ދިވެހި ޕްރޮޑަކްޝަން ހައުސް، ކަޒްމިކް އިންޓަނޭޝަނަލުން އުފެއްދި "ދޭދަރު ރުއިން" ފިލްމު ޕްރިމިއާ ކުރުމަށް މިމަހުގެ 20 ވަނަ ދުވަހަށް އޮލިމްޕަސް ބުކް ކުށްފައި އޮއްވައި، ސަރުކާރަށް އެއް އަހަރު ފުރުން ފާހަގަ ކުރުމަށް ކަމަށް ބުނެ އެ ބުކިން ކެންސަލް ކުރަން ނިންމި ނިންމުން ބަދަލުކޮށް، އެރޭ ފިލްމު އެޅުވުމުގެ ހުއްދަ ދޭން ނިންމައިފި އެވެ.
ސޯޝަލް މީޑިއާގައި ކަޒްމިކް އިންޓަނޭޝަނަލުން ކުރި ޕޯސްޓެއްގައި ބުނީ "ދޭދަރު ރުއިން" ގެ ޕްރިމިއާ ޝޯ ބާއްވަން ބުކް ކޮށްފައި އޮތް ތާރީހުގައި އެ ފިލްމު އެޅުވޭނެ ކަމުގެ ޔަގީންކަން ނޭޝަނަލް ސެންޓާ ފޯ ދި އާޓްސް (އެންސީއޭ) އިން ދީފައިވާ ކަމަށެވެ.
"ދޭދަރު ރުއިން ފިލްމު ޕްރިމިއާ ކުރަން އޮތް ތާރީހުގެ ބުކިން ކެންސަލް ކުރަން ނިންމި ނިންމުން ބަދަލު ކޮށްފައިވާކަން އަޅުގަނޑުމެންނަށް ވަނީ އެންސީއޭއިން އަންގާފައި، އަޅުގަނޑުމެންގެ ހައްގު ނިގުޅައިނުގަނެ، މާބޮޑު ގެއްލުމެއް ނުލިބި މި މައްސަލަ ހައްލު ކުރެވުނީތީ އެކަމާ އުފާކުރަން،" ކަޒްމިކުން ނެރުނު ބަޔާނުގައި ބުންޏެވެ.
އެ ޕްރޮޑަކްޝަން ހައުސްއިން ބުނީ އެ މައްސަލަ ހައްލު ކުރެވުމަކީ އެންސީއޭ އާއި ދިވެހި ފަންނާނުންނާ ދެމެދު އޮންނަ އިތުބާރު އާލާކުރުމަށް ކުރިއަށް އެޅުނު ފިޔަވަޅެއް ކަމަށެވެ.
ކަޒްމިކް އިންޓަނޭޝަނަލްގެ ބުކިން ކެންސަލް ކުރަން އެންސީއޭއިން ނިންމީ އެ ޕްރޮޑަކްޝަން ހައުސްއިން ތައްޔާރުކުރި "ދޭދަރު ރުއިން" ފިލްމު މިމަހުގެ 20 ވަނަ ދުވަހު ޕްރިމިއާ ކުރަން ނިންމައި މީގެ އަހަރެއްހައި ދުވަސް ކުރިން އޮލިމްޕަސް ބުކްކޮށް މީގެ ހަތަރު ވަރަކަށް މަސް ކުރިން ބުކިންއަށްވާ ފައިސާ ވެސް ދައްކައިފައި އޮއްވަ އެވެ.
ކަޒްމިކްގެ ބުކިން ކެންސަލް ކުރަން އެންސީއޭއިން ނިންމީ ސަރުކާރަށް އަހަރެއްވުން ފާހަގަ ކުރުމަށް މިމަހުގެ 17، 18، 19 ގައި ބާއްވާ ސިލްސިލާ ޝޯތައް، އެއް ދުވަސް ފަހުން ފަށައި 20 ނޮވެމްބަރުގައި ނިންމާ ގޮތަށް ތާވަލަށް ބަދަލު ގެނައުމުންނެވެ.
ދޭދަރު ރުއިން ފިލްމަކީ ކަޒްމިކް އިންޓަނޭޝަނަލް އާއި އައިފިލްމްސް ގުޅިގެން އުފައްދާ ފުރަތަމަ ފިލްމެވެ. މި ފިލްމަކީ ކަޒްމިކްގެ ދެވަނަ ފިލްމެވެ. މި ފިލްމުން މަޝްހޫރު ފިލްމީ ތަރި، ޝަރަފް އަބްދުﷲ އާއި މައިހާ އާދަމް އައި ހާޒިފް މުހައްމަދު ފެނިގެންދާއިރު، މުޅިން އަލަށް ދާއިރާއަށް ތައާރަފުވާ މޫސާ ރަޝީދުގެ އިތުރުން ނޭޕާލަށް ނިސްބަތްވާ އެކްޓްރެސް، ސުޝްމާ ސުބެޑީ ވެސް ފެނިގެންދާނެ އެވެ.
އައްޒާމްގެ ފުރަތަމަ ޑައިރެކްޝަންގެ ދަށުން ތައްޔާރު ކޮށްފައިވާ "ދޭދަރު ރުއިން" އަކީ އިންސާނީ ވަގުފާރި އާއި ގޭންގު ވައޮލެންސް ފެނިގެންދާނެ ފިލްމެކެވެ.
