ފަލަސްތީނުގެ ގާޒާގައި އެންމެންގެ ލޮލުގެ ކުރިމަތީގައި އިޒްރޭލުން ހިންގަމުން ގެންދާ ޖެނޮސަައިޑް (ނަސްލުހޭދު) ގައި އެ ޝަހަރުގެ މުޅި އާބާދީ މަރުވުމުގެ ނުރައްކާ އެބަ އޮތް ކަމަށް ޔޫއެން އިން ފަލަސްތީނަށް ކަނޑައަޅާފައި ހުންނަވާ ސްޕެޝަލް ރެޕަޓުއާ ފްރެންޗެސްކާ އަލްބަނީސް ވިދާޅުވެއްޖެ އެވެ.
މިދިޔަ އަހަރުގެ އޮކްޓޯބަރު މަހު އިޒްރޭލުން ބޮން އަޅައި މުޅިން ވީރާނާކޮށްލާފައިވާ އުތުރު ގާޒާގެ ޖަބަލިޔާ ރެފިއުޖީ ކޭމްޕަށް އަނެއްކާ ވެސް މެދުނުކެނޑި ހަމަލާ ދޭތާ މިހާރު ދެ ހަފްތާ ވެއްޖެ އެވެ. މިފަހަރުގެ ހަމަލާތަކުގައި 800 އަށް ވުރެެ ގިނަ މީހުން މަރައިލިކަމަށް ރެކޯޑް ކުރެވިފައި ވާއިރު މިއަދު ދިން ހަމަލާތަކުގައި އެކަނި ވެސް 45 މީހުން މަރުވި އެވެ.
އިޒްރޭލުން ޖަބަލިޔާގައި ހިންގާ ޖަރީމާތަކާ މެދު ކަންބޮޑުވުން ފާޅުކުރައްވައި ޔޫއެން ހިއުމަނިޓޭރިއަން ޗީފް ޖޮއިސް މިސުޔާ ވިދާޅުވީ އުތުރު ގާޒާގެ މުޅި އާބާދީ މަރުވުމުގެ ނުރައްކާ އެބަ އޮތް ކަމަށެވެ. އެ ވާހަކައަށް ރައްދު ދެއްވަމުން އަލްބަނީސް ވިދާޅުވީ ގާޒާގެ މުޅި އާބާދީ މި ޖެނޮސައިޑްގައި މަރުވުމުގެ ނުރައްކާ އެބަ އޮތް ކަމަށެވެ.
"އިއުލާނުކޮށްގެން، އަހަރެމެންގެ ލޮލުގެ ކުރިމަތީގައި ހިންގާ ޖެނޮސައިޑެއްގައި ގާޒާގެ މުޅި އާބާދީ މަރުވުމުގެ ނުރައްކާ އެބަ އޮތް،" އެކްސްގައި ކުރެއްވި ޕޯސްޓެއްގައި އަލްބަނީސް ވިދާޅުވި އެވެ.
އެތައް އަހަރެއް ވަންދެން ހިސޯރުކޮށް، ކާބޯތަކެއްޗާއި ބޭސްފަރުވާއިން މަހުރޫމްކޮށްފައި ތިބި ގާޒާ ރައްޔިތުންގެ ދިފާއުގައި ހަނގުރާމަކުރާ ހަމާސް ޖަމާއަތުން މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހު އިޒްރޭލަށް ހަަމަލާތަކެއް ދި ނެވެ. އިޒްރޭލުން މިފަހަރުގެ ޖެނޮސައިޑް ފެށީ އެ ހަމަލާތައް އުޒުރަކަށް ހަދައިގެން ކަމަށް ވިޔަސް އެމީހުން މީގެ ކުރިން ވެސް ގާޒާއަށް ކެނޑި ނޭޅި ބޮން އަޅައި ބޮޑެތި އުދުވާނުތައް ހިންގި އެވެ.
މިފަހަރުގެ ޖެނޮސައިޑްގައި މަރައިލި ފަލަސްތީނު މީހުންގެ އަދަދު މިހާރު ވަނީ 42،000 އަށް ވުރެ މަތިވެފަ އެވެ. ޒަހަމްވީ މީހުމްގެ އަދަދު 100،000 އަށް ވުރެ މައްޗެވެ.
