މާލެ އާ ޖެހިގެން އޮންނަ ކ. ފުނަދޫގައި ގާއިމުކޮށްފައިވާ ފިއުލް ފާމް ބަދަލުކުރާނެ ކަމަށް ސަރުކާރުން ފުރަތަމަ އިއުލާނުކުރި ކ. މާގިރިފަޅުގެ ބަދަލުގައި، ތެޔޮ ރައްކާކުރާ މަރުކަޒު ތިލަފުށްޓަށް ބަދަލުކުރުމުގެ މަޝްވަރާތައް ފަށައިފި އެވެ.
ފުނަދޫގައި ތެޔޮ ރައްކާ ކުރާ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) މެނޭޖިން ޑިރެކްޓަރު ޝިމާދު އިބްރާހިމް ޕަބްލިކް ސާވިސް މީޑިއާއަށް މައުލޫމާތު ދެއްވި ގޮތުގައި، އެ ރަށުގައި ހުރި ތެޔޮ ފެސިލިޓީ މާގިރިފަޅަށް ބަދަލުނުކުރެވޭނެ ކަމަށެވެ.
އަދި، މާގިރިފަޅުގެ ބަދަލުގައި ތެޔޮ ރައްކާކުރާ ފެސިލިޓީ، ތިލަފުށްޓަށް ބަދަލުކުރުމަށް މަޝްވަރާކުރަމުންދާ ކަމަށާއި އެ މަޝްރޫއު ކުރިއަށްގެންދާނެ ގޮތެއް ކަނޑައެޅުމަށް ޑެންމާކުގެ ކޮންސަލްޓެންޓެއް ނަގައިގެން މަސައްކަތް ކުރަމުންދާ ކަމަށެވެ.
ތިލަފުށްޓަށް ތެޔޮ ރައްކާކުރާ ނިޒާމު ބަދަލުކުރަން ނިންމައިފިނަމަ، ތިން މަސްދުވަހުގެ ތެރޭ އެ މަސައްކަތް ނިމޭނެ ކަމަށް ވެސް ޝިމާދު ވިދާޅުވި އެވެ.
ނަމަވެސް، އެޕްރީލް މަހު މިހާރު ނޫހަށް ދެއްވި އިންޓަވިއުއެއްގައި ޝިމާދު ވަނީ މާގިރި ފަޅަށް ތެޔޮ ރައްކާކުރާ ނިޒާމު ބަދަލުކުރުމަށް އެ ފަޅު ހިއްކުމުގެ މަސައްކަތް ކުރިއަށް އޮތް 18 މަސް ދުވަހުގެ ތެރޭ ފަށާނެ ކަމަށް ވިދާޅުވެފަ އެވެ. އަދި، މާގިރި ފަޅަކީ ތެޔޮ ރައްކާކުރުމަށް އޮތް ދަތިތަކުގެ ހައްލުގެ ގޮތުގައި ޝިމާދު އޭރު ސިފަކުރެއްވި އެވެ.
އެތައް ދަހަރެއް ވަންދެން ތެޔޮ ރައްކާކުރަމުންދިޔަ ފުނަދޫ އިން އެ ފެސިލިޓީ ބަދަލުކުރަން ސަރުކާރުން ނިންމީ، އެ ރަށަކީ ސްޕެޝަލް އިކޮނޮމިކް ޒޯނެއްގެ ގޮތުގައި ތަރައްގީކޮށް، ބައިނަލްއަގުވާމީ ފައިނޭންޝަލް ސެންޓަރެއް ފުނަދޫގައި ގާއިމުކުރުމަށެވެ.
މި މަޝްރޫއާއެކު މާލެއާއި ފުނަދޫ އަދި ވެލާނާ އިންޓަނޭޝަނަލް އެއާޕޯޓު ގުޅާލަންވެސް ސަރުކާރުން ވަނީ ނިންމާފަ އެވެ. މި ތިން ރަށް ލެ މޮނޯރެއިލްއިން ގުޅާލުމުގެ މަޝްރޫއު ކުރިއަށް ގެންދިއުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑު (އެމްއޭސީއެލް) އިން އޮކްޓޯބަރު 15، ގައި ވަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާއެކު އެމްއޯޔޫއެއްގައި ސޮއިކޮށްފަ އެވެ.
ތެޔޮ ފެސިލިޓީ ބަދަލުކުރަން ނިންމުމުގެ ކުރިން މާގިރިފަޅު އޮތީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ފަޅެއްގެ ގޮތުގަ އެވެ. ނިމިދިޔަ އެމްޑީޕީ ސަރުކާރުން އެ ކުންފުންޏަށް މާގިރިފަޅު ދިނީ، އެ ސަރުކާރުން ކުރިއަށް ގެންދިޔަ ބިންވެރިޔާ އާއި ގެދޮރުވެރިޔާ ސްކީމުގެ ދަށުން ދޫކުރާ ގޯތިތަކާއި ސޯޝަލް ހައުސިންއަށް ހާއްސަކޮށްފައިވާ ބިންތަކުން އެޗްޑީސީއަށް ލިބުނު ގެއްލުން ފޫބައްދުމަށެވެ.
