ޑޯޓްމަންޑް (ނޮވެމްބަރު 3) - ޖަރުމަނު ލީގުގައި ބޮރޫޝިއާ ޑޯޓްމަންޑުން 2-1 އިން އާރްބީ ލައިޕްޒިގު ބަލިކުރުމުން، ޔޫނިއަން ބާލިން އަތުން 3-0 އިން މޮޅުވި، ބަޔާން މިއުނިކަށް ލީގުގެ އެއް ވަނައިގައި ތިން ޕޮއިންޓުގެ ލީޑެއް ލިބިއްޖެ އެވެ.
ބަޔާން އެއް ވަނައިގައި އޮތީ ނުވަ މެޗުން 23 ޕޮއިންޓާ އެކު އެވެ. ދެ ވަނައިގައި އޮތް ލައިޕްޒިގަށް ވަނީ ނުވަ މެޗުން 20 ޕޮއިންޓް ލިބިފަ އެވެ. ތިން ވަނައިގައި އޮތް އައިންޓްރަކްޓް ފްރޭންކްފާޓަށް ނުވަ މެޗުން ވަނީ 17 ޕޮއިންޓް ލިބިފަ އެވެ. ހަތަރެއްގައި އޮތް އެންމެ ފަހުގެ ޗެމްޕިއަން، ލެވަކޫސަން އާއި ފަސް ވަަނައިގައި އޮތް ޑޯޓްމަންޑަށް ވަނީ ނުވަ މެޗުން 16 ޕޮއިންޓް ލިބިފަ އެވެ.
ރޭގެ މެޗުގައި ބަޔާނަށް ލީޑުނަގައިދިނީ ހެރީ ކޭންގެ ޕެނަލްޓީންނެވެ. ކިންގްސްލީ ކޯމަން ފުރަތަމަ ހާފު ނިމުމުގެ ކުރިން ޔޫނިއަން ބާލިން ކޮޅަށް ބަޔާންގެ ދެ ވަނަ ގޯލު ޖެހި އެވެ. ކޭން ވަނީ ދެ ވަނަ ހާފުގައި އިތުރު ލަނޑެއް ޖަހައި ބަޔާނަށް ތިން ޕޮއިންޓް ޔަގީންކޮށްދީފަ އެވެ. މި ދެ ގޯލާ އެކު، ޖަރުމަނު ލީގުގެ ލަނޑު ލިސްޓުގެ ކުރީގައި ކޭން އޮތީ 11 ގޯލު ޖަހައިގެންނެވެ.
މިދިޔަ ސީޒަނުގައި ބަޔާނާ ގުޅުނު ކޭން ވަނީ ލީގުގައި އެ ޓީމަށް މިހާތަނަށް ކުޅެދިން 41 މެޗުން 47 ގޯލު ޖަހައި، 13 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ފަހަކަށް އައިސް ފޯމު ގެއްލިފައި އޮތް ޑޯޓްމަންޑުން ރޭގެ މެޗުގައި ވަނީ ލައިޕްޒިގު ކައިރީ މޮޅަށް ކުޅެ ނަތީޖާ ނެރެފަ އެވެ. އެ ގޮތުން، ލައިޕްޒިގުން ބެންޖަމިން ސެސްކޯގެ ގޯލުން ލީޑުނަގާފައިވަނިކޮށް ޑޯޓްމަންޑް މޮޅުވީ، މެކްސިމިލިއަން ބައިއާ އާއި ސޭހޫ ގިރާސީ ޖެހި ގޯލުންނެވެ.
