ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު ސަރުކާރުގެ ހަރަދުތައް އިންތިހާއަށް ބޮޑުވެ މިއަހަރަށް ފާސްކުރި 49.8 ބިލިއަން ރުފިޔާގެ ބަޖެޓުން ދެކޮޅު ނުޖެއްސުމާ ގުޅިގެން ހުށަހެޅި 5.1 ބިލިއަން ރުފިޔާގެ ސަޕްލިމެންޓަރީ ބަޖެޓުގެ ދިރާސާ ކުރާ ކޮމެޓީގެ މަސައްކަތް ނިންމަން އިތުރު ދުވަހެއް ދޭން މަޖިލީހުން މިއަދު ފާސްކޮށްފި އެވެ.
އެގޮތަށް ފާސްކުރީ މަޖިލީހަށް ހާޒިރުވެ ތިއްބެވި 80 މެންބަރުންގެ ވޯޓާއެކު އެވެ. އެ ނިންމުމާ ދެކޮޅަށް އެއްވެސް މެންބަރަކު ވޯޓެއް ނުދެއްވަ އެވެ.
ސަޕްލިމެންޓަރީ ބަޖެޓު ފާސްކުރުމުގެ މަސައްކަތް އަވަސް ކުރުމަށް ޓަކައި މިދިޔަ ބުރާސްފަތި ދުވަހު މަޖިލީހުން ފާސްކުރީ އެ ދުވަހުން ދުވަހަށް އިބްތިދާއީ ބަހުސް ނިންމައި ބަޖެޓު ދިރާސާ ކުރާ ކޮމެޓީއަށް ފޮނުވުމަށް ފަހު، އެ ކޮމެޓީގެ މަސައްކަތް ނިންމަން އެއް ދުވަސް ދޭށެވެ.
ނަމަވެސް އެ މުއްދަތު އިތުރު ކުރަން މިއަދު ފާސްކުރީ، އިއްޔެ އޮތް ބައްދަލުވުމުގައި ސަޕްލިމެންޓަރީ ބަޖެޓުގެ މަސައްކަތް ނުނިންމުމުންނެވެ.
އިއްޔެ އޮތް ބަޖެޓު ދިރާސާ ކުރާ ކޮމެޓީގެ ބައްދަލުވުގައި ވަނީ މި އަހަރަށް ލަފާކޮށް 19 ވަނަ މަޖިލީހުން ފާސްކުރި ބަޖެޓުން މިއަދާ ހަމައަށް ހަރަދުކުރި ގޮތުގެ ތަފުސީލު އެ ކޮމެޓީއަށް ވެސް ސިއްރު ކުރަން ފާސްކޮށްފަ އެވެ. މިއަދު އޮންނަ އެ ކޮމެޓީގެ ބައްދަލުވުމަށް ފިނޭންސް މިނިސްޓަރު، މޫސާ ޒަމީރު ވަޑައިގަންނަވާނެ އެވެ.
ސަޕްލިމެންޓަރީ ބަޖެޓު މަޖިލީހަށް ހުށަހަޅުއްވަމުން ޒަމީރު ވިދާޅުވީ، މި އަހަރަށް ފާސްކުރި 49 ބިލިއަން ރުފިޔާގެ ބަޖެޓުން މިދިޔަ މަހުގެ ނިޔަލަށް ހަރަދުވީ 37 ބިލިއަން ރުފިޔާ ކަމަށެވެ. ނަމަވެސް، ޖޫން 20، ގެ ފަހުން ސަރުކާރުން މާލީ ތަފާސްތައް ހާމަކޮށްފައި ނުވާތީ މި ފައިސާ ހަރަދުކުރި ގޮތެއް ސާފެއް ނުވެ އެވެ.
ނަމަވެސް، އިދިކޮޅު އެމްޑީޕީން ދަނީ މި އަހަރުގެ ބަޖެޓު އެއްކޮށް ހުސްވެފައިވާ ކަމަށެވެ. 37 ބިލިއަން ހަރަދުވި ކަމަށް ފިނޭންސުން ބުނީ އިދިކޮޅުން ބަޖެޓު ހުސްވި ކަމަށް ބުނަމުންދަނިކޮށެވެ.
