މަސައްކަތް ކުރުވުމަށްފަހު އަމިއްލަ ކުންފުނިތަކަށް ދޭންޖެހޭ ފައިސާ ސަރުކާރުން ދޫނުކުރާތީ، ކުދި އަދި މެދުފަންތީގެ ވިޔަފާރިތަކަށް ބޮޑެތި ގެއްލުންތަކެއްވެ، ވިޔަފާރި ވެސް ހުއްޓާލަންޖެހޭ ހިސާބަށް ބައެއް ކުންފުނިތައް ގޮސްފި އެވެ.
ސަރުކާރުގެ ހަރަދުތައް ބޮޑުތަނުން އިތުރުވެ މާލީ ހާލަތު ދަށްވުމާ ގުޅިގެން ކޭޝްފްލޯއަށް ދަތިވެ ކުރިއަށް އޮތް ދެ ހަފުތާގައި ވެސް ފައިސާ ނުދެވޭނެކަން ފިނޭންސް މިނިސްޓްރީން ދަނީ ކޮންޓްރެކްޓަރުންނަށް އަންގަމުންނެވެ.
"އަދަދު" ނޫހުން އެކި ކޮންޓްރެކްޓަރުންނާ ގުޅައި އެއްކުރި މައުލޫމާތުތަކުން ކަށަވަރު ކުރެވޭ ގޮތުގައި އެ މިނިސްޓްރީގެ ކޯލް ސެންޓަރަށް ގުޅުމުން އަންގަނީ ކުރިއަށް އޮތް ދެ ހަފްތާގެ ތެރޭގައި ވެސް ފައިސާ ދޫނުކުރަން އަންގާފައިވާ ކަމަށެވެ.
"ބުނަނީ ކޭޝްފްލޯ ދަތިކަން ހުރުމުން ފައިސާއެއް ނެތޭ ދެވޭކަށް. ކުރިއަށް އޮތް ދެ ހަފްތާގައި ވެސް ނުދެވޭނެ ކަމަށް ބުނަނީ. ކުދިކުދި ޕޭމަންޓުތައް ވެސް އެބަހުރި އަޅުގަނޑުމެންނަށް ނުލިބި," ނަން ނުޖެހުމަށް ޝަރުތުކޮށް ވާހަކަ ދެއްކި ކޮންޓްރެކްޓަރަކު ބުންޏެވެ.
ސަރުކާރުން ދޭންޖެހޭ ފައިސާ ދޫނުކުރާތީ މުވައްޒަފުންނަށް މުސާރަ ނުދެވި، ލޯނުތައް ނުދެއްކި، އާ މަސައްކަތްތައް ނުނެގި، ވަރަށް ބޮޑަށް ހާލަތު ދަށްވެފައިވާ ކަމަށް މި ނޫހާ ވާހަކަ ދެއްކި ބައެއް ކުންފުނިތަކުން ބުންޏެވެ.
"ސަރުކާރުން ދޭންޖެހޭ ފައިސާއެއް އަހަރުމެންނަކަށް ނުލިބޭ. އެކަމަކު ބަރާބަރަށް ޓެކްސް ދައްކަންޖެހޭ. ޓެކްސް ނުދައްކައިފިއްޔާ ޖޫރިމަނާ ކުރާނެ ކަމަށް އެބަ އަންގާ. މިތަނުގެ މުވައްޒަފުންނަށް މުސާރަ ވެސް ނުދެވިގެން މި އުޅެނީ. ދެން ކިހިނެއް ހަދާނީ،" ސަރުކާރުން ފައިސާ ދޭންޖެހޭ އެއް ކުންފުނީގެ ވެރިޔަކު ބުންޏެވެ.
ނަމަވެސް, ފިނޭންސްގެ އޮފިޝަލަކު "އަދަދު" ނޫހާ ވާހަކަ ދައްކަވަމުން ވިދާޅުވީ ކުންފުނިތަކާއެކު އެއްބަސްވެފައިވާ ގޮތަށް ފައިސާ ދޫކުރަމުންދާ ކަމަށެވެ.
ފިނޭންސުން އެހެން ބުނި ނަމަވެސް ރާއްޖޭގައި ހިންގާ އެއްވެސް ޕްރޮޖެކްޓަކަށް ސަރުކާރުން ދޭންޖެހޭ އެއްވެސް ފައިސާއެއް އޮކްޓޯބަރުން ފެށިގެން ދޫނުކުރާކަން މި ނޫހަށް ވަނީ އެނގިފަ އެވެ.
މިފަހުން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން މި ނޫހުން ސުވާލު ކުރުމުން ފިނޭންސް މިނިސްޓަރު އެކަން ދޮގު ނުކުރައްވައި ވިދާޅުވީ ކޮންމެ އަހަރެއްގެ ވެސް އޮކްޓޯބަރާއި ނޮވެމްބަރަކީ ދައުލަތުގެ ކޭޝް ފްލޯ ދަށްކޮށް ދާ ދެ މަސް ކަމަށެވެ.
