މިދިޔަ އަހަރު އޮކްޓޯބަރު މަހުން ފެށިގެން ކުރިއަށް ގެންދާ ޖެނޮސައިޑް ފުޅާކޮށް، ފަލަސްތީނުގެ ހުޅަނގުއައްސޭރީގެ އިތުރުން އީރާނު ވެސް އަމާޒަކަށް ހަދަން، ހައްދުފަހަނައަޅާފައިވާ އިޒްރޭލުގެ ޑިފެންސް މިނިސްޓަރު ޔުއާވް ގަލަންޓް ހުށަހަޅާފައިވާ ކަމަށް ބައެއް ރިޕޯޓްތައް ބުނެފި އެވެ.
އިޒްރޭލުގެ ހާރެޒް ނޫހުން ރިޕޯޓްކޮށްފައިވާ ގޮތުގައި ގަލަންޓް އެގޮތަށް ހުށަހެޅީ ބޮޑުވަޒީރު ބެންޖަމިން ނަތަންޔާހޫއަށް ފޮނުވި ސިޓީއެއްގަ އެވެ.
އިޒްރޭލުން އެތައް އަހަރެއް ވަންދެން ހިސާރުކޮށް، ކާބޯތަކެއްޗާއި ބޭސްފަރުވާއިން މަހުރޫމްކޮށްފައިވާ ގާޒާގެ ރައްްޔިތުންގެ ދިފާއުގައި ހަނގުރާމަކުރާ ހަމާސް ޖަމާއަތުން މިދިޔަ އަހަރުގެ އޮކްޓޯބަރުމަހު އިޒްރޭލަށް ވަރުގަދަ ހަމަލާއެއް ދިނެވެ. އެ އީ އުޒުރަކަށް ހަދައިގެން، މުޅި ގާޒާއަށް ބޮން އަޅައި އެ ޝަހަރު މުޅީންހެން ސުންނާފަތިކޮށް، 40،000 އަށް ވުރެ ގިނަ މީހުން މަރައިލުމަށް ފަހު މިހާރު ވަނީ ލުބުނާނު ވެސް އަމާޒަކަށް ހަދައިފަ އެވެ.
ލުބުނާނުގެ އެކި ސަރަހައްދުތަކަށް ކޮންމެ ދުވަހަކު ބޮންއެޅުމުގެ އިތުރުން ބިމުގެ ލަޝްކަރުތައް ވެސް ފޮނުވަައިގެން ކޮންމެ ދުވަހަކު މީހުން މަރަމުން އައިސް، އިޒްރޭލުން އެންމެ ފަހުން ބޮން އެޅީ އީރާނަށެވެ. އެހެން ނަމަވެސް އެއީ ބަދަލުހިފުމުގެ ގޮތުން ދިން ހަމަލާއެއް ކަމަށް ފުރަތަމަ ބުންޏެވެ.
ގާޒާގައި ހިންގަމުން ގެންދާ ޖެނޮސައިޑާ އެކު ހުޅަނގުއައްްސޭރީގައި މީހުން މެރުމާއި ގެތައް ހަލާކުކުރުމުގެ ޖަރީމާތައް ވެސް އިޒްރޭލުން ގެންދަނީ މެދުނުކެނޑި ހިންގަމުންނެވެ. އެހެން ނަމަވެސް ގަލަންޓް އެ ބުނާ "ހަނގުރާމައިގެ އަމާޒަކަށް" ހުޅަނގުއައްސޭރި ހަދައިފި ނަމަ އެ ސަރަހައްދުގައި ހިންގާ ޖަރީމާތައް އިތުރުކުރާނެ އެވެ.
