މިއުނިކް (ނޮވެމްބަރު 1) - ފުޓްބޯޅައިގައި ކަންކަން ހިނގާ ގޮތްގޮތަށް ބަލާއިރު ބައެއް ހާލަތްތަކުގައި ޓީމަކާ ހަވާލުވެ ހުންނަ ކޯޗަކީ އެންމެ އެކަނިވެރި މީހާ ކަމަށް ޖަރުމަނުގެ މަޝްހޫރު ކޯޗު ޔާގަން ކްލޮޕް ބުނެފި އެވެ.
މިދިޔަ ސީޒަނަށް ފަހު، ލިވަޕޫލްގެ ކޯޗުކަން ނުވަ އަހަރަށް ފަހު ދޫކޮށްލި، ކްލޮޕް، 57، އަށް އެކި ޓީމުތަކާ ހަވާލުވުމުގެ ވަޒީފާ ލިބުނު ނަމަވެސް އޭނާ ވަނީ އެ ފުރުސަތުތައް ދޫކޮށްލައިފަ އެވެ. މީގެ 23 ދުވަސް ފަހުން ކްލޮޕް ހަވާލުވީ ރެޑްބުލް ސޮކާގެ ގްލޯބަލް ހެޑަކަށެވެ. އެ ގޮތުން، ރެޑްބުލް ގްރޫޕްގެ ފުޓްބޯޅަ އޮޕަރޭޝަންގެ އިސް މަގާމުގައި ކްލޮޕް މަސައްކަތް ފަށާނީ އަންނަ އަހަރުގެ ޖެނުއަރީ މަހު އެއް ވަނަ ދުވަހުން ފެށިގެންނެވެ.
ކްލޮޕް، ރެޑްބުލްގެ މަގާމަކާ ހަވާލުވުމުން ޖަރުމަނުގައި އޭނާ ކޯޗުކޮށްދިން ދެ ޓީމު ކަމަށްވާ ބޮރޫޝިއާ ޑޯޓްމަންޑާއި މައިންޒްގެ ސަޕޯޓަރުން ވަނީ ނުރުހުންފާޅުކޮށްފަ އެވެ. އެއީ، އެ ދެ ޓީމާ ވާދަވެރި ކްލަބް، ރެޑްބުލްގެ ޖަރުމަނު ޓީމު، އާރްބީ ލައިޕްޒިގުގެ މަަސައްކަތުގައި ވެސް ކްލޮޕް ދެން އުޅޭނެތީވެ އެވެ.
"އަހަރެން ބޭނުމެއް ނޫން އެހެން ބައެއްގެ ފައި މައްޗަށް ފައިން އަރާކަށެއް. އަހަރެން އަބަދުވެސް ކުރީގެ ކްލަބްތައް ދެކެ ލޯބިވޭ. އެންމެން އުފާވާނެ ގޮތަކަށް އަބަދު ނުއެއް އުޅެވޭނެ ކަންނޭނގެ،" ކްލޮޕް ބުންޏެވެ.
"އަހަރެން އެއްވެސް މަަސައްކަތެއް ނުކޮށް ހުންނާނެ ކަމަށް ނުބެލެވޭނެ، އެހެންވީމަ ޔަގީންވީ ޓީމެއްގެ ބެންޗަކަށް ނުދާން. އެއީ އެ މަސައްކަތް ނިމިފައި އޮތީމަ، ދެން ރެޑްބުލްގެ ހުށަހެޅުން ރަނގަޅު، ދެން، އަހަރެން އަބަދުވެސް ގަބޫލުކުރަން އެންމެ އެކަނިވެރި ވަޒީފާތަކުގެ ތެރޭގައި ކޯޗުންގެ މަސައްކަތް ހިމެނޭ،"
އޭނާ ބުނީ ޓީމެއް މޮޅުވާއިރު، ކްރެޑިޓް ލިބެނީ ކުޅުންތެރިންނަށް ކަމަށާއި ބަލިވާއިރު، ޒިންމާ ނަގަން ޖެހެނީ ކޯޗުން ކަމަށެވެ. އަދި އެ ފަދަ ގޮތަކަށް ފުޓްބޯޅައިގައި ކަންކަން އޮންނައިރު ބަދަލުވަމުން އަންނަ ފުޓްބޯޅައިގެ ކަންކަމުގެ ފިލޯސަފީ ބިނާކުރުމުގެ ކަންކަމުގައި ރެޑްބުލްއާ އެކު މަސައްކަތް ކުރެވިދާނެ ކަމަށެވެ.
ރެޑްބުލް އިން އަންނަނީ، އޮސްޓްރިއާގައި އާރްބީ ސަލްޒްބާގު، ޖަރުމަނުގައި އާރްބީ ލައިޕްޒިގު، އެމެރިކާގައި ނިއު ޔޯކް ރެޑްބުލް އަދި ބްރެޒިލްގައި އާރްބީ ބްރަގަންޓީނޯގެ ނަމުގައި ޓީމު ހިންގަމުންނެވެ. އަދި މި އަހަރު ލީޑްސް ޔުނައިޓެޑްގެ މެއިން ޖާޒީގެ ސްޕޮންސަރެއްގެ ގޮތުގައި ވެސް ރެޑްބުލް އިން އަންނަނީ މަސައްކަތް ކުރަމުންނެވެ.
ރެޑްބުލް އިން ބުނެފައިވަނީ ދުވަހުން ދުވަހަށް ކުރަން ޖެހޭ މަސައްކަތުގައި ކްލޮޕްގެ ބައިވެރިވުމެއް ނޯންނާނެ ކަމަށެވެ. އެކަމަކު، ކްލޮޕްގެ ޒިންމާތައް އޮންނާނީ، ކުޅުމުގެ ފިލޯސަފީ، ޓްރާންސްފާ ސްޓްރެޓަޖީ އަދި ކޯޗިން ޑިވެލޮޕްމަންޓާ ގުޅިފައި ކަމަށެވެ.
ކްލޮޕްގެ ވަޒީފާގެ ޒިންމާއާ އޭނާ ރަސްމީކޮށް ހަވާލުވެ، މީޑިއާއާ ބައްދަލުކުރުން އޮތީ ޖެނުއަރީގައި ކަމަށް ރެޑްބުލް އިން މައުލޫމާތު ދެ އެވެ.
