ނިމިދިޔަ އެމްޑީޕީގެ ވެރިކަމުގައި އެމަނިކުފާނު ޖަލަށް ލުމަށް ހުކުމް ކުރުމުން، ޖަލު ހުކުން ތަންފީޒު ވާނެކަން ކަށަވަރުކޮށް އިސްތިއުނާފީ މައްސަލަ ލަސްކުރީ މި ސަރުކާރުގެ ވެރިން ކަމަށް ވިދާޅުވެ ކުރީގެ ރައީސް އަބްދުﷲ ޔާމީނު، ބާރަށު ދާއިރާގެ މަޖިލިސް މެންބަރު އިބްރާހިމް ޝުޖާއުއަށް ރައްދު ދެއްވައިފި އެވެ.
ޕީއެންއެފް އިން ރޭ ބޭއްވި ޖަލްސާއެއްގައި ވާހަކަދައްކަވަމުން ޔާމީނު ރައްދު ދެއްވީ، އިއްޔެ އެމަނިކުފާނު ރާއްޖެ ޓީވީއަށް ދެއްވި ހާއްސަ އިންޓަވިއުއާ ގުޅިގެން ޝުޖާއު އެކްސްގައި ކުރެއްވި ޕޯސްޓަކަށެވެ. ޝުޖާއުގެ ޕޯސްޓުގައި ވިދާޅުވެފައި ވަނީ، ގައުމަށް ޓަކައި ޔާމީނު ޖަލުގައި ބަހައްޓަން ޖެހޭ ކަމަށް ބުނެ ތަފާތު ރިޕޯޓްތައް ގެނެސްދިން "އެމްޑީޕީގެ ޓީވީ" އަށް ޔާމީނު އިންޓަވިއުއެއް ދެއްވަނީ ކަމަށެވެ.
"ދެން މަދީ އެމްޑީޕީ ޕޯޑިއަމްގައި ދެއަތަށް ދެތިލަފަތް ލައިގެންހުރެވާހަކަ ދެއްކެވުން އެކަނި. އޭރުން މާ ސަޅިވާނެ،" ވެރިކަންކުރާ ޕީއެންސީގެ ޑެޕިއުޓީ ޕީޖީ ލީޑަރު ލިޔުއްވާފައިވެ އެވެ.
މިކަމާ ގުޅިގެން ކުރިން ޕީއެންސީ ކޯލިޝަނުގެ ލީޑަރުގެ ގޮތުގައި ހުންނެވި ޔާމީނު ރޭ ވިދާޅުވީ، އެމަނިކުފާނު ޖަލަށް ލާން ޖެހޭ ކަމަށް ބުނެ އެކަން އެމްޑީޕީން ކުރި ނަމަވެސް އެކަން ކަށަވަރުކުރީ 'ބާރަށު މައިކު' އާއި ރައީސް ޑރ. މުހައްމަދު މުއިއްޒު އަދި އަރިސް ބޭފުޅުން ކަމަށެވެ.
"އެހެންވީމަ މި ވާހަކަވެސް ބާރަށު މައިކު ޓުވީޓު ކޮށްލަން ވީނުންތޯ. އަޅުގަނޑު ޖަލުން ނުނިކުންނާނެކަން ކަށަވަރުކުރުމާއި ޖަލުން ނުނެރޭން ކުރި ހުރިހާ މަސައްކަތެއް. އަދި، ވެރިކަން ބަދަލުވީމަ އަޅުގަނޑު ގެއަށް ގެންނަން އިބޫ މަސައްކަތް ކުރީމަ ވެސް އެކަމާ ދެކޮޅު ހެދީ މުއިއްޒު އާއި އަބްދުއްރަހީމު" ޔާމީނު ވިދާޅުވި އެވެ.
މިދިޔަ ރިޔާސީ އިންތިހާބުގައި ޕީއެންސީ ކޯލިޝަނުގެ ފުރަތަމަ ކެންޑިޑޭޓަކީ ޔާމީނެވެ. އެމަނިކުފާނަށް ވާދަނުކުރެވުނީ ޖަލު ހުކުމެއް އޮތުމުން ސުޕްރީމް ކޯޓުން ކެންޑިޑެސީ ބާތިލުކުރުމުންނެވެ. ރައީސް މުއިއްޒުއަށް ރިޔާސީ ޓިކެޓު ދޭން ޕީއެންސީގެ ލީޑަޝިޕުން ނިންމީ އިންތިހާބު ބޮއިކޮޓު ކުރަން ޔާމީނު ދިން ލަފަޔާ ދެކޮޅަށެވެ.
ރޭގެ ޖަލްސާގައި ޔާމީނު ވިދާޅުވީ، ޝުޖާއު ފަދަ ބޭފުޅުން މަސައްކަތް ކުރައްވަނީ ރައްޔިތުންނަށް އޮޅުވާލަން ކަމަށާއި ނަމަވެސް ކަން ހިނގި ގޮތް ރައްޔިތުންނަށް ސާފުކޮށް އެނގޭ ކަމަށެވެ.
"މިއީ އަޅުގަނޑާ އެކީ އުޅުނު މީހުން. މި މީހުން ނޫންތޯ ކަށަވަރުކުރީ އަޅުގަނޑު ޖަލުގަ ބެހެއްޓުން. އެމީހުން ހަމަ ގައިމުވެސް ކަށަވަރުކުރީ ހައިކޯޓުގެ މައްސަލަ ލަސްކުރުންވެސް. ކަށަވަރުކޮށް މައްސަލަ ނިންމިޔަ ނުދިން ބަޔަކީ އަޅުގަނޑުގެ ޕާޓީގަ އިސްކޮށް ތިއްބެވި މީހުން. މިޔަކަށް ނުކެރޭނެ އެ މީހުންނަށް ރައްދު ދޭކަށް،" ޔާމީނު ވިދާޅުވި އެވެ.
އޭގެ އިތުރުން، ސަރުކާރަށާއި ޕީއެންސީއަށް އެމަނިކުފާނު ރައްދުކުރައްވާ ފާޑިޔުންތަކަށް ރައީސް މުއިއްޒުއަށް ރައްދުދެއްވަން ކެރިވަޑައިނުގަންނަވާނެ ކަމަށާއި ރައްދު ދޭން ނެރުއްވާނީ ޝުޖާއު ނުވަތަ ޕީޖީ ލީޑަރު އިބްރާހިމް ފަލާހު ފަދަ ބޭފުޅުން ކަމަށެވެ.
