ވެރިކަން ކުރާ ޕީއެންސީގެ މެންބަރުން އިތުރުކުރުމަށް ކުރިއަށް ގެންދާ ހަރަކާތްތަކުގައި ދައުލަތުގެ މުދަލާއި ވަސީލަތްތައް ބޭނުންކުރަމުންދާ ކަމަށް ބުނެ އިދިކޮޅު އެމްޑީޕީން އެކަން ކުށްވެރިކޮށްފި އެވެ.
ޕީއެންސީގެ މެންބަޝިޕް ޑްރައިވްގެ ތެރެއިން އެކި މިނިސްޓްރީތަކުގެ މުވައްޒަފުން، މިނިސްޓްރީތަކުގެ ތެރޭ ޕީއެންސީގެ މެންބަޝިޕް ފޯމު ފުރާ މަންޒަރު ފެންނަ ފޮޓޯތަކެއް ސޯޝަލް މީޑިއާގައި ދަނީ ދައުރުވަމުންނެވެ. އެކަމާ ގުޅިގެން ވަޒީރުން އަދި ޕާޓީންވެސް ބަހެއް ނުބުނެ އެވެ.
އެކަމާ ގުޅިގެން އެމްޑީޕީން ނެރުނު ބަޔާނެއްގައި ބުނީ، މިކަމަކީ ރައީސް ޑރ. މުހައްމަދު މުއިއްޒުގެ އެންގެވުމުގެ މަތިން ޕާޓީން ހިންގާ ހަރަކާތްތަކެއް ކަމަށެވެ.
"މީގެކުރިން އުފެދުނު ޕީޕީއެމްގެ ސަރުކާރެކޭ އެއްގޮތަށް މިވަގުތު އޮތް ޕީއެންސީގެ ސަރުކާރުން ވެސް ޕާޓީއަށް މެމްބަރުން އިތުރު ކުރުމަށް ވަޒީފާއަށް ނުފޫޒު ފޯރުވަމުންދާ ކަމުގެ ޝަކުވާތައް މި ޕާޓީއަށް ދަނީ ލިބެމުން. އެއްވެސް މީހަކަށް ވަޒީފާގެ ބިރު ދައްކައި ޕީއެންސީއަށް ސޮއިކުރަން މަޖުބޫރު ކުރުވުމަކީ ބަލައިގަނެވޭނެ ކަމެއް ނޫން،" އެމްޑީޕީގެ ބަޔާނުގައިވެ އެޗެ.
އަދި، ޕީއެންސީގެ މަސައްކަތް ސަރުކާރުގެ އިމާރާތްތަކުގައި ރަސްމީ ގަޑީގައި ކުރަމުންދާތީ ސަރުކާރުގެ މަސަައްކަތްތަކަށް ހުރަސް އެޅޭކަމުގެ ޝަކުވާ އެ ތަންތަނުގައި މަސައްކަތްކުރާ މުވައްޒަފުން ކުރަމުންދާ ކަމަށްވެސް އެމްޑީޕީން ބުންޏެވެ.
މި މައްސަލަތައް ބަލާ ޕީއެންސީއާ ދެކޮޅަށް ގާނޫނީ ފިޔަވަޅު އެޅުމަށާއި މީގެއިތުރުން މީހުންގެ ސޮއި ފޯޖުކޮށްގެން އެ ޕާޓީއަށް ވައްދަމުންދާ ކަމަށް ފެތުރޭ ވާހަކަތައް ތަހުގީގު ކުރުމަށް އެމްޑީޕީން ވަނީ އިލެކްޝަން ކޮމިޝަން (އީސީ) އަށްވެސް ގޮވާލާފަ އެވެ.
