ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) ގެ މުވައްޒަފުންތަކެއް އިންޑިއާގެ ޕޮލިސް އެކަޑެމީއެއްގެ ތަމްރީން ޕްރޮގްރާމެއްގައި ބައިވެރިވެއްޖެ އެވެ.
ހައިދަރުއާބާދުގައި ހުންނަ ސަރުދާރު ވަލައްޕައީ ނެޝަނަލް ޕޮލިސް އެކަޑެމީގައި މި މަހުގެ 4-8 އަށް ކުރިއަށް ގެންދާ ތަމްރީނު ޕްރޮގްރާމުގައި އެޗްޑީސީގެ އައިޓީ ޑިޕާޓްމެންޓުގެ ހަތަރު މުވައްޒަފަކު ބައިވެރިވެ އެވެ.
"އާބަން އޮޕަރޭޝަން" ނަމުގައި ކުރިއަށް ގެންދާ މި ކޯހަކީ ފުލުހުންނަށް ހާއްސަ ކޯހެކެވެ.
އެޗްޑީސީގެ މުވައްޒަފުންތަކެއް މި ކޯހަށް ފޮނުވުނީ އޮޅުމަކުން ކަމަށް މައުލޫމާތު ލިބިފައިވެ އެވެ.
ޖުމުލަ 28 އޮފިސަރުން ބައިވެރިވާ މި ކޯހިގައި ފުލުހުން ހިންގާ އޮޕަރޭޝަންތަކުގައި ބޭނުންކުރާނެ އުކުޅުތައް ދަސްކޮށްދެ އެވެ. އަދި ހާއްސަ ޑްރިލެއް ވެސް އޮވެ އެވެ.
މި ތަމްރީނު ޕްރޮގްރާމުގެ މައުލޫމާތު އެޗްޑީސީއަށް ފޮނުވީ ސަރުކާރުގެ ކަމާ ގުޅޭ އިދާރާއިންނެވެ. އޮޅުން އެރީ ކޯހުގެ ނަމަކަށް އާބަން އޮޕަރޭޝަން ޖަހާފައި އޮތުމުން ކަމަށް މައުލޫމާތު އެނގޭ ބައެއް މީހުން އަދަދު ނޫހަށް ބުންޏެވެ.
"މިއީ އެއްވެސް ބަޔަކު ރަނގަޅަށް ބަލާ ނުލައި އޮތުމުން ވީ ގޮތެއް،" އެޗްޑީސީގެ އިސްވެރިޔަކު ވިދާޅުވި އެވެ.
