އާސަންދައިގެ ހިދުމަތް މެދުކެނޑުމެއް ނެތި ރައްޔިތުންނަށް ލިބެމުންދާކަން ކަށަވަރު ކުރުމަށް ސަރުކާރަށް ގޮވާލައި ރައްޔިތުންގެ މަޖިލީހަށް އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅި ކުއްލި މައްސަލައިގައި ޝަރުތު ހަމަނުވާ ކަމަށް ބުނެ އެ މައްސަލަ މަޖިލީހުން ބަލައިނުގަންނަ ކަމަށް ރިޔާސަތުން ނިންމައިފި އެވެ.
އެ ކުއްލި މައްސަލާގައި ވަނީ ރައްޔިތުންނާ ސީދާ ގުޅުންހުރި އެފަދަ މުހިންމު ކަމެއްގައި އަދި ދައުލަތުން ފައިސާ ދީގެން ހިންގަމުން އައިސްފައިވާ ހިދުމަތެއް، ދައުލަތުން ފައިސާ ނުދިނުމުގެ ސަބަބުން ހުއްޓައިލަން ޖެހޭ ހިސާބަށް ދިޔަނުދިނުމަށް އަޅަން ޖެހޭ ފިޔަވަޅުތައް ލަސްނުކޮށް އެޅުމަށް ގޮވާލާ ކަމަށެވެ.
އެޑިއުކޭޝަން މިނިސްޓަރާ ސުވާލު ކުރުމުގެ ވަގުތު ނިމުމަށް ފަހު ރިޔާސަތުން ވަނީ އެ މައްސަލައިގެ ބަހުސް ތަޅުމުގައި ކުރުމާ މެދު ވޯޓަކަށް ދެވެން ނެތް ކަން އިއުލާނު ކުރައްވާފަ އެވެ.
"އެއީ އެ މާއްދާގެ ހ. ގައި ބުނަނީ ކުއްލި މައްސަލައެއްގެ ގޮތުގައި ހުށަހަޅާ މައްސަލައިގައި ބަޔާންކުރާ ކަންކަން ވާން ޖެހޭނީ ކުއްލިއަކަށް ހިނގައިގެން އުޅޭ ކަމަކަށޭ. އަދި އެއީ ވޭތުވެދިޔަ ހަތް ދުވަހު ހިނގައިގެން އުޅޭ ކަމަކަށޭ ވާން ޖެހޭނީ," މަޖިލިސް ރައީސް އަބްދުއްރަހީމް އަބްދުالله ވިދާޅުވި އެވެ.
ދިވެހި ހުރިހާ ރައްޔިތުންނަށް އަސާސީ ސިއްހީ ހިދުމަތް ދިނުމަށް އާސަންދައިގެ ނަމުގައި 2011 ވަނަ އަހަރު ފެށި ގައުމީ ސިއްހީ ފަރުވާގެ އިންޝުއަރަންސް ނިޒާމު ދިވެހި ދައުލަތުން ފައިސާ ހަރަދުކޮށްގެން ދިޔައީ ހިންގަމުންނެވެ.
ނަމަވެސް, އެ މައްސަލާގައި ބުނީ މި އަހަރުގެ މިހާތަނަށް ހޮސްޕިޓަލްތަކާއި ކްލިނިކްތަކުން ހިދުމަތް ހޯދުމަށް ދާ ދިވެހި ރައްޔިތުން، ޑޮކްޓަރަށް ދެއްކުމަށާއި ޓެސްޓްތައް ހެދުމަށް ލިބެމުންއައި އާސަންދަގެ ހިދުމަތް ދިނުން ހުއްޓައިލަމުންދާތީ އާއި، ބޭސްސިޓީއަށް ބޭސްދޫކުރުމުގައި ލިބެމުންއައި އާސަންދަގެ ހިދުމަތް ނުލިބި، އެ ކަންކަމަށް އަމިއްލަ އަތުން ހަރަދުކުރަންޖެހުމުގެ ކަންބޮޑުވުން އިތުރުވެފައިވާ ކަމަށެވެ.
ކުއްލި މައްސަލާގައި ބުނީ ގާނޫނު އަސާސީގައި ރަނގަޅު ފެންވަރުގެ ސިއްހީ ހިދުމަތްތައް ލިބުމަކީ ކޮންމެ ރައްޔިތަކަށް ލިބިގެންވާ އަސާސީ ހައްގެއް ކަމަށް ކަނޑައަޅައި، ދައުލަތުގެ ތަނަވަސްކަމާއި، ކުޅަދާނަކަން ހުރި މިންވަރަކަށް އެ ހައްގު ރައްޔިތުންނަށް ހޯދޭނޭ މަގު ތަނަވަސްކޮށްދޭން މަސައްކަތް ކުރަން ޖެހޭނެ ކަމަށެވެ.
އިޖްތިމާއީ ސިއްހީ އިންޝުއަރަންސްގެ ގައުމީ ނިޒާމުގެ ގާނޫނުގައި އާސަންދަ ހިންގުމަށް މާލީގޮތުން ދަތިވެއްޖެ ހާލަތްތަކުގައި އެކަމަށް ބޭނުންވާ ފައިސާ ހޯދުމަށް މާލީ ވުޒާރާގައި އެދުމުން އެ ވުޒާރާއިން އެކަން ހައްލުކޮށްދޭން ޖެހޭނެ ކަމަށް ކަނޑައަޅާފައިވާކަން ކުއްލި މައްސަލައިގައި ވަނީ ފާހަގަކޮށްފަ އެވެ.
އާސަންދައިގެ މަގްސަދު ކަމަށް ކުއްލި މައްސާލާގައި ފާހަގަކޮށްފައިވާ ނުކުތާތައް:
- ދިވެހިންނަށް ހަމަހަމަކަމާއެކު، ރަނގަޅު ފެންވަރުގެ އަސާސީ ސިއްހީ ހިދުމަތް ލިބިގަތުމުގެ ހައްގު ގާނޫނީގޮތުން ކަށަވަރުކޮށްދިނުން.
- ދިވެހިންނަށް ހަމަހަމަކަމާއެކު، ރަނގަޅު ފެންވަރުގެ އަސާސީ ސިއްހީ ހިދުމަތުގެ ހަރަދު ހަމަޖައްސައިދޭނެ އިޖްތިމާއީ ސިއްހީ އިންޝުއަރަންސްގެ ގައުމީ ނިޒާމެއް ގާނޫނީގޮތުން ގާއިމުކުރުން؛
- އިޖްތިމާއީގޮތުންނާއި، އިގްތިސާދީގޮތުންނާއި، އުމުރުގެގޮތުންނާއި، ދުޅަހެޔޮކަމުގެގޮތުން އާބާދީގެ ތަފާތު ގިންތިތަކުގެ މެދުގައި ރިސްކް ޕޫލްކޮށް، އެމީހެއްގެ އިގްތިސާދީ ހާލަތު ތަންދޭ މިންވަރަކުން ހިއްސާކުރާ ގައުމީ ނިޒާމެއް ގާއިމުކުރުން.
- ރަނގަޅު ފެންވަރުގެ އަސާސީ ހިދުމަތް ހޯދުމަށް އަމިއްލަ އަތުން ކުރަންޖެހޭ ހަރަދުތައް މަދުކޮށް، ސިއްހީ ހަރަދުތަކުގެ ސަބަބުން ކުރިމަތިވާ އިގްތިސާދީ އަދި އިޖްތިމާއީ ނިކަމެތިކަމުން ރާއްޖޭގެ ހުރިހާ ރައްޔިތުން ސަލާމަތްކުރުން؛
އާސަންދަ ނުލިބުމަކީ ތަކެތީގެ އަގުބޮޑުވުމާއެކު ދިރިއުޅުމުގެ ހަރަދުތައް އުފުލެމުންދާ އަދި ރައްޔިތުންގެ އަތްމަތި ދަތިވެފައިވާ ދަނޑިވަޅެއްގައި، ރައްޔިތުންނަށް ބަރުދާސްތު ނުކުރެވޭނެ ވަރުގެ އިތުރު ތަކުލީފެއް މުޅި އާބާދީއަށް ކުރިމަތިވެދާނެފަދަ ކަމެއް ކަމަށް ވެސް ކުއްލި މައްސަލާގައި ފާހަގަކޮށްފައިވެ އެވެ.
