ރައީސް ޑރ. މުހައްމަދު މުއިއްޒުގެ ގެކޮޅު، މ. ދިމްޔާތުގައި ހުންނަ ގެސްޓްހައުސް ހިންގާ ދިމްޔާތު ޕްރައިވެޓް ލިމިޓެޑުގެ ހިއްސާދާރުންނާއި ޑިރެކްޓަރުންގެ ބޯޑަށް ބަދަލުތަކެއް ގެނެސްފި އެވެ.
ދިމްޔާތު ކުންފުނީގެ މައި ހިއްސާދާރަކީ އަދި މެނޭޖިން ޑިރެކްޓަރަކީ ރައީސްގެ އަނބިކަނބަލުން ސާޖިދާ މުހައްމަދު އެވެ. މި އަހަރާ ހަމައަށް އެ ކުންފުނީގެ ހިއްސާދާރެއްގެ ގޮތުގައި ހުރީ ރައީސް އޮފީހުގެ ޗީފް އޮފް ސްޓާފް އަބްދުﷲ ފަޔާޒު އެވެ.
ނަމަވެސް، ކުންފުނިތަކުގެ ރަޖިސްޓްރީން ދައްކާ ގޮތުން ފަޔާޒް ވަނީ މިހާރު އެ ކުންފުނީގައި އޮތް އޭނާގެ ހިއްސާ ދޫކޮށްލާފަ އެވެ. އަދި ބޯޑުގައިވެސް އޭނާ ނެތެވެ.
މިކަމާ ގުޅޭގޮތުން "އަދަދު" އިން ސުވާލުކުރުމުން ފަޔާޒު ވިދާޅުވީ، އެއީ އޭނާއާ ކުންފުނީގެ ހިއްސާދާރުންނާ ދެމެދު ހިނގި މުއާމަލާތެއްކަމުން އެކަމާ ގުޅިގެން ބަހެއް ބުނަން ބޭނުން ނުވާ ކަމަށެވެ.
ފަޔާޒުގެ ބަދަލުގައި މިހާރު ދިމްޔާތު ކުންފުނީގެ ހިއްސާދާރުންގެ ގޮތުގައި އަލަށް އިތުރުވީ ރައީސް މުއިއްޒުގެ ތިން ބޭފުޅުން ކަމަށްވާ، ޔާސްމީން މުހައްމަދު މުއިއްޒު، ޒައިދު މުހައްމަދު މުއިއްޒު، އަދި އުމީރު މުހައްމަދު މުއިއްޒު އެވެ. ބޯޑުގައި ސާޖިދާގެ އިތުރުން އިންނަވަނީ ޔާސްމީން އެވެ.
ރައީސް މުއިއްޒުގެ އާއިލީ ވިޔަފާރި ކުންފުނީގެ ހިއްސާ ދޫކޮށްލި ފަޔާޒް އަކީ ފިނޭންސް މިނިސްޓަރު މޫސާ ޒަމީރުގެ ކޮށްކޮ އެވެ.
ދިމްޔާތު ގޯތީގައި އެޅި 12 ބުރީގެ އިމާރާތް ދިމްޔާތު ކުންފުންޏަށް ރައީސް މުއިއްޒު ވަނީ 20 އަހަރަށް ކުއްޔަށް ދީފަ އެވެ.
އެ އިމާރާތަށް ހަރަދުކުރި ގޮތާމެދު މިދިޔަ ރިޔާސީ އިންތިހާބުގެ ކެމްޕޭނުގައި އެތައް ސުވާލެއް އުފެދުނެވެ. އެކަމާ ގުޅިގެން، އެ އިމާރާތް ހެދުމަށް އާރުސީސީ ކުންފުންޏަށް ފުރަތަމަ ޕޭމަންޓުގެ ގޮތުގައި ދައްކާފައިވާ 13 މިލިއަން ރުފިޔާގެ ތެރެއިން ނަގުދުން ދެއްކި 11 މިލިއަން ރުފިޔާއަކީ 2002 އިން ފެށިގެން އެމަނިކުފާނު އެއްކުރައްވަމުން ގެންދެވި ފައިސާ ކަމަށް ޕީއެންސީ ކެމްޕޭނުން އޭރު ބުންޏެވެ.
ރާއްޖޭގައި ހިންގާ ބޭންކަކުން ނެގި މި ލޯނަށް އިކުއިޓީގެ ގޮތުގައި ދެއްކި އަށް މިލިއަން ރުފިޔާވެސް ރައީސް މުއިއްޒު ދެއްކެވީ ނަގުދު ފައިސާއިންކަން މި ނޫހުން އޭރު ކަށަވަރުކުރި އެވެ. އެއީ އެކު ޖުމްލަ 19 މިލިއަން ރުފިޔާ އެވެ. އެހެންކަމުން 2002 ވަނަ އަހަރުން ފެށިގެން އަހަރެއްގެ މައްޗަށް 1.2 މިލިއަން ރުފިޔާ ރައީސް މުއިއްޒު ވަނީ ނަގުދު ފައިސާގެ ރައްކާކުރައްވާފަ އެވެ.
