މި އަހަރަށް ފާސްކުރި ބަޖެޓުގައި ހަރަދު ކުޑަކުރަން ހުށަހެޅި ސިޔާސަތުތައް އިތުރަށް ލަސްނުކޮށް، މި ދަނޑިވަޅުގައި ވެސް ސަރުކާރުގެ ހަރަދުތައް ކުޑަކުރުމަށް އަންނަ އަހަރުން ފެށެންވާއިރަށް އެ ސިޔާސަތުތައް ތަންފީޒުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
ދައުލަތުގެ ހަރަދުތައް ކުޑަކުރުމުގެ ގޮތުން މި އަހަރުގެ ބަޖެޓުގައި ކަނޑައެޅި ސިޔާސަަތުތަކުގެ ތެރޭގައި އެންމެނަށް ދެމުންދާ ކަރަންޓާއި ތެލާއި ކާޑުގެ އިތުރުން ނަރުދަމާ ސަބްސިޑީ ބޭނުން ޖެހިފައިވާ މީހުންނަށް ދޭ ގޮތަށް ހެދުމާއި އާސަންދަ ވެސް ބޭނުން ޖެހިފައިވާ މީހުންނަށް ދޭ ގޮތަށް ހެދުން ހިމެނެ އެވެ.
ސަރުކާރުން މި ކަންކަން ތަންފީޒުނުކުރެވުމަކީ މި އަހަރަށް ފާސްކުރި 49.9 ބިލިއަން ރުފިޔާގެ ބަޖެޓަށް 5.1 ބިލިއަން ރުފިޔާ ސަޕްލިމެންޓު ކުރަން ޖެހުނު މައިގަނޑު އެއް ސަބަބެވެ. ފިނޭންސް މިނިސްޓަރު މޫސާ ޒަމީރު ރައްޔިތުންގެ މަޖިލީހަށް ބަޖެޓު ހުށަހަޅުއްވަމުން ދެއްވި ބަޔާނުގައި ވެސް މި ނުކުތާ ފާހަގަކުރައްވާފައި ވެ އެވެ.
މި ސަޕްލިމެންޓަރީ ބަޖެޓަށް ދިން ލަފާގައި އެމްއެމްއޭއިން ބުނީ، މި އަހަރުގެ ބަޖެޓަށް ލަފާ ދިން އިރުގައި ވެސް ހަރަދު ކުޑަކުރުމުގެ ސިޔާސަތުތައް ތަންފީޒުކުރަން ހުރަސްތަކެއް ހުރި ކަމަށް ފާހަގަކޮށްފައިވާ ކަމަށެވެ. އޭރު ވެސް އެމްއެމްއޭއިން ލަފާ ދިނީ ދަތިތައް ހުރި ނަމަވެސް، ވީހާ ވެސް އަވަހަކަށް އެ ސިޔާސަތުތައް ތަންފީޒުކުރުމަށެވެ.
އޭގެ އިތުރުން، ސަބްސިޑީގެ ސިޔާސަތު ތަންފީޒުކޮށް ޓާގެޓުކުރުމަށް ބޭނުންވާ މުހިންމު މައުލޫމާތު އެއްކުރެވޭ ސާވޭއަކީ 2019 ގައި ތައްޔާރުކުރި ހައުސްހޯލްޑް އިންކަމް އެންޑް އެކްސްޕެންޑިޗާ ސާވެ އެވެ. އެމްއެމްއޭ އިން ބުނީ އޭގައި ހުރި މައުލޫމާތު އަދާހަމަ ކުރުމަށް ޓަކައި އެ ސާވެ އަލުން ހިންގުން އަވަސް ކުރުމަކީ މުހިންމު ކަމެއް ކަމުގައި އެ އޮތޯރިޓީން ދެކޭ ކަމަށެވެ.
ހަމަ އެގޮތަށް ސަބްސިޑީ ޓާގެޓޫ ކުރުމުގެ ކުރިން އެ ހުރިހާ މައުލޫމާތެއް އެއް ތަނަކުން ލިބޭނެ ފަދަ ސިިސްޓަމެއް ނުވަތަ "މީންސް ޓެސްޓިން ސިސްޓަމެއް" ގާއިމުކުރުމުގެ މަސައްކަތް އަވަހަށް ނިންމާ، އެ ސިޔާސަތު ވީހާ ވެސް އަވަހަކަށް ތަންފީޒު ކުރަން ސަރުކާރަށް ލަފާއަރުވާފަ އެވެ.
ހަރަދު ކުޑަކުރުމުގެ ސިޔާސަތުތައް ތަންފީޒުނުކުރެވުނީ، ސަރުކާރުން ބުނާ ގޮތުގައި، އެ ސިޔާސަތުތައް ތަންފީޒުކުރަން ކުރަން ޖެހޭ މަސައްކަތްތައް ކުރީ ސަރުކާރުން ނުކޮށް އޮތުމުންނެެވެ. އެ ގޮތުން އެކަން ކުރަން ބޭނުންވާ ގިނަ ޓެކްނިކަލް މަސައްކަތްތައް ކުރަން ޖެހުނީ މި ސަރުކާރުން ކަމަށާއި، އަންނަ އަހަރުގެ ބަޖެޓާ އެކީ އެކަން ކުރާނެ ކަމަށް ޒަމީރު ވިދާޅުވެފައި ވެ އެވެ.
ހަމަ މި މޭރުމުން ވާހަކަ ދައްކަވަމުން، މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި ވެސް ޒަމީރު ވިދާޅުވީ އެ ސިޔާސަތުތައް ތަންފީޒުކުރަން "ކޮމްޕްރިހެންސިވް" ޕްލޭނެއް އެބައޮތް ކަމަށާއި، ސަރުކާރުން މިހާރު ރާވާފައިވާ ގޮތަށް އެ ކަން ކުރާނެ ކަމަށެވެ.
