ސަރުކާރުގެ މައި ވިޔަފާރި ކުންފުނި އެސްޓީއޯގެ ސަބްސިޑަރީ ކުންފުންޏަކަށް ފެނަކަ ހެދުމާ މެދު ދެވަނަ ވިސްނުމަކަށް ގޮސް، ކަރަންޓު ކުންފުނި ސްޓެލްކޯގެ ދަށަށް ބަދަލުކުރެވޭނެ ގޮތްތަށް ބަލަމުންދާ ކަމަށް ފިނޭންސް މިނިސްޓްރީން ހާމަކޮށްފި އެވެ.
އެސްޓީއޯގެ ދަށަށް ފެނަކަ ބަދަލުކުރުމުގެ މަސައްކަތް ކުރަމުންދާ ކަމަށް ސަރުކާރުން ފުރަތަމަ ހާމަކުރީ މިދިޔަ އޮގަސްޓު މަހުގެ ފަހުކޮޅެވެ.
އޭރު ރައީސް އޮފީހުން ބުނީ، މި އަހަރު ނިމުމުގެ ކުރިން ދެ ކުންފުނި އެއްކޮށްލަން ކެބެނިޓުގެ މަޝްވަރާއާ އެކީ ރައީސް ނިންމަވާފައިވާ ކަމަށެވެ. އަދި މީގެ ސަބަބުން ފެނަކައިގެ ހިންގުން ރަނގަޅުވެ، ރައްޔިތުންނަށް ފޯރުކޮށްދޭ ހިދުމަތް ރަނގަޅު ފެންވަރުގައި ފޯރުކޮށްދެވޭނެ ކަމަށް ވެސް ސަރުކާރުން ބުނެފައި ވެ އެވެ.
އެސްޓީއޯ އާއި ފެނަކަ އެއްކޮށްލަން ނިންމި އިރު، ފެނަކައިން އެންމެ ބޮޑު އަދަދެއް ދަރާފައި ވަނީ އެސްޓީއޯއަށެވެ. އެއީ ފެނަކައިން ކަރަންޓު އުފައްދަން އެސްޓީއޯއިން ކްރެޑިޓުގައި ދޫކުރި ތެލަށް ދައްކަން ޖެހޭ ފައިސާ އެވެ. ފެނަކައިގެ މެނޭޖުމަންޓާ ހަވާލާދީ ނޫސްތަކުގައިވާ ގޮތުގައި މި އަދަދު ދެ ބިލިއަން ރުފިޔާއާ ގާތްކުރެ އެވެ.
މިހެން ނަމަވެސް އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި ފިނޭންސް މިނިސްޓްރީން ބުނެފައި ވަނީ، ފެނަކައިގެ ހާލަތު ރަނގަޅު ކުރެވޭނެ ގޮތްތައް ދިރާސާކޮށް، ކުރިއަށް އޮތް އަހަރުގެ ތެރޭގައި ދާއިމީ ހައްލެއް ގެންނާނެ ކަމަށެވެ. އޭގެ މިސާލެއްގެ ގޮތުގައި ދީފައި އޮތީ، ސިނާޖީ ހާސިލުކުރެވޭނެ ގޮތަކަށް ސްޓެލްކޯއާ އެއްކޮށްލުމެވެ.
އެސްޓީއޯގެ ދަށަށް ފެނަކަ ބަދަލުކުރުމުގެ ވިސްނުން ދޫކޮށްލިއިރު، ރައީސްގެ ނިންމެވުމާ ގުޅިގެން އެސްޓީއޯއިން ނެރުނު ނޫސް ބަޔާނެއްގައި އެ ކުންފުނީގެ ސަބްސިޑަރީއަކަށް ފެނަކަ ބަދަލުކުރުމަށް މަސައްކަތްތަކެއް ކުރެވެމުންދާ ކަމަށް ބުންޏެވެ. އަދި އެކަމަށް ޓަކައި ޕްލޭނެއް އެކުލަވާލަމުން އަންނަ ކަމަށް ވެސް އެ ކުންފުނިން ބުނެފައިވެ އެވެ.
ރާއްޖޭގެ މީހުން ދިރިއުޅޭ ގިނަ ރަށްރަށުގައި ކަރަންޓާއި ފެނުގެ ހިދުމަތް ފޯރުކޮށްދެނީ ފެނަކައިންނެވެ. އެކަމަކު ސައްތައިން ސައްތަ ސަރުކާރު ހިއްސާވާ ކުންފުނިތަކުގެ ތެރެއިން އެންމެ މައްސަލަ ބޮޑު ކުންފުންޏަކީ ވެސް ފެނަކަ އެވެ. އެ ކުންފުނީގެ މެނޭޖުމަންޓުތަކުން ކޮރަޕްޝަންގެ އަމަލުތައް ހިންގާފައިވާ ކަމަށް ތުހުމަތުކުރެވޭއިރު، މީގެ ސަބަބުން އެ ކުންފުނިން ފޯރުކޮށްދޭ ހިދުމަތަށް ވެސް ބުރޫއަރާފައި ވެ އެވެ.
ސަރުކާރުން މިހާރު ވިސްނާ ގޮތަށް އެއް ވައްތަރުގެ މަސައްކަތް ކުރާ ކުންފުނިތައް އެއްކޮށްލުމަކީ ވޯލްޑް ބޭންކުން ލަފާދޭ ކަމެކެވެ.
