ލިވަޕޫލް (ނޮވެމްބަރު 10) - އިނގިރޭސި ޕްރިމިއާ ލީގުގައި ރޭ މެންޗެސްޓާ ސިޓީ 2-1 އިން ބްރައިޓަން އަތުން ބަލިވިއިރު، ލިވަޕޫލުން 2-0 އިން އެސްޓަން ވިލާ ބަލިކޮށް ލީގުގެ އެއް ވަނައިގައި ފަސް ޕޮއިންޓަށް ލީޑުފުޅާކޮށްފި އެވެ.
ސިޓީން މި ވަނީ ޖެހިޖެހިގެން ހަަތަރު މެޗުން ބަލިވެ، އެ ޓީމުގެ ކޯޗު ޕެޕް ގާޑިއޯލާގެ ކެރިއަރުގައި ފުރަތަމަ ފަހަރަށް މި ފަދަ ދަށް ރެކޯޑަކާ ކުރިމަތިލާން ޖެހިފަ އެވެ. ސިޓީ ވަނީ ލީގުގައި ދެ މެޗާއި ޗެމްޕިއަންސް ލީގު މެޗަކާއި ލީގު ކަޕް މެޗަކުން ބަލިވެފަ އެވެ.
ލިވަޕޫލް، އެއް ވަނައިގައި އޮތީ 11 މެޗުން 28 ޕޮއިންޓާ އެކު އެވެ. ދެ ވަނައިގައި އޮތް ސިޓީ އަށް 11 މެޗުން ވަނީ 23 ޕޮއިންޓް ލިބިފަ އެވެ.
ބްރައިޓަން ދަނޑުގައި ފުރަަތަމަ ހާފުގައި ސިޓީން ލީޑުނެގީ އާލިން ބްރައުޓް ހާލަންޑް ޖެހި ގޯލުންނެވެ. މިއީ، މި ސީޒަނުގައި ހާލަންޑް ޖެހި 15 ވަނަ ގޯލެެވެ. މި ލަނޑާ އެކު، ހާލަންޑް ވެފައިވަނީ އެންމެ އަވަހަށް ލީގުގައި 75 ގޯލު ހަމަކުރި ކުޅުންތެރިޔާ އަށެވެ. ހާލަންޑް، މި އަދަަދަށް ގޯލު ޖެހީ 77 މެޗުންނެވެ.
ސިޓީން ފުރަތަމަ ހާފުގައި ލީޑުގައި އޮވެ ނިންމާލި ނަމަވެސް، ދެ ވަނަ ހާފުގައި ހަތަރު މިނިޓް ތެރޭ ދެ ލަނޑު ޖަހައިގެން، ބްރައިޓަން އިން ނަތީޖާ އަނބުރާލި އެވެ. އެ ޓީމުގެ ދެ ގޯލު ޖެހީ ވެސް ބަދަލަކަށް ކުޅެން އެރި ދެ ކުޅުންތެރިންނެވެ.
އެ ގޮތުން، ބްރައިޓަން އަށް އެއްވަރުކޮށްދިން ލަނޑު ޖެހީ 78 ވަނަ މިނިޓްގައި ޖޮއާއޯ ޕެޑްރޯ އެވެ. މިއީ އަނިޔާއިން ރަނގަޅުވެ، ހަތް މެޗަށް ފަހު ޕެޑްރޯ ކުޅެން ނުކުތް ފުރަތަމަ ފަހަރެވެ. އޭގެ ހަތަރު މިނިޓް ފަހުން، މެޓް އޮރައިލީ ވަނީ ބްރައިޓަންގެ ދެ ވަނަ ގޯލު ޖަހައިދީފަ އެވެ. އޭނާ ވެސް ސެލްޓިކް ދޫކޮށް ބްރައިޓަންއާ ގުޅި، ކުޅުނު ފުރަތަމަ މެޗުގައި ލިބުނު އަނިޔާ އަށް ފަހު، ކުޅުމާ ދުރުގައި ހުރެފައި، އެނބުރި އައީ މި މެޗުގަ އެވެ.
މިއީ، 2006 ވަނަ އަހަރުގެ ފަހުން، ސިޓީ ޖެހިޖެހިގެން ހަތަރު މެޗުން ބަލިވި ފުރަތަމަ ފަހަރެވެ.
އަމިއްލަ ދަނޑުގައި ކުޅުނު ލިވަޕޫލުން ފުރަތަމަ ހާފު ނިންމާލީ ލީޑުގައި އޮވެ އެވެ. އެ ޓީމުގެ ލަނޑު ޖެހީ ޑާވިން ނޫނޭޒް އެވެ. ލިވަޕޫލަށް ދެ ވަނަ ލަނޑެއް ޖަހައިދޭން ނޫނޭޒަށް ލިބުނު ފުރުސަތުގައި ޖެހި ބޯޅަ ދިޔައީ ގޯލާ ސީދާނުވެ އެވެ. މި ހާފުގައި ވިލާ އަށް ލަނޑު ޖަހައިދޭން، އަހުމަދޫ އޮނާނާ އާއި ޕައު ޓޮރޭޒް ބޮލުން ފޮނުވާލި ބޯޅަތައް ލިވަޕޫލްގެ ކީޕަރު، ކޮއިމްހިން ކެލަހާ ވަނީ މަތަކޮށްފަ އެވެ.
ދެ ވަނަ ހާފުގައި ލިވަޕޫލްގެ ގޯލު ޖެހީ މުހައްމަދު ސަލާހު އެވެ. މެޗުގެ 84 ވަނަ މިނިޓްގައި، ހާފުގެ މެެދެއްހާ ހިސާބުން ލިބުނު ބޯޅައެއް ހިފައިގެން އޭރިއާތެރެއަށް ވަދެ ސަލާހު ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ބްރެންޓްފޯޑުން ވަނީ 3-2 އިން ބޯންމައުތު ބަލިކޮށްފަ އެވެ. ކްރިސްޓަލް ޕެލަސް ދަނޑުގައި 2-0 އިން ފުލަމް މޮޅުވިއިރު، އެވަޓަން އާއި ވެސްޓް ހޭމްގެ މެޗު ނިމުނީ 0-0 އިން އެއްވަރުވެގެންނެވެ.
