ގައުމީ ސިއްހީ އިންޝުއަރެންސް ނިޒާމު، އާސަންދަ އަށް ސަރުކާރުން ކުރާ ހަރަދުތައް ކުޑަކޮށް އެ ނިޒާމު ހަރަދުނާ ކުރުމަށް ކުރާ ރިފޯމު މަސައްކަތުގެ ދަށުން 250 ބޭހެއްގެ އަގަށް ބަދަލު ގެންނަން ނިންމާފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ހާމަކޮށްފި އެވެ.
އެ އިދާރާއިން މިއަދު ނެރުނު ނޫސްބަޔާނެއްގައި ބުނީ ބަދަލު ގެންނަން ނިންމާފައިވަނީ އާސަންދައިގެ ދަށުން އެންމެ ގިނައިން ދޫކުރާ ބޭސްތަކުގެ އަގުތަކަށް ކަމަށެވެ.
މީގެތެރެއިން 87 ބޭހެއްގެ އަގަށް ބަދަލު ގެންނަނީ ނޮވެމްބަރު މަހުން ފެށިގެންނެވެ. ބާކީ 126 ބޭހުގެ އަގަށް ބަދަލު ގެންނަނީ ނޮވެމްބަރު 24، އިން ފެށިގެންނެވެ. އެންސްޕާއިން ބުނީ އަގަށް ބަދަލު ގެންނަ ތާރީހުން ފެށިގެން އެ ބޭސްތަކުގެ ތަފުސީލުތައް އާސަންދައިގެ ވެބްސައިޓުގައި އާންމުކުރާނެ ކަމަށެވެ.
އަދި، މި ފިޔަވަޅުތަކާއެކު އަގުބޮޑުކޮށް ވިއްކަމުންދިޔަ ބޭސްތަކުގެ އަގުހެޔޮވެ އާސަންދައަށް ދައުލަތުގެ ބަޖެޓުން ކުރާ ހަރަދުގެ ތެރެއިން އަހަރެއްގެ މައްޗަށް 220 މިލިއަން ރުފިޔާ ސަލާމަތް ކުރެވޭނެ ކަމަށްވެސް އެންސްޕާގެ ބަޔާނުގައި ބުނެފައިވެ އެވެ.
ލިސްޓުގައި ހިމެނޭ 250 ބޭހުގެ ކޮންމެވެސް އެއް ބްރޭންޑެއް އަބަދުވެސް އެސްޓީއޯގެ ބޭސްފިހާރައިން ލިބޭނެ ކަމަށާއި ޕްރައިވެޓް ބޭސްފިހާރަތަކުގެ ތެރެއިން އާސަންދައިގެ ދަށުން މި ބޭސްތައް ވިއްކަން ރަޖިސްޓްރީކުރާ ތަންތަނުންވެސް މި ބޭސްތައް ލިބޭނެކަމުގެ ޔަގީންކަންވެސް އެންސްޕާއިން މިއަދު ދީފައިވެ އެވެ.
އާސަންދައިގެ ދަށުން ބޭސްނެގުމާއި އެހެން ހިދުމަތްތައް ހޯދާއިރު އަބަދުވެސް ރަސީދުތައް ރައްކާކުރުމަށްވެސް އެންސްޕާއިން ނެރުނު ބަޔާނުގައި އިލްތިމާސްކޮށްފައިވެ އެވެ.
