މަހުގެ އަގު 20ރ. އިން މަތީގައި ހިފެހެއްޓުމަކީ ރައީސް ޑރ. މުހައްމަދު މުއިއްޒުގެ ވައުދެއް ނަމަވެސް އެ ވައުދާ ހިލާފަށް މަހުގެ އަގު ކުޑަ ކުރީ ހެޔޮ ނިޔަތުގައި، މަސްވެރިކަމުގެ ލާބައަށް ކަމަށް މަސްވެރިކަމާ ބެހޭ މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.
ފިޝަރީޒް މިނިސްޓަރާ ބައެއް ސުވާލުތައް ކުރަން މިއަދު މަޖިލީހަށް ހާޒިރު ކުރުމުން ދެއްކެވި ވާހަކަތަކުގައި ޝިޔާމް ވިދާޅުވީ މަހުގެ އަގު ކަނޑައަޅަންޖެހޭނީ ދުނިޔޭގެ ބާޒާރުގެ އަގުތަކަށް ބެލުމަށްފަހު ކަމަށެވެ. އެހެން ނޫން ނަމަ މަސްވެރިކަމުގެ އިންޑަސްޓްރީ ރާއްޖޭގައި ނުހިފެހެއްޓޭނެ ކަމަށް ވެސް އޭނާ ވިދާޅުވި އެވެ.
"އިރާދަކުރެއްވިއްޔާ މަސްވެރިންނަށް ބަރާބަރަށް ފައިސާ ދެމުން މި ސަރުކާރުން މި ދަނީ. މަހުގެ އަގު އެއީ ދުނިޔޭގެ ބާޒާރާ ގުޅިގެން ކަނޑައެޅޭ އަގަކަށް ވާންޖެހޭނެ. އެހެން ނޫނިއްޔާ ދެމެހެއްޓެނިވި ގޮތެއްގައި ދިވެހިރާއްޖޭގައި މަސްވެރިކަމުގެ ސިނާއަތެއް ނޯންނާނެ. މަހުގެ އަގަށް އެއިރު ބަދަލު އަޅުގަނޑުމެން ނުގެނައިނަމަހީ ދިވެހިރާއްޖޭގައި މި ސިނާއަތެއް ނޯންނާނެ، މިފްކޯ ކިޔާ ކުންފުންޏެއް، [ހިންގަން] ދިވެހި ރައްޔިތުންގެ ހުރިހާ ޓެކްސް ފައިސާއެއް މިފްކޯ ހިންގަން ހޭދަކޮށްގެން އަޅުގަނޑުމެން ތިބެންޖެހޭނީ،" ޝިޔާމް ވިދާޅުވި އެވެ.
ފިޝަރީޒް މިނިސްޓަރު ވިދާޅުވީ މަހުގެ އަގަށް ސަރުކާރުން ބަދަލުނުގެނެއި ނަމަ މި އަހަރު ވެސް 1.2 ބިލިއަން ރުފިޔާގެ ސަބްސިޑީ މިފްކޯއަށް ދޭންޖެހުނީސް ކަމަށެވެ. އެހެންކަމުން، މަހުގެ އަގު ތިރި ކުރުމަކީ ރައީސް ޑރ. މުހައްމަދު މުއިއްޒު ހެޔޮ ނިޔަތުގައި ގެނައި ބަދަލެއް ކަމަށް ޝިޔާމް ވިދާޅުވި އެވެ.
"[މަހުގެ އަގު ކުޑަ ކުރުމަކީ] އެއީ ބަހަނާއެއް ނޫން އެއީ ރަނގަޅު ނިޔަތެއްގައި ރައީސް ޑރ. މުހައްމަދު މުއިއްޒު ނިންމެވި ވަރަށް ރަނގަޅު ނިންމެވުމެއް. އަދި މަސްވެރި އާއިލާތަކާއި މުޅި މަސްވެރި އިންޑަސްޓްރީގެ ލާބައަށް ނިންމެވި ނިންމެވުމެއް،" މިނިސްޓަރު ވިދާޅުވި އެވެ.
އޭގެ އިތުރުން، މިއަދުގެ ޖަލްސާގައި ވާހަކަ ދައްކަވަމުން ޝިޔާމް ވިދާޅުވީ 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމަށް ސަރުކާރުން ވި ވައުދަށް ނުފިލައި، އެކަން ތަންފީޒު ކުރައްވާނެ ކަމަށެވެ.
"48 ގަޑިއިރު ތެރޭގައި މަސްވެރިންނަށް ފައިސާ ދިނުމުގެ ވައުދަކީ މި ސަރުކާރުގެ ވައުދެއް. އެއީ އަޅުގަނޑުމެން ފިލާނެ ވައުދެއް ނޫން. އެއީ ރައީސް ޑރ. މުހައްމަދު މުއިއްޒު އިރާދަކުރެއްވިޔާ ތަންފީޒު ކުރައްވާނެ ވައުދުފުޅެއް،" އޭނާ ވިދާޅުވި އެވެ.
މި ސަރުކާރު ވެރިކަމަށް އައިއިރު، މަސް ކިލޯއެއްގެ އަގު އުޅުނީ 22ރ. ގަ އެވެ. ނަމަވެސް ސަރުކާރުން ވަނީ މަސް ގަންނަ އަގު ވަރަށް ބޮޑަށް ތިރިކޮށްލައިފަ އެވެ. މިހާރު ގަނޑުކުރި މަސް ކިލޯއެއް މިފްކޯއަށް ގަންނަނީ 16ރ. އަށެވެ. އަދި ގަނޑުނުކުރާ މަސް ކިލޯއެއް ގަންނަނީ 14ރ. އަށެވެ.
މަހުގެ އަގު ސަރުކާރުން ދަށް ކުރި ނަމަވެސް ކިލޯއެއް 20ރ. އިން މަތީގައި ހިފެހެއްޓުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
"އެގޮތުން އަޅުގަނޑު ދަންނަވާލަން ބޭނުންވަނީ ދުނިޔޭގެ ބާޒާރުގައި މަސް ގަންނަން ހުންނަ އަގުތަކަށް ރިއާޔަތްކޮށް، އަޅުގަނޑުމެންގެ ސިޔާސަތަކަށް ވާނ،ީ އަޅުގަނޑުމެން ގަސްތުކުރާ ގޮތަކ،ީ ރާއްޖޭގައި މަސް ގަންނ،ަ ރޯމަސް ގަންނަ އެންމެ ދަށް އަގު 20 ރުފިޔާއަށް ހެދުން. އެއީ އަޅުގަނޑުމެން ގަސްދުކުރާ ގޮތް ކަން އަޅުގަނޑު އިއުލާންކުރަން،" އޯގަސްޓު 19، 2023، ގައި މ. ދިއްގަރުގައި ވާހަކަ ދައްކަވަމުން ރައީސް ވިދާޅުވެފައިވެ އެވެ.
