އާސަންދައިގެ ހިދުމަތް މެދުކެނޑުމެއް ނެތި ރައްޔިތުންނަށް ލިބެމުންދާކަން ކަށަވަރު ކުރުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ހުށަހެޅި ކުއްލި މައްސަލަ މަޖިލީހުން ބަލައިނުގަތީ އެކަމުގެ ކަންބޮޑުވުންތަކަށް ހައްލު ހޯދުމުގެ ހިތްވަރު ސަރުކާރުގައި ނެތުމުން ކަމަށް އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅި ކުއްލި މައްސަލައަށް ތަޅުމުގައި ބަހުސް ކުރުމާ މެދު ވޯޓަކަށް ދެވެން ނެތްކަން ރިޔާސަތުން އިއުލާނު ކުރި އެވެ. އެއީ ކުއްލި މައްސަލައިގައި ހުންނަން ޖެހޭ ޝަރުތު ފުރިހަމަ ނުވާ ކަމަށް ބުނެ އެވެ. އެކަމުގެ ކަންބޮޑުވުން ފައްޔާޒު ވަނީ ފާޅުކުރައްވާފަ އެވެ.
"ރައްޔިތުންގެ މަޖިލީހަކީ ރައްޔިތުންގެ ކަންބޮޑުވުން ހުރި މައްސަލަތައް އުފައްދައި ބަހުސް ކުރުމަށް މަސައްކަތްކުރާ މުއައްސަސާ. ނަމަވެސް އާސަންދަ ލިބުމާ މެދު ހުރި ރައްޔިތުންގެ ކަންބޮޑުވުންތައް އެމްޑީޕީން ހިއްސާކުރުމުން އެ ކަންބޮޑުވުންތަކަށް ހައްލު ހޯދުމުގެ ހިތްވަރު ސަރުކާރުގައި ނެތް," ފައްޔާޒު ވިދާޅުވި އެވެ.
އާސަންދަ ހިދުމަތް ފޯރުކޮށްދިނުމަކީ ސަރުކާރުގެ މައްޗަށް ގާނޫނުން މަތިކުރާ ޒިންމާއެއް ކަމަށާއި އެ ހިދުމަތް ފޯރުކޮށްދިނުމުގައި ކުރިމަތިވާ ކޮންމެ ގޮންޖެހުމެއް ހައްލުކުރަން ޖެހޭނީ ވެސް ސަރުކާރުން ކަމަށް ފައްޔާޒު ވިދާޅުވި އެވެ.
މަޖިލީހުގައި ސުޕަމެޖޯރިޓީ އޮތް ޕީއެންސީގެ ނިޔަތާއި އަމަލުތައް ކުރިއަށް އޮތް ތަނުގައި ވެސް ހުންނާނެ ގޮތް މިއަދުގެ ކުއްލި މައްސަލަ ބޭރުކުރުމުން ހާމަވެގެންދާ ކަމަށް ވެސް އޭނާ ވިދާޅުވި އެވެ.
ކުޑޫ ހުށަހެޅުއްވި މައްސަލާގައި ބުނީ މި އަހަރުގެ މިހާތަނަށް ހޮސްޕިޓަލްތަކާއި ކްލިނިކްތަކުން ހިދުމަތް ހޯދުމަށް ދާ ދިވެހި ރައްޔިތުން، ޑޮކްޓަރަށް ދެއްކުމަށާއި ޓެސްޓްތައް ހެދުމަށް ލިބެމުންއައި އާސަންދަގެ ހިދުމަތް ދިނުން ހުއްޓައިލަމުންދާތީ އާއި، ބޭސްސިޓީއަށް ބޭސްދޫކުރުމުގައި ލިބެމުންއައި އާސަންދަގެ ހިދުމަތް ނުލިބި، އެ ކަންކަމަށް އަމިއްލަ އަތުން ހަރަދުކުރަންޖެހުމުގެ ކަންބޮޑުވުން އިތުރުވެފައިވާ ކަމަށެވެ.
އެ މައްސަލާގައި ބުނީ ގާނޫނު އަސާސީގައި ރަނގަޅު ފެންވަރުގެ ސިއްހީ ހިދުމަތްތައް ލިބުމަކީ ކޮންމެ ރައްޔިތަކަށް ލިބިގެންވާ އަސާސީ ހައްގެއް ކަމަށް ކަނޑައަޅައި، ދައުލަތުގެ ތަނަވަސްކަމާއި، ކުޅަދާނަކަން ހުރި މިންވަރަކަށް އެ ހައްގު ރައްޔިތުންނަށް ހޯދޭނޭ މަގު ތަނަވަސްކޮށްދޭން މަސައްކަތް ކުރަން ޖެހޭނެ ކަމަށެވެ.
އިޖްތިމާއީ ސިއްހީ އިންޝުއަރަންސްގެ ގައުމީ ނިޒާމުގެ ގާނޫނުގައި އާސަންދަ ހިންގުމަށް މާލީގޮތުން ދަތިވެއްޖެ ހާލަތްތަކުގައި އެކަމަށް ބޭނުންވާ ފައިސާ ހޯދުމަށް މާލީ ވުޒާރާގައި އެދުމުން އެ ވުޒާރާއިން އެކަން ހައްލުކޮށްދޭން ޖެހޭނެ ކަމަށް ކަނޑައަޅާފައިވާކަން ކުއްލި މައްސަލައިގައި ވަނީ ފާހަގަކޮށްފަ އެވެ.
