ކުރިއަށް އޮތް ހަތަރު އަހަރަށް އެމެރިކާގެ ރައީސަކު އިންތިހާބު ކުރުމަށް ބާއްވާ އިންތިހާބަށް ބައެއް ސްޓޭޓްތަކުގައި އާލީ ވޯޓިން ފަށައިފި އެވެ.
އާލީ ވޯޓިން މިހާތަނަށް ކުރިއަށް ދިޔަ ސްޓޭޓްތަކުގެ ތެރޭގައި ޖޯޖިއާ، އެރިޒޯނާ، ޓެކްސަސް، އުތުރު ކެރޮލީނާ، އަލްބާމާ، މިސިސިޕީ، މިޝިގަން ހިމެނެ އެވެ.
އާލީ ވޯޓިންއަކީ ވޯޓުލާން ކަނޑައެޅިފައި އޮތް ދުވަހުގެ ކުރިން ވޯޓުލާން ބޭނުންވާ ފަރާތްތަކަށް ތަނަވަސް ކޮށްދީފައި އޮންނަ ފުރުސަތެކެވެ. އެ ފުރުސަތު ދީފައި އޮންނަނީ އިންތިހާބުގައި ވީހާ ވެސް ގިނަ ބަޔަކު ބައިވެރި ކުރުވުމަށެވެ.
އާލީ ވޯޓިންގައި ބޭނުންނަމަ މެއިލް މެދުވެރިކޮށް އަދި ޕޯލިން ސްޓޭޝަނަށް ގޮސްގެން ވެސް ވޯޓުލާން ފުރުސަތު ލިބޭނެ އެވެ،
ވޯޓިން ކުރިއަށް ދާނީ އޮކްޓޯބަރު 26، ގެ ނިޔަލަށެވެ. އަދި ރަސްމީކޮށް އިންތިހާބު ބޭއްވުމަށް ހަމަޖެހިފައި ވަނީ ނޮވެމްބަރު 5، ގަ އެވެ.
ހުރިހާ ވޯޓެއް ގުނުމަށްފަހު އިންތިހާބުގެ ނަތީޖާ އިއުލާން ކުރާނެ އެވެ. އަދި އާ ރައީސް ހުވާ ކުރައްވާނީ އަންނަ ޖެނުއަރީ 25، ގަ އެވެ.
މިފަހަރުގެ އިންތިހާބުގައި އެންމެ ބޮޑު ވާދަވެރިކަމެއް އެހެން ފަހަރުތަކަކޭ އެއްގޮތަށް ފެނިގެންދާނީ ޑިމޮކްރެޓްސް އަދި ރިޕަބްލިކަންގެ ފަރާތުންނެވެ. އިންތިހާބުގައި ޑިމޮކްރެޓްސްގެ ފަރާތުން އެމެރިކާގެ ނައިބުރައީސް ކަމަލާ ހެރިސް ވާދަ ކުރައްވާއިރު، ރިޕަބްލިކަންއިން ވާދަ ކުރައްވާނީ ޑޮނަލްޑް ޓްރަމްޕް އެވެ.
އިންތިހާބުގައި ޑިމޮކްރެޓްސްގެ ފަރާތުން ކުރިން ވާދަ ކުރައްވާ ގޮތަށް ހަމަޖެހިފައި އޮތީ އެމެރިކާގެ ރައީސް ޖޯ ބައިޑެން އެވެ. ނަމަވެސް ފަހުން ބައިޑެން ވަނީ ރޭހުން ފަހަތަށް ޖެހި ކަމަލާއަށް ފުރުސަތު ދޫކޮށްލާފަ އެވެ.
