ ބަޖެޓުގައި ދައުލަތުގެ އާމްދަނީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ކަޑައަޅާފައިވާއިރު، ކައުންސިލްތަކަށް ކަޑައަޅާފައިވަނީ 1.4 ބިލިއަން ރުފިޔާ. މިއީ ލާމަރުކަޒީ ގާނޫނުގައި ބުނާ މިންވަރަށްވުރެ މަދު އަދަދަކަށް ވުމުން ބަޖެޓަކީ ލާމަރުކަޒީ ޤާނޫނާ ހިލާފު ބަޖެޓެއްކަން ކައުންސިލްތަކުގެ ޖަމިއްޔާއިން ފާހަގަ ކުރަން،" އެ ޖަމިއްޔާއިން ބުންޏެވެ.
ކައުންސިލްތަކުން ބްލޮކް ގްރާންޓާ ގުޅިގެން ކަންބޮޑުވުން ފާޅުކުރުމުން ފިނޭންސް މިނިސްޓަރު މޫސާ ޒަމީރު 2024 ގެ ސަޕްލިމެންޓަރީ ބަޖެޓުން 699 މިލިއަން ރުފިޔާ 2025 ގެ ކައުންސިލްތަކުގެ ގްރާންޓަށް އިތުރު ކުރުމަށް ނިންމި ނަމަވެސް، 2025 ގެ ބަޖެޓުން ދޭންޖެހޭ ބްލޮކް ގްރާންޓް ސަޕްލިމެންޓްރީ ބަޖެޓުން ގާނޫނު ބުނާ ގޮތުން ދެވޭނެ ކަމަށް ގަބޫލު ނުކުރެވޭ ކަމަށް ވެސް އެ ޖަމިއްޔާއިން ފާހަގަކުރި އެވެ.
އޭގެއިތުރުން އެ ޖަމިއްޔާއިން ފާހަގަކުރި ގޮތުގައި 2024 ގެ ސަޕްލިމެންޓްރީ ބަޖެޓު ސަރުކާރުން މަޖިލީހަށް ހުށަހެޅިއިރު، ސަޕްލިމެންޓްރީ ބަޖެޓުގައި ލާފަކުރާ އާމްދަނީގެ ފަސް ޕަސަންޓް ކައުންސިލްތަކަށް ދޭން ކަނޑައަޅާފައި ނުވެ އެވެ.
ކައުންސިލްތަކުގެ ޖަމިއްޔާއިން ބުނީ މުޖުތަމައުތައް ބާރުވެރިކޮށް، ތަރައްގީގެ ކަންކަމުގައި މުޖުތަމައުތަށް ބޭނުންވާ ގޮތަށް ކަންކަން މިސްރާބު ކުރަން ލިބުނު ފުރުސަތަކީ ލާމަރުކަޒީ ގާނޫނަށް ގެނެވުނު އަށް ވަނަ އިސްލާހުން ކައުންސިލްތަކަށް ދައުލަތުގެ ބަޖެޓުގެ އާމްދަނީގެ ގޮތުގައި ލަފާ ކުރާ އަދަދުގެ މަދުވެގެން ފަސް ޕަސަންޓު އަދި ކައުންސިލްގެ އިހްތިސާސް ތެރޭގައި ނުހިމެނޭ ބިމާއި، ފަޅާއި، ފަރުގެ 40 ޕަސަންޓު ކުލި ކައުންސިލްތަކަށް ބްލޮކް ގްރާންޓްގެ ގޮތުގައި ލިބިގެންދިއުން ކަމަށެވެ.
"ދައުލަތުން ބަޖެޓް ހަދާއިރު އެ ބަޖެޓުން ކައުންސިލްތަކަށް ދޫކުރަން ނިންމާ ފައިސާގެ މިންވަރު ކަނޑައަޅަނީ ކޮން ގޮތަކަށް، ކޮން އުސޫލަކުން އަދި ކިހައިވެރެއްކަން ސާފުކޮށް ބުނެދިނުމަކީ ދައުލަތުން ކުރަންޖެހޭނެ ކަމެއް. 2025 ގެ ދައުލަތުން ބަޖެޓް ރައްޔިތުންގެ މަޖިލީހަށް ބަޖެޓު ހުށަހަޅައި، އެ މަޖިލީހުގެ ބަހުސް މަރުހަލާގައި ބަޖެޓަށް ބަހުސް ކުރާނެ މެންބަރަކު ނެތިގެން ބަޖެޓް ޖަލްސާ ނިންމާލަން ޖެހުނުކަމީ ވެސް ކަންބޮޑުވާ ކަމެއް،" އެ ޖަމިއްޔާއިން ބުންޏެވެ.
ކައުންސިލްތަކުގެ ޖަމިއްޔާއިން ބުނީ ކައުންސިލްތަކުގެ ހިންގުން ހަރުދަނާވެ، މާލީގޮތުން ބާރުވެރި ވުމަކީ މުޖުތުމަޢުތަކުގެ ވިލުންތެރިކަމާ، ރައްޔިތުންނަށް ދިރިއުޅުމުގެ ފެންވަރު މަތިވުމަށް ލިބޭ ބާރަކަށް ވެގެންދާނެ ކަމަށެވެ.
ކަން މިހެން ހުރި ހިނދު، މުޖުތަމަޢުތަކުގެ ތަރައްޤީގެ މިސްރާބު ބައްޓަން ކުރަން މުޖުތަމަޢުތަކަށް ލިބިފައިވާ ހަނި ފުރުސަތަށް ހިޔަނި ނޭޅޭނެހެން ސަރުކާރާއި، ރައްޔިތުންގެ މަޖިލީހުގެ ކަންކަން ތަރުތީބު ކުރުމަށް ކައުންސިލްތަކުގެ ޖަމިއްޔާއިން ވަނީ ގޮވާލާފަ އެވެ.
އަދި، ކައުންސިލްތަކަށް ގާނޫނުގެ ދަށުން ލިބެންވާ ވަސީލަތްތައް އުނިކަމެއް ނުގެނެސް ފޯރުކޮށްދިނުމަށް ވެސް އެ ޖަމިއްޔާއިން ގޮވާލި އެވެ.
