އިންޑިއާ ސަރުކާރުން މިދިޔަ އަހަރު ރާއްޖޭގެ ކޯސްޓުގާޑަށް ހަދިޔާކުރި ސީޖީއެސް ހުރަވީ، މަރާމާތު ކުރަން އިންޑިއާއަށް ގެންދިއުމަށް އައި އެ ގައުމުގެ އަސްކަރީ މަނަވާރައެކު މިއަދު ފުރައިފި އެވެ.
ރާއްޖޭގައި ހުންނަ އިންޑިއާގެ ހައި ކޮމިޝަނުން ސޯޝަލް މީޑިއާގައި ކުރި ޕޯސްޓެއްގައި ބުނީ، ހުރަވީ ބަލައި އައީ އެ ގައުމުގެ އަސްކަރީ މަނަވަރު "އައިއެންއެސް ތަލްވާރު" ކަމަށެވެ. އަދި، ހުރަވީ މަރާމާތު ކުރަން ގެންދަނީ މުމްބާއީގައި ހުންނަ ނޭވަލް ޑޮކްޔާޑަށް ކަމަށް ވެސް އެމްބަސީން ބުންޏެވެ.
ހުރަވީ އާއެކު އިންޑިއާގެ މަނަވަރު މިހާރު ވަނީ ފުރައިފަ އެވެ. އެ މަނަވަރު އިއްޔެ އޮތީ މާލެ ބޭރުގައި ބަނދަރުކޮށްފަ އެވެ.
އަސްކަރީ ހިލޭ އެހީގެ ގޮތުގައި ހުރަވީ މަރާމާތަށް ގެންދަން ނިންމާފައިވާކަން އިއުލާނު ކުރީ، ރައީސް ޑރ. މުހައްމަދު މުއިއްޒު މިދިޔަ މަހު ކުރެއްވި ރަސްމީ ދަތުރުގެ ތެރެއިން އެއްބަސްވި ކަންކަމުގެ ތެރޭގަ އެވެ. އެ ދަތުރުގައި ދެ ގައުމުން އެއްބަސްވި ކަންކަން ހިމެނުމަށްފަހު އެކުލަވައިލި ވިޝަން ޑޮކިއުމެންޓުގައި ވެސް މި ވާހަކަ އޮތެވެ.
އޭގެ އިތުރުން ވެސް އިންޑިއާއާ އެކު އަސްކަރީ ގުޅުން ބަދަހިކޮށް، އެ ގައުމުން އަސްކަރީ އެހީ ހޯދުމަށް ރައީސްގެ ދަތުރުގައި އެއްބަސްވެފައިވެ އެވެ.
ކޯސްޓުގާޑުން މިހާރު ބޭނުންކުރާ ސީޖީއެސް ހުރަވީ އަކީ އެ ނަމުގައި ކުރިން ބޭނުން ކުރަމުން އައި އުޅަނދުގެ ބަދަލުގައި އިންޑިއާއިން ހަދިޔާ ކުރި އުޅަނދެކެވެ.
އެ އުޅަނދުތައް ރާއްޖެއިން ރީފިޓު ނުކުރެވެނީ ރާއްޖޭގައި އެފަދަ ހިދުމަތެއް ދެވޭނެ އަސްކަރީ ޑޮކެއް ނެތުމުންނެވެ. އުތުރު ތިލަފަޅުގައި އަސްކަރީ ބަނދަރެއް ގާއިމު ކުރުމުގެ މަސައްކަތް މިދިޔަ ސަރުކާރުން ކުރި އެވެ. ނަމަވެސް މި ސަރުކާރުގެ އިސްވެރިންގެ ގޮތުގައި ތިބި މީހުން އޭރު ތުހުމަތު ކުރީ އެއީ އިންޑިއާ ސިފައިން ބައިތިއްބަން ހަދާ އަސްކަރީ މަރުކަޒެއް ކަމަށެވެ.
ވެރިކަމަށް އައުމަށްފަހު މި ސަރުކާރުން ވަނީ އުތުރުތިލަފަޅުގައި ދަނޑުހައްދަން ނިންމައިފަ އެވެ.
