ގަވާއިދާ ހިލާފަށް ރާއްޖެއަށް އެތެރެކުރާ ދުންފަތް ނައްތާލުމަށް ހޭދަވާ ހަރަދާއި، ނައްތާލުމާ ހަމައަށް ހިނގާ ހަރަދު، އެ ތަކެތި އެތެރެކުރާ ފަރާތަކުން ދައްކަންޖެހޭ ގޮތަށް ދުންފަތުގެ ބާވަތްތައް ޕެކެޓުކޮށް ލޭބަލް ޖެހުމާބެހޭ ގަވާއިދު ބަދަލުކޮށްފި އެވެ.
މިއަދު ގެޒެޓު ކުރި ގަވާއިދުގައި އިސްލާހު ގެނެސްފައި ވަނީ ތިންވަނަ މާއްދާއަށާއި 14 ވަނަ މާއްދާ އަށެވެ. އެ ގޮތުން ގެނައި އިސްލާހުގައި ވަނީ، ގަވާއިދާ ހިލާފަށް ރާއްޖެއަށް އެތެރެ ކުރާ ދުންފަތް ނައްތާލުމުގެ ބާރު، ހެލްތު ޕްރޮޓެކްޝަން އޭޖެންސީގެ އިތުރުން މޯލްޑިވްސް ކަސްޓަމްސް ސާވިސަސްއަށް ދީފަ އެވެ.
ގަވާއިދާ ހިލާފަށް ދުންފަތް އެތެރެ ކުރާ މީހުން ޖޫރިމަނާ ކުރުމުގެ ބާރު ހެލްތު ޕްރޮޓެކްޝަން އޭޖެންސީގެ އިތުރުން ފުލުހުންނާއި ވިޔަފާރިއާ ބެހޭ ވުޒާރާ (އިކޮނޮމިކް މިނިސްޓްރީ) އަށް ވެސް އާ ގަވާއިދުގެ ދަށުން ދީފައިވެ އެވެ.
ގަވާއިދާ ހިލާފަށް އެތެރެ ކުރާ ދުންފަތް ނައްތާލުމާއި ނައްތާލުމާ ހަމައަށް ހިނގާ ހަރަދު އެ އެތެރެ ކުރި ފަރާތަކުން ދައްކަންޖެހޭ ގޮތަށް ބަދަލު ގެނައީ 14 ވަނަ މާއްދާއަށް ގެނައި އިސްލާހުގެ ދަށުންނެވެ. މި މާއްދާގެ ދަށަށް ވަނީ ޕޯސްޓާއި ކޫރިއާގެ ޒަރީއާއިން ގެންނަ ތަކެއްޗާއި ދަތުރުވެރިން ގެންނަ ދުންފަތާ މެދު އަމަލު ކުރަންޖެހޭ ގޮތް ވެސް އިތުރު ކޮށްފަ އެވެ.
އެ ގޮތުން ޕޯސްޓާއި ކޫރިއާ މެދުވެރިކޮށް ނުވަތަ އޯޑަރުކޮށްގެން ވިޔަފާރީގެ ބޭނުމަށް ގަވާއިދާ ހިލާފަށް ދުންފަތުގެ ބާވަތްތައް ގެނެސްފި ހާލަތެއްގައި ޖޫރިމަނާ ކުރުމުގެ ބާރު ތަންފީޒީ އިދާރާތަކަށް ދީފައިވެ އެވެ.
