ސަރުކާރުގެ މުއައްސަސާތަކާއި ކުންފުނިތައް ދޮށަށް އެއްވެ އެ ތަންތައް ޖަވާބުދާރީކޮށް ޒިންމާދާރު ކުރުވުމަށް ކުރީގެ ރައީސް އަބްދުﷲ ޔާމީނު ރައްޔިތުންނަށް ގޮވާލައްވައިފި އެވެ.
ޕީއެންއެފް އިން ރޭ ބޭއްވި ޖަލްސާއެއްގައި ވާހަކަ ދައްކަވަމުން ޔާމީނު ވިދާޅުވީ، ރައްޔިތުންނަށް ހިދުމަތް ކުރުމަށް ގާނޫނުން ބާރުދީ މަގާމުތައް ދީފައި ތިބި މުއައްސަސާތަކާއި ކުންފުނިތަކުގެ ވެރިން އެ މީހުން ކުރި ހުވަޔާ އެއްގޮތަށް ޒިންމާތައް އަދާކުުރުމަކީ ރައްޔިތުން ބާރުވެރިކުރުވަން ކުރަން ޖެހޭ ކަންކަން ކަމަށެވެ.
ރައްޔިތުން ބާރުވެރި ވަނީ ކޮންމެފަހަރަކު މަގުމައްޗަށް ނުކުންނަން ޖެހޭ ހިސާބުން ނޫން ކަމަށާއި އެހެން ނަމަވެސް މުއައްސަސާތައް ހަމަމަގަށް އެޅުވުމަށް ރައްޔިތުން ނުކުންނަން ޖެހޭ ކަަމަށްވެސް، މިހާރު ވެރިކަންކުރާ ޕީއެންސީ ކޯލިޝަނުގެ ކުރީގެ ލީޑަރު ވިދާޅުވި އެވެ.
"އެކަމަކު ރައްޔިތުންގެ ބާރުގެ ތެރޭގަ ހިމެނޭ އެންޓި ކޮރަޕްޝަން ކޮމިޝަނަށް މިހާރު ހުށަހެޅިފަ ހުރި މައްސަލަތައް ނުބަލާ ހުރީ ކީއްވެތޯ ބަލަން ރައްޔިތުން އެތަނަށް އެއްވުން. ސްޓެލްކޯ އިން ކަރަންޓު ބިލުން ރައްޔިތުން ފެލައިލާތީ އެތަނަށް އެއްވާން ޖެހޭ ރައްޔިތުންގެ ބާރުން،" އެމަނިކުފާނު ވިދާޅުވި އެވެ.
ސްޓެލްކޯގެ އިތުރުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަދި ފެނަކައިންވެސް ރައްޔިތުންނަށް ހިދުމަތް ދިނުމުގައި އިހުމާލުވެ ކޮރަޕްޝަންގެ އަމަލުތައް ހިންގަމުންދާ ކަމަށް ޔާމީނު ރޭ ތުހުމަތުކުރެއްވި އެވެ.
"މުއައްސަސާތަކެއް ނުހިނގަ. އެއްވެސް މުއައްސަސާއެއް ހިނގަނީއެއް ނޫން. އެއްވެސް މުއައްސަސާއެއް ހިނގަނީއެއް ނޫން. ކޮންމެ މީހަކުވެސް ބުނަނީ ތިމަންނަގެ ވަޒީފާ ގެއްލިދާނެތީއޭ. އެކަމަކަށް ނޫނެ އެމީހުން މަގާމުތަކަށް އައްޔަންކޮށްފަ ތިބީކީ. މަގާމުގެ މަސްއޫލިއްޔަތު ހަވާލުކުރަނީ މަގާމުގެ ޒިންމާ އަދާކުރުމަށްޓަކައި."
ޔާމީނު ވިދާޅުވީ މިފަދައިން ކަންކަން ހިނގަމުންދާއިރު ސިޔާސީން މިއީ ޅަފަތުގަ އޮތް ޑިމޮކްރަސީއެއް ކަމަށް ބުނު އުޒުރުދައްކާ ކަމަށެވެ. ނަމަވެސް ޅަފަތުގައި އޮތީ ޑިމޮކްރަސީ ނޫން ކަމަށާއި ޅަފަތުގައި އޮތީ އިންސާނާގެ ސިކުނޑި ކަމަށްވެސް އެމަނިކުފާނު ވިދާޅުވި އެވެ.
އަދި، ނޫސްތަކަށް އަރާ ކޮރަޕްޝަންގެ މައްސަލަތައް ބެލުމަށް ޕީޖީ ފަދަ މާގަމުތަކުގައި ތިބި މީހުން ފުލުހުންނަށާއި އޭސީސީއަށް ހުށަހަޅާ އެކަންކަން ތަހުގީގުކުރަން ޖެހޭނެ ކަމަށްވެސް އެމަނިކުފާނު ރޭ ވިދާޅުވި އެވެ.
