އިޒްރޭލު ޕާސްޕޯޓު މަނާ ކުރުމުގެ މަސައްކަތް ދިގުލައިގެން ގޮސް އަހަރު ދުވަސް ވާން ކައިރިވީއިރު، ރާއްޖޭގައި ތިބި ދީނީ އިލްމުވެރިންގެ ފަރާތުން ވެސް މިހާރު އިވެނީ އެކަން ކޮށްފި ނަމަ ވާނެ ގެއްލުމުގެ ވާހަކަ ކަމަށް ކުރީގެ ރައީސް ޔާމީން ވިދާޅުވެއްޖެ އެވެ.
ޕީއެންއެފްގެ އޮފީހުގައި ރޭ ބޭއްވި ޖަލްސާގައި ވާހަކަ ދައްކަވަމުން ޔާމީން ވިދާޅުވީ އިޒްރޭލު ޕާސްޕޯޓު މަނާ ކުރުމަކީ ޓޫރިޒަމަށް ގެއްލުންވެދާނެތީ ނުކޮށް ތިބޭވަރު ކަމެއް ނޫން ކަމަށާއި އެ ގައުމުން ރާއްޖެއަށް އަންނަނީ މަދު ފަތުރުވެރިންތަކެއް ކަމަށެވެ.
ޕާސްޕޯޓު މަނާ ކުރަން ބުނިތާ އަހަރު ވާން ކައިރިވެފައިވާއިރު، އެކަމުގައި މިހާރު އެކި ފަރާތްތަކުން ދައްކަވާ ވާހަކަ ބަދަލުވެފައިވާ ކަމަށް ޔާމީން ވިދާޅުވި އެވެ.
"ދެން އަޅުގަނޑުމެންގެ ދީނީ އިލްމުވެރިން ވެސް މީގައި ނުވާނެހައި ހުއްޖަތެއް އެބަ ދައްކާ، އެކަމަކު އޭގެ ކުރިން މިއީ ކުރަންޖެހޭ ކަމެއް ކަމަށް، ނައޫޒުބިﷲ އިނގޭތޯ އެމީހުން މިތަނަށް އަންނާތީ، އަޔަދޭތީ ނައޫޒުބިﷲ މިހާރު އައޫޒުބިﷲ އިނގޭތޯ؟ މިހާލެއްގައ މިދަނީ މިއީ ކޮން ހިޕޮކްރިސީއެއްހެއްޔޭ؟" ޔާމީން ސުވާލު އުފެއްދެވި އެވެ.
ގާނޫނަށް ގެންނަޖެހޭ ބަދަލުތައް ގެނެެސްގެން އިޒްރޭލު ޕާސްޕޯޓު މަނާ ކުރަން ކެބިނެޓުން ނިންމީ ޖޫން 2024، ގަ އެވެ. އޭގެ ތިން ދުވަސް ކުރިން އެގޮތަށް ގާނޫނު އިސްލާހުކުރުމަށް އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މެމްބަރު މީކާއިލް ނަސީމް އޮތީ މަޖިލީހަށް ބިލެއް ހުށަހަޅައިފަ އެވެ.
އިޒްރޭލު ޕާސްޕޯޓު މަނާކުރަން ކެބިނެޓުން ނިންމިތާ 10 ދުވަސް ފަހުން ބަންޑާރަ ނައިބު، އުޝާމް ވަނީ އިޒްރޭލު ޕާސްޕޯޓު އޮންނަ އެއްވެސް މީހަކަށް ރާއްޖެއަށް ދަތުރު ނުކުރެވޭ ގޮތަށް "ބްލޭންކެޓްކޮށް" ޕާސްޕޯޓް މަނާކުރުމަކީ ވިސްނައިލަން ޖެހޭ ކަމެއް ކަމަށް ވިދާޅުވެފަ އެވެ. އެކަމާ ގުޅިގެން ގިނަ ބަޔަކު ސަރުކާރާއި އުޝާމަށް ފާޑުކިޔެވެ.
އިޒްރޭލު ޕާސްޕޯޓު މަނާ ކުރުމުގެ މަސައްކަތް ލަސްވެގެންދާ ސަބަބާ ގުޅޭގޮތުން ސެޕްޓެމްބަރު 10، ގައި ސަރުކާރުގެ ތަރުޖަމާނު، ހީނާ ވަލީދު ވިދާޅުވީ އެކަން ނުކުރެވި އޮތީ މަޖިލިސް ޗުއްޓީގައި އޮތުމުން ކަމަށެވެ. ނަމަވެސް މަޖިލީހުން ޗުއްޓީއަށް ދިޔައީ ވަޒީރުންގެ މަޖިލީހުގެ ނިންމުމަށް 88 ދުވަސް ފަހުން އޮގަސްޓު 22، ގަ އެވެ.
ރޭގެ ޖަލްސާގައި ވާހަކަ ދައްކަވަމުން ޔާމީން ވިދާޅުވީ އިޒްރޭލު ޕާސްޕޯޓު މަނާ ކުރުމުގެ މަސައްކަތް މިހައި ދިގުލައިގެން ދިޔައިރު، އަދިވެސް އެކަން ކުރަން ސަރުކާރުން ނޫޅޭ ކަމަށެވެ.
"[މަޖިލީހަށް] ފޮނުވާލައިފައި އެ އޮންނަނީ މަޖިލީހުގައި، އެކަމެއް ނިންމާކަށް ނޫޅޭ، ދެން ހަމަ، ދިދަޔާ ދިމާލަށް ބަލާފައި ފަލަސްތީނުގެ ކެފިޔާ އަޅާފައި، ފަލަސްތީނު މީހުން ރޯތީވެ، އެއަށްވުރެ ބޮޑަށް ރޮއެފައި އުޅުން، މިއަކުންނެއް އެމީހުންގެ ހިތުގެ ޝުއޫރެއް އަޅުގަނޑުމެންނަކަށް ނުފެނޭ އިނގޭތޯ؟" ޔާމީން ވިދާޅުވި އެވެ.
އިދިކޮޅުން ތުހުމަތުކުރާ ގޮތުގައި މި ނިންމުން ލަސްވަނީ ރައީސް މުއިއްޒުގެ ސަރުކާރަށް ހުޅަނގުގެ ބާރުތަކުން ކުރިމަތިކުރަމުންދާ ޕްރެޝަރުތަކުގެ ސަބަބުންނެވެ. އެގޮތުން މި ސަރުކާރުން އިޒްރޭލުގެ ގަތުލުއާންމަށް އެންމެ ބޮޑަށް ތާއީދުކޮށް އެހީވާ އެމެރިކާއާއެކު ބާއްވަމުންދާ ގާތް ގުޅުން އެ ފަރާތްތަކުން ފާހަގަކުރެ އެވެ.
