މި ސަރުކާރު ހަމަ މަގަށް އަޅުވައި، ދާ މިސްރާބު ހުއްޓުވަން ޕާޓީތަކާއި އެންޖީއޯތަކުގެ އިތުރުން ރައްޔިތުން ގުޅިގެން މަސައްކަތް ކުރަން ޖެހޭ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއިލް ރޭ ވިދާޅުވެއްޖެ އެވެ.
އެމްޑީޕީގެ ހަރުގެ ޖަލްސާގައި ވާހަކަ ދައްކަވަމުން ފައްޔާޒް ވިދާޅުވީ އެމްޑީޕީން ގަބޫލު ކުރާ ސިޔާސަތުތައް ގެންގުޅޭ ހުރިހާ ފަރާތްތަކުން އެ ޕާޓީއާ ގުޅިގެން ސަރުކާރު ދާ މިސްރާބު ނުހުއްޓުވިއްޖެ ނަމަ، މިނިވަންކަމާއެކު މި ގައުމުގައި ދެން ނޫޅެވޭނެ ކަމަށެވެ.
"އަޅުގަނޑުމެންގެ މި ގަބޫލުކުރާ އުސޫލުތައް އެއީ ރައްޔިތުންގެ ބާރުވެރިކަމެއް މި ގައުމުގައި އޮންނަން ޖެހޭ ކަމާއި، އަދުލް އިންސާފު އޮންނަން ޖެހޭ ކަމާއި، ހަމަހަމަކަން އޮންނަން ޖެހޭ ކަމާއި، ހުރިހާ އެންމެންނަށް ފުރުސަތު އޮންނަން ޖެހޭ ކަމާއި، ދިވެހި ރައްޔިތުންނަށް ތާހިރު ދިރިއުޅުމެއް ހޯދައިދޭން ޖެހޭ ކަމަަށް ގަބޫލުކުރާ ސިޔާސަތުތަކެއް ގެންގުޅޭ އެންމެހާ ދިވެހި ރައްޔިތުން، އެންމެހާ ޕާޓީތައް، އެންމެހާ އެންޖީއޯތައް އެބަޖެހޭ މި ސަރުކާރު ހަމަ މަގަށް އަޅުވައި، މި ސަރުކާރު މިދާ މިސްރާބުން ހުއްޓުވަން ޖެހޭ،" ފައްޔާޒް ވިދާޅުވި އެވެ.
ރާއްޖޭގެ އަދުލްއިންސާފު ގާއިމު ކުރުމަށް އަދި ކުރިއަށް އޮތް ޖީލުތަކަށް މިނިވަންކަމާއި އަދުލުވެރިކަން ދެމެހެއްޓުމަށް އެންމެން އެކައްޗެއް ކިޔަން ޖެހޭ ކަމަށް ވެސް ފައްޔާޒް ވިދާޅުވި އެވެ.
އޭގެ އިތުރުން ފައްޔާޒް ވިދާޅުވީ ހިތްހަމަނުޖެހުންތައް އެއްފަރާތްކޮށް، ބައިވެރިވާން ތިބި ހުރިހާ އެންމެންނާ އެއްކޮށް ދާއިމަށް ދެމިގެންދާ އަނިޔާވެރިކަމެއް ހުއްޓުވުމަށް މަސައްކަތް ކުރަން ޖެހޭ ކަމަށެވެ.
ފައްޔާޒް މިހެން ވިދާޅުވެފައިވާއިރު ދަ ޑިމޮކްރެޓްސްގެ ރައީސް ހަސަން ލަތީފު ވެސް ވަނީ ދާދި ފަހުން މި ސަރުކާރު ޖަވާބުދާރީ ކުރުވުމަށް އިދިކޮޅު ސިޔާސީ ޕާޓީތައް ގުޅިގެން މަސައްކަތް ކުރުމުގެ މުހިންމު ކަމުގެ ވާހަކަ ދައްކަވާފަ އެވެ.
ހަސަން ލަތީފް ވިދާޅުވީ ސަރުކާރުގެ މިސްރާބު މިވަގުތު ހުރީ ވަރަށް ގޯސްކޮށް ކަމަށާއި އެކަން ހަމަ މަގަށް އެޅުވުމަށް އެމްޑީޕީއާ އެކު މަސައްކަތް ކުރެވޭނެ ގޮތްތަކެއް ހޯދަން ޖެހޭ ކަމަށެވެ.
އެމްޑީޕީ އާއި ޑިމޮކްރެޓްސް އެކުގައި މަސައްކަތް ކުރުމަށް މިހާތަނަށް ރަސްމީކޮށް އެއްވެސް މަޝްވަރާއެއް ކޮށްފައި ނުވެ އެވެ. ނަމަވެސް ނުރަސްމީކޮށް މަޝްވަރާތައް ކުރެވެމުންދާ ކަމަށް މައުލޫމާތު ލިބެ އެވެ.
