ރާއްޖެއިން ބޭރުގައި ކިޔަވާ ދިވެހި ދަރިވަރުންގެ ކާޑު ލިމިޓް 1،200 ޑޮލަރަށް ބޮޑު ކުރަން ބޭންކް އޮފް މޯލްޑިވްސް (ބީއެމްއެލް) އިން ނިންމައިފި އެވެ.
ރާއްޖެއިން ބޭރުގައި ތައުލީމް ހާސިލު ކުރަމުންދާ ދިވެހި ދަރިވަރުންގެ ކާޑު ލިމިޓް އަންނަ ނޮވެމްބަރު 1، އިން ފެށިގެން 1،200 ޑޮލަރަށް ބޮޑު ކުރަން ބޭންކް އޮފް މޯލްޑިވްސް (ބީއެމްއެލް) އިން ނިންމައިފި އެވެ.
ބީއެމްއެލްއިން ނެރުނު ނޫސް ބަޔާނެއްގައި ބުނީ އެ ނިންމުމާއެކު ރާއްޖެއިން ބޭރުގައި ކިޔަވާ ދަރިވަރުންގެ ޑެބިޓް ކާޑުން ނޮވެމްބަރު މަހުން ފެށިގެން ކޮންމެ މަހަކު 1،200 ޑޮލަރުގެ ޓްރާންސެކްޝަން ހެދޭނެ ކަމަށެވެ.
ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ ޑޮލަރުގެ ތާށިކަން ދިމާވެފައި އޮތް ދަނޑިވަޅުގައި ދަރިވަރުންނަށް ދިމާވާ ދަތިތައް ވެސް ބަލައިގަންނަ ކަމަށާއި މިގޮތުން ގެނެވުނު ބަދަލާ އެކު ދަރިވަރުންނަށް އިތުރު ފަސޭހަތަކެއް ވެގެންދާނެ ކަމަށެވެ.
ބީއެމްއެލްއިން ކުރިން ބޭރުގައި ކިޔަވާ ކުދިންނަށް ދޭ ޑޮލަރުގެ ލިމިޓަކީ 750 ޑޮލަރެވެ.
ބީއެމްއެލްއިން ބުނީ ކާޑު ލިމިޓް ބޮޑު ކުރަން ބޭނުންވާ ދަރިވަރުން އޮންލައިން ޕޯޓަލް މެދުވެރިކޮށް ރަޖިސްޓާކޮށް، ޑޮކިއުމަންޓްތައް ހުށަހަޅަން ޖެހޭނެ ކަމަށެވެ.
އޭގެއިތުރުން ޑޮލަރުގެ ހާލަތު ބެލުމަށްފަހު ކުރިއަށް އޮތް ދުވަސްތަކުގައި ގެންނަ ބަދަލުތައް އިއުލާން ކުރަމުންދާނެ ކަމަށް ބީއެމްއެލްއިން ބުންޏެވެ.
ބޭރު ގައުމެއްގައި ދިވެހިންނަށް ބީއެމްއެލްގެ ޑެބިޓް ކާޑަކުން މިހާރު މުއާމަލާތް ކުރެވެނީ މަހަކު 250 ޑޮލަރާ ހަމައަށެވެ. ކްރެޑިޓް ކާޑަކުން މުއާމަލާތް ކުރެވެނީ 750 ޑޮލަރާ ހަމައަށެވެ.
ބޭންކުތަކުން ކަނޑައަޅާފައި އޮންނަ ޑޮލަރު ލިމިޓު އުވައިލުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ. ނަމަވެސް އެ ވައުދު ފުއްދޭނީ ކޮން އިރަކު ކަމެއް މިހާތަނަށް ވިދާޅުވެފައެއް ނުވެ އެވެ.
ރާއްޖެއިން ބޭރުގައި 1،800 އަށްވުރެ ގިނަ ދަރިވަރުން އަންނަނީ މަތީ ތައުލީމް ހާސިލް ކުރަމުންނެވެ. އޭގެ ތެރޭގައި ސްޓޫޑެންޓް ލޯނުގައި 1،400 އަށްވުރެ ގިނަ ދަރިވަރުން ތައުލީމް ހާސިލް ކުރަމުން އަންނައިރު، 400 އަށްވުރެ ގިނަ ދަރިވަރުން އަންނަނީ ސްކޯލާޝިޕްތަކުގައި ކިޔަވަމުންނެވެ.
