ޑޮމެއިންގެ ހިދުމަތް ދިނުމުގައި ދިމާވެފައި ނުވަތަ ދިމާވާ މައްސަލަތައް ބަލައި އެ މައްސަލަތަކާ މެދުގައި ގޮތް ނިންމުމަށް އެކުލަވައިލަންޖެހޭ ކޮމެޓީއަށް މީހުން އައްޔަނު ކުރުމުގެ ބާރު ޓްރާސްޕޯޓު މިނިސްޓަރަށް ލިބޭ ގޮތަށް އެއްގަމު އުޅަނދުގައި ޑޮމެއިން ބޭނުން ކުރުމުގެ ގަވާއިދު ބަދަލުކޮށްފި އެވެ.
ޓްރާސްޕޯޓު މިނިސްޓަރީން މިއަދު ގެޒެޓުކުރި ގަވާއިދުގައި މައިގަނޑު ގޮތެއްގައި ގެނެސްފައި ވަނީ ދެ ބަދަލެކެވެ.
އެއްގަމު އުޅަނދުގެ ޑޮމެއިން ބޭނުން ކުރުމުގެ ގަވާއިދުގެ ހަވަނަ މާއްދާއަށް ގެނައި އިސްލާހުގައި އޮތީ ޑޮމެއިންގެ ހިދުމަތް ދިނުމުގައި ދިމާވެފައިވާ ނުވަތަ ދިމާވާ މައްސަލަތައް ބަލައި އެ މައްސަލަތަކާ މެދު ގޮތް ނިންމުމުގެ ބާރު ލިބޭ ކޮމިޓީ އެކުލަވައިލާނީ ޓްރާންސްޕޯޓު މިނިސްޓަރު ކަމަށާއި އެ ކޮމިޓީގައި ތިބޭނީ ހަތް މެންބަރުން ކަމަށެވެ.
އެ ގަވާއިދުގައި މީގެ ކުރިން އޮންނަ ގޮތުން ޑޮމެއިންގެ މައްސަލަ ބަލާ ކޮމެޓީގައި ޓްރާންސްޕޯޓުގެ އިތުރުން ފިނޭންސް މިނިސްޓަރީ އާއި މޯލްޑިވްސް އިންލެންޑު ރިވެނިއު އޮތޯރިޓީގެ ބޭފުޅުން ތިބުން ލާޒިމެވެ. ނަމަވެސް މިފަހަރު ގެނައި އިސްލާހުގައި އެ ބައި ވަނީ އުނިކޮށްފަ އެވެ.
އަލަށް ގެނައި އިސްލާހުގައި އެ ކޮމިޓީއަށް ވަނީ ޑޮމެއިންގެ ސައްހަކަން ކަނޑައެޅުމާއި ޑޮމެއިން ދޫކޮށްފައި ވަނީ ގަވާއިދާ އެއްގޮތަށް ނޫން ކަމަށް ނިންމައި ޑޮމެއިން ބާތިލު ކުރުމުގެ ބާރުގެ އިތުރުން އެ ކޮމިޓީން ބަލާ މައްސަލަތަކާ މެދު މަދަނީ މިންގަނޑު ގޮތެއް ނިންމުމުގެ ބާރު ވެސް ދީފަ އެވެ.
އޭގެ އިތުރުން ދެން އެ އިސްލާހުގައި އޮތީ އެ ގަވާއިދުގެ 11 ވަނަ މާއްދާގެ ފަހަތަށް 1-11 ގެ ގޮތުގައި މާއްދާއެއް އިތުރު ކުރުމަށެވެ.
އެ މާއްދާގައި ހިމަނާފައި ވަނީ މިހާރު ދޫކޮށްފައި ހުރި ޑޮމެއިންތަކުގެ ރެޖިސްޓަރީ ލިޔުމާއި ޑޮމެއިން ބޭނު ކުރުމުގެ ހުއްދަތައް އައު ގަވާއިދާ އެއްގޮތަށް ބަދަލު ކުރުމަށްޓަކައި އަންނަ އާދީއްތަ ދުވަހުން ފެށިގެން 60 ދުވަހުގެ ތެރޭގައި ޑޮމެއިން ރެޖިސްޓަރީ ކޮށްފައިވާ ކަމުގެ ލިޔުން ނުވަތަ ފައިސާ ދެއްކި ކަމުގެ ސްލިޕް މިނިސްޓަރީއަށް ހުށަހެޅުމަށެވެ.
އަންނަ އާދީއްތަ ދުވަހުގެ ފެށިގެން ތިން މަސްދުވަހުގެ ތެރޭގައި ހުރިހާ ހުއްދައެއް އައު ގަވާއިދާ އެއްގޮތަށް ބަދަލު ކުރަންޖެހޭނެ ކަމަށް ވެސް އެ މާއްދާގައި ބަޔާން ކޮށްފައިވެ އެވެ. އާ ގަވާއިދަށް އަމަލު ކުރަން ފަށާނީ އަންނަ އާދީއްތަ ދުވަހުން ފެށިގެންނެވެ.
