މިދިޔަ މަހު ބޭއްވި 11 ވަނަ ނޫސްވެރިކަމުގެ އިނާމުގައި އަދަދު ނޫހުން ތައްޔާރުކުރި "ސްކީލާން" ޑޮކިއުމެންޓަރީއަށް ލިބުނު އެވޯޑާ ގުޅިގެން ދެވަނަ ފަހަރަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް މޯލްޑިވްސް މީޑިއާ ކައުންސިލް (އެމްއެމްސީ) ހާޒިރުކުރި ބައްދަލުވުން ވެސް ސިއްރުކޮށްފި އެވެ.
މިއަދު ބޭއްވި މިނިވަން މުއައްސަސާތަކުގެ ކޮމިޓީގެ މި އަހަރުގެ 22 ވަނަ ބައްދަލުވުމުގެ އެޖެންޑާގައި ފުރަތަމަ އޮތީ އެމްއެމްސީއާ ބައްދަލުކުރުމެވެ. ދެން އޮތީ ކޮމިޓީގައި އޮތް ބިލުތަކާ މެދު މަޝްވަރާ ކުރުމެވެ. "އަދަދު" ނޫހަށް ޔަގީން ކުރެވިފައި ގޮތުގައި މިއަދު ވެސް އެމްއެމްސީ ހާޒިރުކުރީ އިއްޔެ ވެސް ހާޒިރުކުރި މައްސަލާގަ އެވެ.
އެ ބައްދަލުވުން ސިއްރުކުރަން ހުށަހެޅި ކޮމިޓީގެ ނައިބު މުގައްރިރު, ކެލާ ދާއިރާގެ މެންބަރު އަބްދުالله ޝަރީފު އެވެ. އޭނާގެ ހުށަހެޅުމަށް ތާއީދުކުރީ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިން އެވެ.
ބައްދަލުވުން ސިއްރު ކުރުމަށް ސަރުކާރަށް ތާއިދުކުރާ ހުރިހާ މެންބަރުން ވޯޓު ދެއްވިއިރު އެކަމާ ދެކޮޅަށް ވޯޓު ދެއްވީ ކޮމިޓީގައި އިދިކޮޅު އެމްޑީޕީ ތަމްސީލު ކުރައްވާ ހަމައެކަނި މެންބަރު, ގަލޮޅު ދެކުނު ދާއިރާގެ މީކާއިލް އަހްމަދު ނަސީމް އެވެ.
އިއްޔެ ވެސް އެ ކޮމިޓީއަށް އެމްއެމްސީ ހާޒިރު ކުރި އެވެ. އެޖެންޑާގައި ހުރި މަސްލަހަތު ފުށޫއަރާ ކަންކަން ކަމަށް ބުނެ އެ ބައްދަލުވުންވެސް ވެރިކަން ކުރާ ޕީއެންސީން ވަނީ ސިއްރުކޮށްފަ އެވެ.
