މިލާން (ނޮވެމްބަރު 6) - އާސެނަލުން ޓީމެއްގެ ގޮތުގައި ކުރިއަށްދާނަމަ އެންމެ މުހިންމު ކަމަކީ ޗެމްޕިއަންސް ލީގުގައި، މިރޭ، އިންޓަ މިލާނާ ދެކޮޅަށް ކުޅޭ ފަދަ ވަރުގަދަ މެޗުތަކުން މޮޅުވުން ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
އިނގިރޭސި ޕްރިމިއާ ލީގުގައި އެންމެ ފަހުން ކުޅުނު ތިން މެޗުގައި ވެސް ނަތީޖާ ނުރެނެވި، އާސެނަލަށް ޕްރެޝަރު ކުރިމަތިވެފައިވާ މި ދަނޑިވަޅުގައި، އިޓަލީގެ އެންމެ ފަހުގެ ޗެމްޕިއަން، އިންޓަ މިލާން ދަނޑުގައި އެ ޓީމާ ބައްދަލުކުރަން އާސެނަލުން ވަނީ ތައްޔާރުވެފަ އެވެ.
އާޓެޓާ ބުނީ، ހުރިހާ ގޮތަކުން ބެލިޔަސް، އިންޓަ މެޗަކީ، އޭނާގެ ޓީމަށް ބޭނުންވާ ފަދަ ރަނގަޅު ޗެލެންޖެއް ކަމަށެވެ.
"އަހަރެމެން މި މެޗަށް މިލާނަށް މިއައީ މަސައްކަތް ކޮށްގެން މޮޅުވެވޭތޯ. އެ މީހުން (އިންޓަ) ދެ އަހަރު ކުރިން ޗެމްޕިއަންސް ލީގުގެ ފައިނަލުގައި ކުޅުނު، އެހެންވީމަ، މިއީ އަހަރެމެން ނަތީޖާ ނެރެގެން ޓީމެއްގެ ގޮތުގައި ކުރިއަށްދާން ލިބޭ ކަހަލަ މެޗެއް،" އާޓެޓާ ބުންޏެވެ.
އިންޓަ އިން އަންނަނީ އެ ޓީމުގެ ކޯޗު ސިމޯން އިންޒާގީގެ އިރުޝާދުގެ ދަށުން ރަނގަޅު ކުޅުމެއް ދައްކަމުން ކަމަށާއި އެކަމުގެ ކްރެޑިޓް ދޭން ޖެހޭ ކަމަށް އާޓެޓާ ވަނީ ބުނެފަ އެވެ.
އިންޓަ ދަނޑުގައި މި މެޗު ކުޅުނަސް އާސެނަލުން މަސައްކަތް ކުރާނީ އަމިއްލަ އިތުބާރު ރަނގަަޅުކުރެވޭފަދަ މޮޅު ކުޅުމެއް ދެއްކުމަށް ކަމަށް ވެސް އާޓެޓާ ބުނެފައިވެ އެވެ.
އާސެނަލްގައި އާޓެޓާގެ މަސައްކަތުގައި އެންމެ ބޮޑަށް ބައިވެރިވި، ސްޕޯޓިން ޑިރެކްޓަރު، އެޑޫ އެ ކްލަބް ދޫކޮށްލުމާ ބެހޭގޮތުން ސުވާލުކުރުމުން، އާޓެޓާ ބުނީ، ފުޓްބޯޅައިގައި ކަންކަން ބަދަލުވާނީ ވަރަށް އަވަހަށް ކަމަށާއި އެޑޫ އެ ކްލަބް ދޫކޮށްލުމަކީ ވެސް އެ ފަދަ ކަމެއް ކަމަށެވެ.
އަދި އާސެނަލުން މިހާރު ކުރިއަށްދަނީ އެ ކްލަބްގެ އެންމެން އެކުވެގެން ގެންގުޅޭ ޕްލޭނެއްގެ ތެރެއިން ކަމަށާއި އެޑޫ އަށް ފަހު، ދެން އެ މަގާމަށް ގެންނަ ފަރާތެއް ވެސް މި ޕްލޭނުން ކުރިއަށްދާނަމަ، ކްލަބް އޮތީ ރަނގަޅަށް ކަމަށް އާޓެޓާ ވަނީ ބުނެފަ އެވެ.
އާސެނަލާއި އިންޓަ ކުޅޭ މެޗު ފަށާނީ މިރޭ 1 ޖަހާއިރު އެވެ.
