ފޯޖްކޮށްފައިވާ ޕާސްޕޯޓާއި ފޯޖްކޮށްފައިވާ ވިސާ ބޭނުންކޮށްގެން ރާއްޖެއަށް އެތެރެވާން ގިނަ ބަޔަކު މަސައްކަތް ކުރާ ކަަމަށް ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު މިއަދު ވިދާޅުވެއްޖެ އެވެ.
ހޯމް މިނިސްޓްރީ އާއި އެ މިނިސްޓްރީގެ ދަށުން ހިންގާ އިދާރާތަކުން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޝަމްއާން ވިދާޅުވީ ފޯޖްކޮށްފައިވާ ޕާސްޕޯޓް ނުވަތަ ވިސާގައި ރާއްޖެއަށް އެތެރެވާން މަސައްކަތްކުރި 51 ބިދޭސީއަކު މިއަހަރު ހުއްޓުވާފައިވާ ކަމަށެވެ. އެއީ އޭނާ ވިދާޅުވި ގޮތުގައި ޝަހުސު އޮޅުވާލައިގެން ރާއްޖެއަށް އެތެރެވާން މަސައްކަތްކުރި ބައެކެވެ.
"މީގެ ތެރޭގައި ކައުންޓާފީޓް ޕާސްޕޯޓްތައް ނޫނިއްޔާ ޝަހުސު އޮޅުވައިލުމަށް ބޭނުންކުރާ ޑޮކިއުމެންޓްތަކާއި މީގެ އިތުރުން އޭގައި ޖަހާފައި ހުރި ބައެއް ވިޒާ ތަކަކީ ފޯޖްކޮށްފައިވާ ވިޒާތަކެއް،" އޭނާ ވިދާޅުވި އެވެ.
ފޯޖްކޮށްފައިވާ ޑޮކިއުމެންޓްތައް ބޭނުންކޮށްގެން ރާއްޖެއަށް އެތެރެވާން މަސައްކަތްކުރީ ކޮންކޮން ގައުމުތަކެއްގެ މީހުންނެއް ކަމެއް ކޮންޓްރޯލާ މިއަދު ވިދާޅެއް ނުވެ އެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދައި އެމީހުންގެ ގައުމަށް އަނބުރާ ފޮނުވައިލަން އިމިގްރޭޝަނުން އަންނަނީ ބޮޑެތި މަސައްކަތްތަކެއް ކުރަމުންނެވެ. ޝަމްއާން މިއަދު ވިދާޅުވި ގޮތުގައި އެ މަސައްކަތުން މިހައިތަަނަށް 4،000 އަށް ވުރެ ގިނަ ބިދޭސީން މިހާރު ވެސް ވަނީ ފޮނުވާލައިފަ އެވެ.
