ދަރަނީގެ ދެމެހެއްޓިނިވަކަން ކަށަވަރުކުރުމުގައި ހުރި މައްސަލަތައް ހައްލުކުރަން ކުރާ މަސައްކަތުގައި ކުދި ޖަޒީރާ ގައުމުތަކުގެ ހާލަތަށް ރިއާޔަތްކޮށް އޮނިގަނޑަށް ބަދަލުތަކެއް ގެންނަން އެމްއެމްއޭގެ ގަވަރުނަރު އަހުމަދު މުނައްވަރު މިއަދު ގޮވާލައްވައިފި އެވެ.
އެމެރިކާގެ ވޮޝިންޓަނުގައި މިހާރު ކުރިއަށްދާ އިންޓަނޭޝަނަލް މަނިޓަރީ ފަންޑު (އައިއެމްއެފް) އަދި ވާލްޑް ބޭންކުގެ ޕްލީނަރީގެ ޗެއާގެ ހައިސިއްޔަތުން ދެއްވި ތަގުރީގުގައި މުނައްވަރު ވިދާޅުވީ، ކުރިއަރަމުން އަންނަ އިގުތިސޯދުތަކުގެ ތިން ބައި ކުޅަ ދެ ބައި ގައުމުތަކަށް ދަރަނި ދެއްކުމުގައި ހިރާސް ވަރަށް ބޮޑު ކަމަށެވެ.
މިގޮތުން ގްލޯބަލް ސޮވަރިން ޑެޓް ރައުންޑްޓޭބަލްގައި ގުޅިގެން މަސައްކަތްތަކެއް ކުރަން ބާރު އެޅި ނަމަވެސް، އިތުރު ފިޔަވަޅުތައް ބޭނުންވާ ކަމަށް މުނައްވަރު ވިދާޅުވި އެވެ. އަދި މިހާރު ކުރިއަށްދާ މަދުން އާމްދަނީ ލިބޭ ގައުމުތަކުގެ ޑެޓް ސަސްޓެއިނަބަލިޓީ ފްރޭމްވޯކް ރިވިއުގައި ގައުމުތަކުގެ ހާލަތަށް ރިއާޔަތްކުރެވިގެން ބަދަލުތަކެއް ހިމަނަން އޭނާ ގޮވާލެއްވި އެވެ.
"އައިއެމްއެފް އާއި ވާލްޑް ބޭންކާއި މަލްޓިލެޓަރަލް ޑިވެލޮޕްމަންޓް ބޭންކުތަކުން ދަރަނީގެ އުނދަގޫތައް ދިމާވެފައި ހުރި ގައުމުތަކަށް އެހީތެރިވާން މާނަވީ ފިޔަވަޅުތަކެއް އަޅަން ޖެހޭ. މަލްޓިލެޓަރަލް ޑިވެލޮޕްމަންޓު ބޭންކުތަކުން، ކްލައިމެޓް އެޑެޕްޓޭޝަނަށް ކުރާ އިންވެސްޓުމަންޓުތަކުގެ މުގާބިލުގައި ދަރަނީގެ ލުއި ދޭ ގޮތަށް، ޑެޓް-ފޯ-ކްލައިމެޓް ކަހަލަ އާލަތްތައް އުފައްދަން ޖެހޭ" މުނައްވަރު ވިދާޅުވި އެވެ.
މުނައްވަރު ދެއްވި ތަގުރީރުގައި ސީދާ ރާއްޖޭގެ ހާލަތާ ގުޅުވައި ވިދާޅުވީ، ރާއްޖެއިން ވަނީ 2028 ކުރިން މި ގައުމުގައި ބޭނުންކުރާ ކަރަންޓުގެ 33 ޕަސެންޓު އިޔާދާކުރަނިވި ހަކަތައަށް ބަދަލުކުރަން އަމާޒު ހިފާފައި ކަމަށެވެ. މި އަމާޒަށް ވާސިލުވުމުން މޫސުމީ ބަދަލަށް ވިލުންވެރި ވުމުގެ އިތުރުން، މާލިއްޔަތުންނާއި ބޭރު ފައިސާއިން ކުރަން ޖެހޭ ހަރަދުތަކުގެ ބޮޑު ބަޔެއް ސަލާމަތްކުރެވޭނެ ކަމަށެވެ.
މި އަމާާޒަށް ވާސިލުވާން 1.3 ބިލިއަން ޑޮލަރު ބޭނުންވި ނަމަވެސް، އެހީދޭ ފަރާތްތަކުން މިހާތަނަށް ލިބިފައިވަނީ އެ ފައިސާގެ އެންމެ 13 ޕަސެންޓު (169 މިލިއަން ޑޮލަރު) ކަމަށް މުނައްވަރު ފާހަގަކުރެއްވި އެވެ. އެހެންކަމުން ރާއްޖެ ފަދަ ކުދި ޖަޒީރާ ގައުމުތަކުން ކުރާ މިފަދަ އިންވެސްޓުމަންޓުތަކަށް ފަސޭހަ އަދި ހެޔޮ އަގުގައި ފައިސާ ލިބޭނެ ގޮތްތަކެއް ބައިނަލްއަގުވާމީ މާލީ އިދާރާތަކުން ހަމަޖައްސައިދޭން ވެސް އޭނާ ގޮވާލެއްވި އެވެ.
މުނައްވަރު އިތުރަށް ފާހަގަކުރެެއްވީ ސްޓްރަކްޗަރަލް އިސްލާހުތައް ގެންނަ ވާހަކަ އެވެ. އެގޮތުން ތަރައްގީ ވަމުން އަންނަ އިގުތިސާދުތަކުގެ އުފެއްދުންތެރިކަމާއި ދައުލަތުގެ ގާބިލުކަން ވަރުގަދަ ކުރަން ޖެހޭ ކަމަށް އޭނާ ވިދާޅުވި އެވެ.
އެގޮތުން އައިއެމްއެފް އާއި ވާލްޑް ބޭންކުން ވަޒިފާ އުފެއްދުމާއި، ހަމަހަމަ ފުރުސަތުތަކާއި، އިގުތިސޯދު ސިންދަފާތުކުރުމާއި ރެފިއުޖީން ގިނަ ވުމުން ކުރާ އަސަރުތަކަށް އަހައްމިއްޔަތުކަން ދޭން ޖެހޭ ކަމަށް މުނައްވަރު ވިދާޅުވި އެވެ. އަދިމިގޮތަށް ގެންނަ އިސްލާހުތައް، އިޖުތިމާއި ގޮތުން ގަބޫލުކުރެވޭ ގޮތަކަށް، އޭގެ ފައިދާތައް ފުޅާ ދާއިރާއެއްގައި ހިއްސާކުރެވޭކަން ކަށަވަރުކުރެވޭނެ އިސްލާހުތަކަކަށް ވާން ވާނެ ކަމަށް އޭނާ ވިދާޅުވި އެވެ.
.
