ހިތްފަސޭހަކޮށްލަން ވަރަށް ގިނަ ބަޔަކު ބޭނުން ކުރާ، މިއުޒިއަމް ކުރިމަތީގައި އޮންނަ ކުޑަ ހިއްތަން މައިޒާނުގައި ހުންނަ، ހިމާޔަތްކޮށްފައިވާ ރީތި ގަހަށް ގެއްލުންވާ ގޮތަށް ފުޑް ކިއޯސްކެއް ހަދާ މައްސަލައެއް ފެންމަތިވެއްޖެ އެވެ.
ހުއްދަ ނުހޯދައި އެ މަސައްކަތް ކުރިއަށްގެންދާތީ އެންވަރަމެންޓަލް ޕްރޮޓެކްޝަން އެޖެންސީއިން ވަނީ މިހާރު އެ މަސައްކަތް ހުއްޓުވައިފަ އެވެ. އެ މަސައްކަތް ކުރިއަށް ނުގެންދަން މާލޭ ސިޓީ ކައުންސިލުން ވެސް އަންގާފައިވާކަން އެނގިފައިވެ އެވެ.
"އަދަދު" އިން މިއަދު ގޮސް ބެލިއިރު، އެ މަސައްކަތް ކުރިއަށް ގެންދާ ކުންފުނިން ވަނީ ރީތި ގަސް ބުޑަށް ދަގަނޑުތަކެއް ޖަހައިފަ އެވެ. ގަސް ވަށައިގެން އެ ދަގަނޑުތައް ޖަހާފައި ހުއްޓެވެ.
ރީތި ގަސް ކައިރިއަށް ދަގަނޑެއް ޖަހާފައި: އެ ތަން ކުއްޔަށް ދިނީ 10 އަހަރުގެ މުއްދަތަކަށް -- ފޮޓޯ: މިރާޝް ނާޝިމް / އަދަދު
ހިއްތަން މައިޒާނުގައި ކެފޭއެއް ހަދަން ހަވާލު ކުރީ މާލޭ ސިޓީ ކައުންސިލުންނެވެ. އެ ތަނުގައި ކެފޭއެއް އަޅަން ހަވާލު ކުރީ ކައުންސިލުން ފާސް ކުރުމެއް ނެތި އެވެ.
އެތަނުގައި ފުޑް ކިއޯސްކެއް ހަދަން ކެފޭއެއް ހަދަން ދީފައި ވަނީ 10 އަހަރުގެ މުއްދަތަކަށެވެ. ނަމަވެސް އެތަން ކުއްޔަށް ދިން އަގެއް ނޭނގެ އެވެ.
ގަހަށް ގެއްލުންވެދާނެ ގޮތަކަށް އަދި އެ ހިސާބުގެ މާހައުލު ބަދަލުވާ ގޮތަށް ކެފޭއެއް ހަދަން ކުއްޔަށް ދިނުމުން ކުރީގެ ހެރިޓޭޖް މިނިސްޓަރު ޔުމްނާ މައުމޫން ވަނީ ކަންބޮޑުވުން ފާޅުކޮށްފަ އެވެ.
"އެއީ ވަރަށް މުސްކުޅި ގަހެއް. އެހާ ރީތި، ބޮޑު ގަހެއް ހަލާކުކޮށްލައިގެން ނުވާނެ. އަދި މުއިޒިއަމް ގެ ވިއު ގެއްލޭ ގޮތަށް އެތަނުގައި ކެފޭއެއް ހެދުމަކީ ވެސް ރަނގަޅު ކަމެއް ނޫން. މިފަދަ ޕްރޮޖެކްޓުތައް ކުރިއަށްގެންދާއިރު މާލޭގައި ދިރިއުޅޭ ރައްޔިތުންގެ ހިޔާލު ހޯދުން ވަރަށް މުހިންމު،" މި ނޫހާ ވާހަކަ ދައްކަވަމުން ޔުމްނާ ވިދާޅުވި އެވެ.
