ސަރުކާރުގެ ކޮންޓްރޯލް އޮންނަ ގޮތަށް މީޑިއާ ކޮމިޝަނެއް އުފައްދައި، ނޫސްތަކާއި ޓީވީ ޗެނަލްތައް އަދި ވަކިވަކި ނޫސްވެރިން ޖޫރިމަނާ ކުރެވޭ ގޮތަށް ރައްޔިތުންގެ މަޖިލީހަށް ބިލުގައި ރައީސް އޮފީހުގެ މައްސަލަ ފުނި ވެސް ބެލުމުގެ ބާރު ދިނުން ހިމަނައިފި އެވެ.
އެ ބިލުގައިވާ ގޮތުން ގާނޫނަށް އަމަލު ކުރަން ފެށުމުން، މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އުވާލައި، އެ ދެ ކޮމިޝަނުން ބަލަމުން އައި މައްސަލައެއް ނުނިމިވާނަމަ އެ މައްސަލައެއް ބަލާނީ އަލަށް އުފައްދާ މީޑިއާ އެންޑް ބްރޯޑްކާސްޓިން ކޮމިޝަނުންނެވެ.
އަދި މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން ބައިވެރިވާ އެއްވެސް މައްސަލައެއް ނުވަތަ މުއާމަލާތެއް ނުނިމިވާނަމަ، އެ މައްސަލައެއް ނުވަތަ މުއާމަލާތެއްގެ ބައިވެރިޔަކަށް ވާނީ ވެސް އަލަށް އުފައްދާ ކޮމިޝަން ކަމަށް ބިލުގައި ވަނީ ބުނެފަ އެވެ.
މޯލްޑިވްސް މީޑިއާ ކައުންސިލުން މިދިޔަ ޖުލައި ގައި ބުނީ އެ ކައުންސިލަށް 94 ޕަސަންޓް ޝަކުވާ ހުށަހަޅާފައި ވަނީ ދައުލަތުގެ އެކި އިދާރާތަކުން ކަމަށެވެ. އެގޮތުން ދޮގު ހަބަރު ފަތުރާ ކަމަށް ބުނެ ރައީސް އޮފީހުން 75 މައްސަލައެއް މީޑިއާ ކައުންސިލަށް ހުށަހަޅާފައިވެ އެވެ.
އެ 75 މައްސަލައާ ގުޅިގެން އެމްއެމްސީން ވަނީ ރައީސް އޮފީހުގެ ޓީމަކާ ބައްދަލުވެސް ކޮށްފަ އެވެ. އެ ކައުންސިލްގެ ޝަކުވާ ބަލާ ކޮމިޓީން ބައްދަލުކުރި ރައީސް އޮފީހުގެ ޓީމު ލީޑުކުރެއްވީ ޕޮލިސީ އޮފީހުގެ އަންޑާ ސެކްރެޓަރީ މުހައްމަދު ފިރުޒުލް އެވެ.
ރައީސް އޮފީހުން މީޑިއާ ކައުންސިލަށް ހުށަހެޅި މައްސަލަތަކުގެ ތެރޭގައި "އަދަދު" ނޫހުން ގެނެސްދިން "ބައިލައްކަ" ޑޮކިއުމެންޓަރީ އާއި އެވާހަކަ ގެނެސްދިން ހަބަރުތަކުގެ މައްސަލަ ވެސް ހިމެނެ އެވެ.
މިހާތަނަށް ރައީސް އޮފީހުން މީޑިއާ ކައުންސިލަށް ހުށަހެޅި މައްސަލަ ފުނި މިހާތަނަށް އެއްކޮށް ބަލައި ނިމިފައެއް ނުވެ އެވެ.
މި ބިލު ސަރުކާރުގެ ފަރާތުން ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހަޅުއްވާފައި ވަނީ ސަރުކާރުން މީޑިއާތަކާ ގުޅޭ ބިލެއް ހުށަހަޅާނެ ކަމަށް ބުނެފައިވާ ދަނޑިވަޅެއްގަ އެވެ. އެ ބިލު ސަރުކާރުން ތައްޔާރުކުރިއިރު މީޑިއާތަކާ އެއްވެސް ވަރަކަށް މަޝްވަރާއެއް ނުކުރެ އެވެ.
