މިއުނިކް (ނޮވެމްބަރު 10) - ޖަމާލް މުސިއާލާ ޖެހި ހަަމައެކަނި ގޯލުން 1-0 އިން އެސްޓީ ޕޯލީ އަތުން މޮޅުވެ، ޖަރުމަނު ލީގުގެ އެއް ވަނައިގައި ބަޔާން މިއުނިކުން ފަސް ޕޮއިންޓުގެ ލީޑެއް ނަގައިފި އެވެ.
ބަޔާން، ލީގުގެ އެއް ވަަނައިގައި އޮތީ 10 މެޗުން 26 ޕޮއިންޓާ އެކު އެވެ. ލީގުގެ ދެ ވަނައިގައި އޮތް އާރްބީ ލައިޕްޒިގު ރޭ ކުޅުނު މެޗުން ވަނީ އަމިއްލަ ދަނޑުގައި ބޮރޫޝިއާ މުންޗެންގްލަޑްބެކާ ލަނޑެއް ނުޖެހި އެއްވަރުވެފަ އެވެ. ލައިޕްޒިގަށް ވަނީ 10 މެޗުން 21 ޕޮއިންޓް ލިބިފަ އެވެ. ތިން ވަަނައިގައި އޮތް އައިންޓްރަކްޓް ފްރޭންކްފާޓާއި ހަތަރެއްގައި އޮތް އެންމެ ފަހުގެ ޗެމްޕިއަން، ބަޔާ ލެވަކޫސަނަށް ވަނީ 17 ޕޮއިންޓް ލިބިފަ އެވެ. ފްރޭންކްފާޓް ނުވަ މެޗު ކުޅުނުއިރު، ލެވަކޫސަން ވަނީ އެ ޓީމުގެ 10 ވަނަ މެޗުގައި ރޭ ބޮކުމްއާ 1-1 އިން އެއްވަރުވެފަ އެވެ.
ޕޯލީ ކޮޅަށް ބަޔާންގެ ގޯލު ޖެހި މުސިއާލާ މި ލަނޑު ކާމިޔާބުކުރީ މެޗުގެ 22 ވަނަ މިނިޓްގައި އޭރިއާބޭރުންނެވެ. މި މެޗުގައި ބަޔާނަށް އިތުރު ގޯލެއް ޖަހައިދޭން މުސިއާލާ އާއި ލެއޯން ގޮރެޓްޒްކާ އަދި ސާޖް ގްނަބްރީ އަށް ރަނގަޅު ފުރުސަތުތަކެއް ލިބި ބޭނުމެއް ނުކުރެ އެވެ.
ބަޔާނަށް މި ފަހަރު ގިނަ ގޯލުތަކެއް ޖަހައިދީފައިވާ އިނގިރޭސި ފޯވާޑް ހެރީ ކޭން އަށް މި މެޗުގައި މާ އެދެވޭ ކުޅުމެއް ނުދެއްކުނުއިރު، ގޯލެއް ޖަހަން ލިބުނު ފުރުސަތުގައި ފޮނުވާލި ބޯޅަ ދިޔައީ ގޯލާ ސީދާނުވެ އެވެ.
