ޕެރިސް (އޮކްޓޫބަރު 29) - ފްރާންސް ފުޓްބޯލް މެގަޒިން އިން ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް، މެންޗެސްޓާ ސިޓީގެ ސްޕެއިން މިޑްފީލްޑަރު، ރޮޑްރީގޯ ހޯދިއިރު، ރެއާލް މެޑްރިޑްގެ އެއްވެސް މީހަކު ހަފްލާ އަށް ހާޒިރެއްނުވެ އެވެ.
ރެއާލް މެޑްރިޑުން މި ހަފްލާ ބޮއިކޮޓްކުރީ، އެ ޓީމަށް ކުޅޭ ބްރެޒިލްގެ ތަރި، ވިނީޝިއުސް ޖޫނިއާ އަށް ބެލޮންޑިއޯ ނުދޭން ނިންމުމުން ކަމަށް ސްޕެއިނާއި ދެކުނު އެމެރިކާގެ މީޑިއާ ރިޕޯޓްތައް ބުނެ އެވެ. އަދި ވިނީޝިއުސް އަށް މި އެވޯޑް ނުދެނީ، ރޭންކިން އިން އެއް ވަނަ ލިބުނު ނަމަވެސް، ފުޓްބޯޅައިގެ ބޭރުގެ ބައެއް ކަންކަމަށް ބަލައިފައި ކަމަށެވެ.
ރޮޑްރީ މި އެވޯޑް ހޯދީ ވިނީޝިއުސްގެ އިތުރުން ރެއާލްގެ ދެ ކުޅުންތެރިންނާ ވާދަކޮށެވެ. އެއީ، ސްޕެއިނުގެ ޑިފެންޑަރު ޑެނީ ކާވަހާލް އާއި އިނގިރޭސި މިޑްފީލްޑަރު، ޖޫޑް ބެލިންހަމް އެވެ.
މިދިޔަ ސީޒަނުގައި ރޮޑްރީ ވަނީ މެންޗެސްޓާ ސިޓީއާ އެކު، އިނގިރޭސި ޕްރިމިއާ ލީގާއި ސްޕެއިނާ އެކު ޔޫރޯ ފުޓްބޯޅަ މުބާރާތް ކާމިޔާބުކޮށްފަ އެވެ. ރޮޑްރީ އަށް ޔޫރޯ ފައިނަލުގައި އަނިޔާވެގެން ބަދަލުކުރަން ޖެހުނު ނަމަވެސް މުބާރާތުގެ އެންމެ މޮޅު ކުޅުންތެރިޔާގެ މަގާމު ލިބުނެެވެ. އެކަމަކު، ޕްރިމިއާ ލީގުގެ މޮޅު ކުޅުންތެރިޔާގެ ނޮމިނީސް ތެރޭގައި ވެސް ރޮޑްރީ ނުހިމެނެެ އެވެ.
ރޮޑްރީ، 28، ގެ ކަކުލަށް ލިބިފައިވާ އަނިޔާގެ ސަބަބުން އޭނާ އަށް ވަނީ ސީޒަން ނިމިފަ އެެވެ. ކަކުލަށް އަނިޔާވީ މިދިޔަ މަހު އާސެނަލާ އެކު ކުޅުުނު މެޗުގަ އެވެ.
މެޗަކުން ބަލިނުވެ ރޮޑްރީ ވަނީ 74 މެޗު (475 ދުވަސް) ފުރިހަމަކޮށްފަ އެވެ. އޭނާ އަކީ ބެލޮންޑިއޯ އެވޯޑް ހޯދި ފުރަަތަމަ ޑިފެންސިވް މިޑްފީލްޑަރެވެ. އަދި 1960 ވަނަ އަހަރު ބާސެލޯނާގެ ލުއިސް ސުއަރޭޒް، ބެލޮންޑިއޯ ހޯދި ފަހުން އެ އެވޯޑް ހާސިލްކުރި ފުރަތަމަ ސްޕެއިން ކުޅުންތެރިޔާ އެވެ.
ރޮޑްރީ އަކީ އިނގިރޭސި ކްލަބަކަށް ކުޅެމުން ބެލޮންޑިއޯ ހޯދި ހަތް ވަނަ ކުޅުންތެރިޔާ އެވެ. އެކާވީސް ވަނަ ގަރުނުގައި އެކަން ހާސިލްކުރީ 2001 ވަނަ އަހަރު ލިވަޕޫލަށް ކުޅުނު މައިކަލް އޯވެން އާއި 2008 ވަނަ އަހަރު މެންޗެސްޓާ ޔުނައިޓެޑަށް ކުޅުނު ކްރިސްޓިއާނޯ ރޮނާލްޑޯގެ އިތުރުން މި ފަހަރު ރޮޑްރީ އެވެ.
ބެލޮންޑިއޯ އިން ހޮވާ އެންމެ މޮޅު އަންހެން ކުޅުންތެރިޔާގެ މަގާމު މި ފަހަރު ވެސް ހޯދީ ސްޕެއިނުގެ އައިޓާނާ ބޮންމާޓީ އެވެ. އޭނާ މި ވަނީ ޖެހިޖެހިިގެން ދެ ފަހަރު މި މަގާމު ހޯދައިފަ އެވެ. އެންމެ މޮޅު ކޯޗަކަށް ހޮވުނީ ރެއާލްގެ ކާލޯ އަންޗެލޮޓީ އާއި ޗެލްސީގެ ކުރީގެ ކޯޗު އެމާ ހަޔެސް އެވެ.
އެންމެ މޮޅު 21 އަހަރުން ދަށުގެ ކުޅުންތެރިއަކަށް ބާސެލޯނާގެ ލަމީން ޔަމާލް ހޮވުނުއިރު، އެންމެ މޮޅު ކީޕަރަށް ދޭ ޔަޝީން ޓްރޮފީ ހޯދީ އެސްޓަން ވިލާގެ އެމިލިއާނޯ މާޓީނޭޒް އެވެ.
