ރާއްޖެއިން ބޭރުގައި ކިޔަވާ ދިވެހި ދަރިވަރުންގެ ތެރެއިން ކާޑު ލިމިޓް 1،200 ޑޮލަރަށް ބޮޑު ކުރަން ބޭނުންވާ ދަރިވަރުންނަށް ޕޯޓަލްއެއް މެދުވެރިކޮށް އެ ފުރުސަތު ބީއެމްއެލް އިން ހުޅުވާލައިފި އެވެ.
ބީއެމްއެލްއިން ބުނީ ކާޑު ލިމިޓް ބޮޑު ކުރަން ބޭނުންވާ ދަރިވަރުން ޕޯޓަލް މެދުވެރިކޮށް ޕާސްޕޯޓް ކޮޕީއަކާއި، ސްޓޫޑެންޓް ވިސާގެ އިތުރުން ކިޔަވާ ޔުނިވާސިޓީގެ ލިޔުމެއް ހުށަހެޅުމުން ލިމިޓް ބޮޑުކޮށްދޭނެ ކަމަށެވެ.
ލިމިޓް ބޮޑުކުރަން އެދޭތާ އެއް ދުވަސް ތެރޭގައި ޕްރޮސެސް ފުރިހަމަ ކޮށްދޭނެ ކަމުގެ ޔަގީންކަން ބީއެމްއެލްއިން ވަނީ ދީފަ އެވެ. އަދި ޕޯޓަލް މެދުވެރިކޮށް ރިކުއެސްޓްގެ އަޕްޑޭޓް ވެސް ފަސޭހަކަމާ އެކު ބެލޭނެ ކަމަށް އެ ބޭންކުން ބުންޏެވެ.
އޭގެ އިތުރުން، ކަނޑައަޅާފައިވާ 1،200 ޑޮލަރުގެ ތެރެއިން 250 ޑޮލަރު ދަރިވަރު އުޅޭ ގައުމު ނޫން އެހެން ގައުމެއްގައި ބޭނުން ކުރެވެ އެވެ.
ބީއެމްއެލްގެ ސީއީއޯ މުހައްމަދު ޝަރީފް ކުރިން ވިދާޅުވީ ޑޮލަރުގެ ތާށިކަން ދިމާވެފައި އޮތް ދަނޑިވަޅުގައި ދަރިވަރުންނަށް ދިމާވާ ދަތިތައް ވެސް ބަލައިގަންނަ ކަމަށާއި މިގޮތުން ގެނެވުނު ބަދަލާ އެކު ދަރިވަރުންނަށް އިތުރު ފަސޭހަތަކެއް ވެގެންދާނެ ކަމަށެވެ.
ބީއެމްއެލްއިން ކުރިން ބޭރުގައި ކިޔަވާ ކުދިންނަށް ދޭ ޑޮލަރުގެ ލިމިޓަކީ 750 ޑޮލަރެވެ.
ބޭންކުތަކުން ކަނޑައަޅާފައި އޮންނަ ޑޮލަރު ލިމިޓު އުވައިލުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ. ނަމަވެސް އެ ވައުދު ފުއްދޭނީ ކޮން އިރަކު ކަމެއް މިހާތަނަށް ވިދާޅުވެފައެއް ނުވެ އެވެ.
ރާއްޖެއިން ބޭރުގައި 1،800 އަށްވުރެ ގިނަ ދަރިވަރުން އަންނަނީ މަތީ ތައުލީމް ހާސިލް ކުރަމުންނެވެ. އޭގެ ތެރޭގައި ސްޓޫޑެންޓް ލޯނުގައި 1،400 އަށްވުރެ ގިނަ ދަރިވަރުން ތައުލީމް ހާސިލް ކުރަމުން އަންނައިރު، 400 އަށްވުރެ ގިނަ ދަރިވަރުން އަންނަނީ ސްކޯލާޝިޕްތަކުގައި ކިޔަވަމުންނެވެ.
