އިސްލާމްއާބާދު، ޕާކިސްތާން (ނޮވެމްބަރު 9) - އަންނަ އަހަރު ޕާކިސްތާންގައި ބާއްވަން ފުރުސަތު ދިފައި އޮތް ޗެމްޕިއަންސް ޓްރޮފީ ކްރިކެޓް މުބާރާތުގެ ފޯމެޓް ބަދަލުކުރަން މަޝްވަރާތަކެއް ކުރިއަށްދާތީވެ، އެކަމާ ޕާކިސްތާންގެ ކްރިކެޓް ބޯޑުން ހިތްހަމަނުޖެހުން ފާޅުކޮށްފި އެވެ.
އަންނަ އަހަރުގެ ފެބްރުއަރީ އާއި މާޗްގައި، ޕާކިސްތާންގައި ކުޅެން ތާވަލުކޮށްފައިވާ ޗެމްޕިއަންސް ޓްރޮފީ މުބާރާތަކީ، 1996 ވަނަ އަހަރުގެ ފަހުން، އެ ގައުމުގައި ހޯސްޓްކުރެވޭ ބައިނަލްއަގުވާމީ ބޮޑު ކްރިކެޓް މުބާރާތެވެ.
އެކަމަކު، އިންޑިއާ އާއި ޕާކިސްތާންގެ ދެމެދުގައި އޮތް ހިޔާލުތަފާތުވުންތަކުުގެ ސަބަބުން، ޗެމްޕިއަންސް ޓްރޮފީގެ ފޯމެޓާ މެދު އަދިވެސް ގޮތެއް ނުނިމެ އެވެ. އިންޑިއާ އާއި ޕާކިސްތާނުން މުބާރާތެއްގައި ނޫން ގޮތަކަށް ބައްދަލުުނުކުރާތާ 11 އަހަރުވެފައިވާއިރު، އެންމެ ފަހުން، ޕާކިސްތާނަށް ގޮސް އިންޑިއާ އިން މެޗެއް ކުޅުނީ 2008 ވަނަ އަހަރު އެވެ.
މަޝްވަރާ ކުރެވެމުން އަންނަ ގޮތުގައި، އިންޑިއާގެ ޗެމްޕިއަންސް ޓްރޮފީ މެޗުތައް، ޔޫއޭއީގައި ކުޅުމުގެ ވާހަކަ އަންނަނީ ދެކެވެމުންނެވެ. އެކަމަކު، އެ ގޮތަށް ޕާކިސްތާން ކްރިކެޓް ބޯޑުން ކުރިއަށްދާން ބޭނުމެއް ނުވެ އެވެ.
"ކުޅިވަރު އެބަޖެހޭ ސިޔާސީ ކަންކަމުން އެއްކިބާވާން. ސިޔާސީ ކަމަކާ ހެދި ކްރިކެޓްގެ ކަންކަން ވަކި ގޮތަކަށް ވާން ނުޖެހޭ،" އިންޑިއާގެ މެޗުތައް ހައިބްރިޑް މޮޑެލަށް ކުޅެން އުޅޭ ވާހަކަތަކާ ގުޅިގެން، ޕާކިސްތާން ކްރިކެޓް ބޯޑުގެ ޗެއާމަން، މުހުސިން ނާގްވީ ވިދާޅުވި އެވެ.
އަންނަ ހޯމަ ދުވަހުން ފެށިގެން 100 ދުވަސް ތެރޭ، އަންނަ އަހަރުގެ ފެބްރުއަރީ 19 ވަނަ ދުވަހު، ޗެމްޕިއަންސް ޓްރޮފީ ފަށާއިރު، އަދިވެސް އިންޓަނޭޝަނަލް ކްރިކެޓް ކައުންސިލުން މި މުބާރާތުގެ ޝެޑިއުލް އާންމުނުކުރެ އެވެ.
ޖުމްލަ 50 އޯވަރަށް ކުޅޭ މި މުބާރާތުގައި އަށް ޓީމު ވާދަކުރެ އެވެ. ދެ ގްރޫޕަށް ޓީމުތައް ބަހާފައިވާއިރު، ކޮންމެ ގްރޫޕަކުން ދެ ޓީމެއް ސެމީ ފައިނަލަށް ދަތުރުކުރާނެ އެވެ.
މިދިޔަ 16 އަހަރު ތެރޭގައި، ޕާކިސްތާނުން ވަނީ އިންޑިއާގައި ތިން ފަހަރެއްގެ މަތިން ކުޅެފަ އެވެ. އެއީ، 2012، 2013 ގައި ކުޅުނު ބައިލެޓްރަލް ސީރީސްގެ އިތުރުން، 2016 ވަނަ އަހަރު އިންޑިއާ އިން ހޯސްޓްކުރި ޓީ20 ވޯލްޑް ކަޕާއި، މިދިޔަ އަހަރު އިންޑިއާ އިން ބޭއްވި ވަންޑޭއިންޓަނޭޝަނަލް (އޯޑީއައި) ވޯލްޑް ކަޕަށެވެ.
މިދިޔަ އަހަރު ޕާކިސްތާނުން އޭޝިއާ ކަޕް ހޯސްޓްކުރިއިރު، އިންޑިއާގެ މެޗުތައް ކުޅެފައިވަނީ ސްރީ ލަންކާގަ އެވެ. އެކަމަކު، ޕާކިސްތާނުން ވަނީ އަންނަ އަހަރުގެ ޗެމްޕިއަންސް ޓްރޮފީ މެޗުތައް އިންޑިއާ ބޭނުންވާ ގޮތަކަށް ބަދަލުކުރިޔަ ނުދޭން އަމާޒުހިފައިފަ އެވެ.
ޖިއޯނިއުސްއުރްދޫ އިން ރިޕޯޓްކުރާގޮތުގައި، އިންޑިއާ އިން އަންނަ އަހަރު ޕާކިސްތާނަށް ޗެމްޕިއަންސް ޓްރޮފީ މެޗުތައް ކުޅެން ނުގޮސްފިނަމަ، އިންޑިއާ އާއި ސްރީ ލަންކާގައި، 2025 ވަނަ އަހަރު ހޯސްޓްކުރާ ޓީ20 ވޯލްޑް ކަޕް ޕާކިސްތާނުން ބޮއިކޮޓްކުރާނެ އެވެ.
