ވޭޕު ކުރުމަށް ބޭނުން ކުރާ ތަކެއްޗާއި އޭގެ ވަކިވަކި ބައިތައް ރާއްޖެއަށް އެތެރެ ކުރުމާއި ބޭނުން ކުރުމާއި ވިޔަފާރި ކުރުން މަނާކުރުމަށްޓަކައި ދުންފަތް ކޮންޓްރޯލް ކުރުމާ ބެހޭ ގާނޫނު ބަދަލުކުރުމަށް ސަރުކާރުން ހުށަހެޅި ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ.
ޕީއެންސީއަށް ނިސްބަތްވާ ހެންވޭރު އުތުރު ދާއިރާގެ މެންބަރު އަހުމަދު އައިފާން ސްޕޮންސާ ކުރެއްވި މި ބިލު މަޖިލީހުން ފާސްކުރީ 54 މެންބަރުންގެ ވޯޓާއެކު އެވެ. އަށް މެންބަރަކު އެއްވެސް ކޮޅަކަށް ވޯޓު ދީފައި ނުވެ އެވެ.
މިއަދު ފާސްކުރި ބިލާ އެކު ރާއްޖޭގައި ވޭޕު ވިއްކާ ކޮންމެ މީހެއް 20،000ރ. އިން ޖޫރިމަނާ ކުރާނެ އެވެ. އަދި، ވިއްކި ކޮންމެ ވޭޕަކަށް 10،000ރ. ގެ ޖޫރިމަނާއެއް ކުރާނެ އެވެ.
ވޭޕު މަނާކުރުމަށްފަހު ހިލޭ ވޭޕެއް މީހަކަށް ދިނަސް 10،000ރ. ގެ ޖޫރިމަނާއެއް އަދި ބޭނުންކުރާ ކޮންމެ މީހަކަށް 5،000ރ. ގެ ޖޫރިމަނާއެއް މި ބިލު ތަސްދީގުކުރުމާ އެކު އަންނާނެ އެވެ.
ވޭޕު މަނާކުރުމުގެ އިތުރުން ސިނގިރޭޓު އަދި އެހެން ވަސީލަތްތައް ބޭނުންކޮށްގެން ދުންފަތުގެ އިސްތިއުމާލު ކުރުން ކޮންޓްރޯލް ކުރުމާއި ދުންފަތުގެ ބާވަތްތައް ރާއްޖެ އެތެރެކުރުމާއި ވަގަށް ސްމަގްލް ކުރުން ހުއްޓުވުމަށް ވެސް މި ބިލުގައި ގިނަ ކަންތައްތަކެއް ހިމަނާފައިވެ އެވެ.
