މިދިޔަ މަހު ބޭއްވި 11 ވަނަ ނޫސްވެރިކަމުގެ އިނާމުގައި އަދަދު ނޫހުން ތައްޔާރުކުރި "ސްކީލާން" ޑޮކިއުމެންޓަރީއަށް ލިބުނު އެވޯޑާ ގުޅިގެން ރައްޔިތުންގެ މަޖިލީހުން ބަލަމުންދާ މައްސަލާގައި ސުވާލުކުރުމަށް އެ އިނާމަށް އިންސާފުކުރި ޖަޖުންވެސް ހާޒިރުކުރަން ނިންމައިފި އެވެ.
މި މައްސަލަ ބަލަމުންދަނީ މަޖިލީހުގެ މިނިވަން މުއައްސަސާތަކުގެ ކޮމިޓީންނެވެ. މި ދެ ދުވަހު އެވޯޑު އިންތިޒާމުކުރި މޯލްޑިވްސް މީޑިއާ ކައުންސިލް (އެމްއެމްސީ) ހާޒިރުކޮށް އެ ކޮމިޓީން ވަނީ ސިއްރުކޮށްގެން ބައްދަލުވުންތަކެއް ކުރިއަށް ގެންގޮސްފަ އެވެ.
މައްސަލައާ ގުޅިގެން އިނާމަށް އިންސާފުކުރި ފަނޑިޔާރުންގެ ޕެނަލް ހާޒިރުކުރަން ކޮމިޓީން ނިންމީ މިއަދުގެ ބައްދަލުވުމުގަ އެވެ. މައުލޫމާތު ލިބިފައިވާ ގޮތުގައި ފަނޑިޔާރުން ކޮމިޓީއަށް ހާޒިރުކުރާނީ އަންނަ ހަފުތާ އެވެ.
ސިއްރުކޮށްގެން ކުރިއަށްގެންދިޔަ ބައްދަލުވުމެއް ކަމުން، ފަނޑިޔާރުން ހާޒިރުކުރަން ހުށަހެޅީ އަދި ތާއީދުކުރީ ކޮން މެންބަރެއް ކަމާއި ފާސްވީ ކިތައް ވޯޓުން ކަމެއް ޔަގީނެއް ނޫނެވެ.
މިއަދު ބޭއްވި މިނިވަން މުއައްސަސާތަކުގެ ކޮމިޓީގެ މި އަހަރުގެ 22 ވަނަ ބައްދަލުވުމުގެ އެޖެންޑާގައި ފުރަތަމަ އޮތީ އެމްއެމްސީއާ ބައްދަލުކުރުމެވެ. ދެން އޮތީ ކޮމިޓީގައި އޮތް ބިލުތަކާ މެދު މަޝްވަރާ ކުރުމެވެ. "އަދަދު" ނޫހަށް ޔަގީން ކުރެވިފައި ގޮތުގައި މިއަދު ވެސް އެމްއެމްސީ ހާޒިރުކުރީ އިއްޔެ ވެސް ހާޒިރުކުރި މައްސަލާގަ އެވެ.
އެ ބައްދަލުވުން ސިއްރުކުރަން ހުށަހެޅި ކޮމިޓީގެ ނައިބު މުގައްރިރު, ކެލާ ދާއިރާގެ މެންބަރު އަބްދުالله ޝަރީފު އެވެ. އޭނާގެ ހުށަހެޅުމަށް ތާއީދުކުރީ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިން އެވެ.
ސްކީލާން ޑޮކިއުމެންޓަރީއަށް އެވޯޑު ލިބުމުން ކަން ހިނގި ގޮތް
- ސްކީލާން ޑޮކިއުމެންޓަރީ އަށް އެވޯޑު ލިބުމުން ސަރުކާރުގެ ބައެއް ވެރިންނާއި ސަޕޯޓަރުންގެ ފާޑުކިޔުން
- މީޑިއާ ކައުންސިލްގެ ރައީސްގެ މަގާމުގައި ހުންނެވި، ޕީއެސްއެމްގެ ނިއުސް އޮޕަރޭޝަން މެނޭޖަރު އަހުމަދު މުސްތަފާ އޮކްޓޯބަރު 31, 2024 ގައި ޕީއެސްއެމްއިން ވަކިކުރުން. އޭނާގެ މައްޗަށް ތުހުމަތު ކުރީ، ޕީއެސްއެމްގެ އެޑިޓޯރިއަލް ކޮންޓެންޓާ ހިލާފު ވީޑިއޯއެއް ދެއްކި މައްސަލަ. އެ ބުނާ ކޮންޓެންޓަކީ ސްކީލާން ޑޮކިއުމެންޓްރީގެ ވީޑިއޯ ކްލިޕެއް.
- މީޑިއާ ކައުންސިލުން އެ ވީޑިއޯ ދައްކާފައިވަނީ ރާވާއިގެން ގަސްދުގައި ކަމަށް ބުނެ، އެ ކައުންސިލްގެ މައްސަލަ ޕީއެސްއެމްއިން ރައްޔިތުންގެ މަޖިލީހަށް ހުށަހެޅި.
- ފާޑުކިޔުން އަމާޒުވުމުން ޕީއެސްއެމްގެ ބޯޑުގެ ނިންމުން ބަދަލުކޮށް، މުސްތަފާގެ ވަޒީފާ، ނޮވެމްބަރު 1, 2024 ގައި އިޔާދަކުރި
- ވަޒީފާ އިޔާދަކުރި ފަހުން މުސްތަފާ ސްކީލާން ޑޮކިއުމެންޓަރީއާ ދެކޮޅަށް ބަޔާނެއް ނޮވެމްބަރު 1, 2024 ގައި ނެރުނު.
- އެމްއެމްސީގެ ހަ ފަނޑިޔާރުން ވެސް ނޮވެމްބަރު 1, 2024 ގައި ނެރުނު.
- މީޑިއާ ކައުންސިލްގެ ކުއްލި ބައްދަލުވުމެއް ނޮވެމްބަރު 2, 2024 ގައި ބޭއްވި. އެ ބައްދަލުވުމުން ނިންމީ އެވޯޑާ ގުޅޭ ތުހުމަތުތައް ބަލަން. އަދި ސްކީލާން އަށް ލިބުނު އެވޯޑު އަތުލުމާމެދު ގޮތެއް ނިންމަން.
- ނޫސްވެރިކަމުގެ އެވޯޑު މައްސަލައެއް ތަހުގީގު ކުރަން އޭސީސީން މީޑީއާ ކައުންސިލަށް ވަން. ގެންދިޔައީ މާކްސް ޝީޓުތައް
- ދޮންމަންމާފުޅު ކުރެއްވި ތަރިކައާ ގުޅޭ ތުހުމަތުތަކަށް ރައީސް ޑރ. މުހައްމަދު މުއިއްޒު ފުރަތަމަ ފަހަރަށް ޖަވާބުދާރީވެވަޑައިގެންނެވީ ނޮވެމްބަރު 6, 2024 ގައި.
"ސްކީލާން" އަށް ލިބުމާ ގުޅިގެން ހިނގައި ދިޔަ ކަންކަމަކީ "ބާރުވެރި ބައެއްގެ ނުފޫޒުތަކެއްގެ ސަބަބުން ކުރިމަތިވާ ކަންކަންކަމުގައި ބެލުމުގެ ޖާގަ އޮތް ކަމަށް" މޯލްޑިވްސް ޖާނަލިސްޓު އެސޯސީއޭޝަން (އެމްޖޭއޭ) އިންވެސް ވަނީ ބުނެފަ އެވެ.
