ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް މޯލްޑިވްސް މީޑިއާ ކައުންސިލް (އެމްއެމްސީ) ހާޒިރުކުރި ބައްދަލުވުން ސިއްރުކުރަން އެ ކޮމިޓީން ނިންމައިފި އެވެ.
މިއަދު ބޭއްވި ބައްދަލުވުމުގެ އެޖެންޑާގައި އޮތީ އެމްއެމްސީ ހާޒިރުކޮށް ސުވާލުކުރުމާއި ކޮމިޓީގައި ހުރި އެހެން މަަސައްކަތްތަކެވެ.
ބައްދަލުވުން ފެށުމާއެކު، މިއަދުގެ އެޖެންޑާގައި ހުރި ކަންތައްތަކަކީ މަސްލަހަތު ފުށޫއަރާ ކަންކަން ކަމަށް ބުނެ ސިއްރުކުރަން ހުށަހެޅީ ކޮލަމާފުށި ދާއިރާގެ މެންބަރު އިބްރާހިމް ދީދީ އެވެ. އެ ހުށަހެޅުމަށް ތާއީދުކުރެއްވީ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިން އެވެ.
މި ހުށަހެޅުން ފާސްވީ ވޯޓުގައި ބައިވެރިވި މެންބަރުންގެ ތެރެއިން ހަ މެންބަރުންގެ ވޯޓުންނެވެ. ސިއްރުކުރުމާ ދެކޮޅަށް ވޯޓު ދެއްވީ އެމްޑީޕީގެ މެންބަރު މީކާއިލް ނަސީމް އެވެ.
މީޑިއާ ކައުންސިލާއި ބްރޯޑްކޮމް މަޖިލީހަށް ހާޒިކުރަން ނިންމީ މިވަނީ ރައީސް ޑރ. މުހައްމަދު މުއިއްޒުގެ "އަގުވައްޓާލަން ދޮގު ހަބަރު ފަތުރާ" ނޫސްތަކާ މެދު މީޑިއާ ކައުންސިލުން ފިޔަވަޅު ނާޅާ ކަމަށް ބުނެ ރައީސް އޮފީހުން ރައްޔިތުންގެ މަޖިލީހަށް ސިޓީއެއް ފޮނުވާފައި ވަނިކޮށެވެ. އަދި، އެ ކައުންސިލުން ބާއްވާ ނޫސްވެރިކަމުގެ ގައުމީ އިނާމުގެ ހަފުލާ ބޭއްވިތާ 24 ގަޑިއިރު ނުވަނީހެވެ.
އެކި މީޑިއާތަކުން ދޮގު ހަބަރު ފަތުރާ ކަމަށް ބުނެ ރައީސް އޮފީހުން މި އަހަރު ތެރޭ މީޑިއާ ކައުންސިލަށް 75 މައްސަލައެއް ހުށަހެޅި ކަމަށް އޯގަސްޓު 20، ގައި އެ ކައުންސިލުން ބުންޏެވެ.
މީގެއިތުރުން، މީޑިއާ ކައުންސިލާއި ބްރޯޑްކޮމް އެއްކޮށްލާ ނޫސްވެރިންނާއި ނޫސްތައް ޖޫރިމަނާކޮށް މީޑިއާތައް ބަންދުކުރެވޭ ގޮތަށް މަޖިލީހަށް މިހާރު ވަނީ ބިލެއް ހުށަހަޅާފަ އެވެ. މި ބިލުގެ ފުރަތަމަ ކިޔުން މިއަދު އިއްވާނެ އެވެ.
