ސަރުކާރުން ކުރިޔަށްގެންދާ ފަސް މިލިއަން ގަސް މަޝްރޫއަށް އެހީތެރިވުމުގެ ގޮތުން މޯލްޑިވްސް އިސްލާމިކް ބޭންކް (އެމްއައިބީ) އިން އިސްނަގައިގެން 1،000 ގަސް މާލެ ސަރަހައްދުގެ ރައްޔިތުން ދަތުރު ދިޔުމަށް ހާއްސަކޮށްފައިވާ ކ. ކުޑަގިރީގައި އިންދައިފި އެވެ.
އެ ހަރަކާތް ރަސްމީކޮށް ފައްޓަވައި ދެއްވަމުން ޝަރަފުވެރި މެހެމާން އެމްއައިބީގެ ސީއީއޯ މުފައްދަލް އިދްރީސް ހުމްރީ ވިދާޅުވީ ތިމާވެށި ހިމާޔަތް ކުރުމަކީ ކޮންމެ ކުއްޖެއްގެވެސް ފަރުދީ ޒިންމާއެއްކަމަށް ދެކިގެން ކުރިޔަށް ދިޔުމަށް ނަސޭހަތްތެރި ވާކަމަށެވެ.
އެމްއައިބީގެ ގަސްއިންދުމުގެ އެ ހަރަކާތް ރާވާ އިންތިޒާމުކުރުމުގައި ހަރަކާތްތެރިވެފައި ވަނީ ކްލީން މޯލްޑިސް ޖަމިއްޔާއިންނެވެ. ޕާޓްނަރުންގެ ގޮތުގައި ބައިވެރިވީ އެޗްޑީސީ، އެމްޓީސީސީ، އޭޝިއާ ފޯވަޑިން، އައިކެއާ، މޯލްޑިސް ޕޮލިސް ސާވިސް އަދި ދަ ހޯކްސް އެވެ.
އޭގެ އިތުރުން އެ ހަރަކާތުގައި ގިޔާސުއްދީން ސްކޫލްގެ ގިނައަދަދެއްގެ ދަރިވަރުންނާއި ބެލެނިވެރިން ވެސް ވަނީ ބައިވެރިވެފަ އެވެ.
އެމްއައިބީއަކީ އިޖްތިމާއީ ކަންކަމަށް ބޮޑެތި ހޭދަތަކެއް ކުރަމުންދާ ކުންފުންފުންޔެކެވެ. ރާއްޖޭގައި އެންމެ ހަލުވިކަމާއިއެކު ކުރިއަރަމުން އަންނަ އެ ބޭންކުން ދަނީ ޒަމާނީ ވަސީލަތްތަކުގެ އެހީގައި ބޭންކިން ހިދުމަތްތައް ދެމުންނެވެ.
