ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ލ. ފޮނަދޫގައި ބާއްވާ އާއިލީ ހަވީރެއް ޝަރަފުވެރިކޮށްދެއްވުމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވަޑައިގެންފި އެވެ.
އުފަން ރަށް، ފޮނަދޫއަށް އެމަނިކުފާނު ވަޑައިގެންނެވީ މިއަދެވެ. އަރިހުގައި ސަރުކާރުގެ އޮފިޝަލަކު ނުވަތަ މަޖިލީހުގެ މެންބަރަކު ވަޑައިގެންނެވިކަން ސާފެއް ނުވެ އެވެ.
ވެރިކަންކުރާ ޕީއެންސީގެ ޗެއާޕާސަންކަން ވެސް ކުރައްވާ އަބްދުއްރަހީމް އަބްދުﷲ ވަނީ 18 ވަނަ ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރުކަން ވެސް ކުރައްވާފަ އެވެ. އެމަނިކުފާނަކީ ލ. އަތޮޅުގައި ސިޔާސީ ގޮތުން އެންމެ ނުފޫޒުގަދަ އެކަކެވެ.
ފޮނަދޫ ސްކޫލު ސަރަހައްދުގައި "ފައްޓަމާ" ނަމުގައި ވެމްކޯއިން ކުރިއަށް ގެންދާ ކުޑަކުދިންގެ ހަވީރަކީ އެ ރަށުގައި އެ ކުންފުނީގެ ހިދުމަތްތައް ފެށުމަށް ބާއްވާ ހަރަކާތެއް ކަމަށް މައުލޫމާތު ލިބިފައިވެ އެވެ.
މި ހަވީރަކީ ވެމްކޯގެ އިތުރުން ފުލުހުންނާއި، ފެނަކަ، އަދި އެމްޓީސީސީގެ އިތުރުން ފުނަދޫ އަދި ލ. އަތޮޅުގެ ސަރުކާރު އޮފީސްތަކާއި އިދާރާތައް ގުޅިގެން ހިންގާ ހަވީރެއް ކަމަށް ވެމްކޯގެ ސޯޝަލް މީޑިއާގައި އާންމުކޮށްފައިވެ އެވެ.
