އިސްތަންބޫލް، ތުރުކީ (ނޮވެމްބަރު 9) - ފެނަބާޗޭގެ ކޯޗު ހޯސޭ މޮރީނިއޯ އެއް މެޗަށް ސަސްޕެންޑްކޮށް، 18000 ޑޮލަރުން ޖޫރިމަނާކުރަން ތުރުކީ ފުޓްބޯޅަ ފެޑެރޭޝަނުން ނިންމައިފި އެވެ.
މޮރީނިއޯ އަށް މި އަދަބުތައް ދޭން ނިންމީ، ތުރުކީ ސުޕަ ލީގުގައި ފެނަބާޗޭ އިން ފަހު ވަގުތު ޓްރަބްޒޯންސްޕޯ އަތުން 3-2 އިން މޮޅުވި މެޗުގައި ހިނގާދިޔަ ކަންތައްތަކާއި މެޗަށް ފަހު ނޫސްވެރިންގެ ބައްދަލުވުމުގައި ދިމާވި ކަންތައްތަކުގެ މައްސަލަތައް ބެލުމަށް ފަހު އެވެ.
އެ ގޮތުން، ސޯފްޔަން އަމްރަބަޓް، އިތުރު ވަގުތުގައި ލަނޑުޖަހައި، ފެނަބާޗޭ މޮޅުކޮށްދިން ވަގުތު މޮރީނިއޯ ވަނީ ދަނޑަށް އަރައި އުފާފާޅުކޮށްފަ އެވެ. އަދި ނިންމާފައި ޓަނަލަށް ވަންނަމުން ސަޕޯޓަރުންނަށް އިޝާރާތްކޮށް އުފާފާޅުކުރި ގޮތުން، އޭނާއާ ދިމާލަށް އެއްޗެހި ވެސް އުކާފައިވެ އެވެ. އެ އަށް ފަހު، ނޫސްވެރިންގެ ބައްދަލުވުމުގައި މޮރީނިއޯ ވަނީ މެޗު ރެފްރީންނަށް ވަރަށް ބޮޑަށް ފާޑުކިޔައިފަ އެވެ.
ތުރުކީ ފުޓްބޯޅަ ފެޑެރޭޝަނުން ބުނެފައިވަނީ، ކުޅިވަރުގެ ރޫހާ ހިލާފު ކަންތައްތަކަކާއި ތުރުކީ ފުޓްބޯޅައިގެ އުސޫލުތަކާ ހިލާފު އަމަލުތަކެއް ވެސް މޮރީނިއޯގެ ފަރާތުން ފެނިފައިވާތީ، މި މައްސަލަ ބަލައި، އެންމެ އެކަށޭނެ ފިޔަވަޅުތައް އަޅާފައިވާ ކަމަށެވެ.
މެޗު ރެފްރީންނާ މެދު މޮރީނިއޯ ހިތްހަމަނުޖެހުނީ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި، ޓްރަންޒޯންސްޕޯ އަށް ދެ ޕެނަލްޓީ ދިންއިރު، ފެނަބާޗޭ އަށް ދޭން ޖެހޭ ޕެނަލްޓީއެއް ނުދިނުމާ ގުޅިގެންނެވެ.
