ރައީސް ޑރ. މުހައްމަދު މުއިއްޒު އިންޑިއާއަށް ކުރެއްވި ފުރަމާނަ ދަތުރުގައި އެ ގައުމާއެކު އެއްބަސްވި ކަންކަން ހިމެނޭ ރާއްޖެ-އިންޑިއާ "ވިޝަން ޑޮކިއުމަންޓު" އާ ގުޅޭގޮތުން ހަބަރުތައް ގެނެސްދިން ނޫސްވެރިން ދޮގު ހަދާފައިވާ ކަމަށް އެމަނިކުފާނު ވިދާޅުވެއްޖެ އެވެ.
ވިޝަން ޑޮކިއުމެންޓު އެކުލަވާލައި ޝާއިއުކުރީ ހޯމަ ދުވަހު އެވެ. އެ ޑޮކިއުމެންޓުގެ އިނގިރޭސި ތަރުޖަމާ ރައީސް އޮފީހުގައި ޝާއިއުކުރުމާއެކު މި ނޫހުން ވާނީ އިންޑިއާއާއެކު އެއްބަސްވި ސަލާމަތީ، ސިއްހީ، ތައުލީމީ، އަދި ތަރައްގީއާ ގުޅޭ މުހިންމު ކަންކަން ގެނެސްދީފަ އެވެ.
އޭގެތެރޭގައި އިންޑިއާއާއެކު އަސްކަރީ ގުޅުން ބަދަހިކުރުމަށް އެއްބަސްވީ ކަންކަންވެސް ހިމެނެ އެވެ. އެއާއެކު އިދިކޮޅާ ރައްޔިތުންވެސް ވަނީ ސަރުކާރަށާއި ރައީސް މުއިއްޒުއަށް ފާޑުކިޔުން އަމާޒުކޮށްފަ އެވެ.
އެކަމާ ގުޅިގެން ރައްދު ދެއްވަމުން ރައީސް ރޭ ވިދާޅުވީ، ނިމިދިޔަ އެމްޑީޕީ ސަރުކާރުގައި އިންޑިއާއާއެކު ގުޅުން އޮތް ގޮތަށް އެނބުރި މި ސަރުކާރުން ދާނެ ކަމަށް ވިސްނައިދޭން ބަޔަކު މަސައްކަތް ކުރަމުންދާ ކަމަށެވެ. ނަމަވެސް އެމަނިކުފާނަށް އެންމެ މުހިންމީ ރާއްޖޭގެ މިނިވަންކަން ކަމަށްވެސް ވިދާޅުވި އެވެ.
"ބައެއް ނޫސްތަކުގެ އަޅުގަނޑުމެންގެ އަޅުގަނޑުމެންގެ ގައުމާ ބެހޭގޮތުން. މި ހާރިޖީ ސިޔާސަތަށް ފާޑުކިޔުމަށް ހަގީގަތަށް ހިލާފަށް. ބައެއް ނޫސްތަކެއް ނޫން އެންމެ ނޫހެއް ދެ ނޫހެއްގަ ފެނުނީ، ގިނަ ނޫސްވެރިން. ޖާނަލިޒަމްގެ ދާއިރާގެ އުޅުއްވާ ބޭފުޅުން ވަރަށް ޒިންމާދާރު," ރައީސް ވިދާޅުވި އެވެ.
ގިނަ ނޫސްވެރިން ހުރިހާ ކަމެއްގައިވެސް ޒިންމާދާރު ކަމަށާއި އެކަމަށް "ތެދު ހަދާ" ނޫސްވެރިންނަށް ރައީސް ރޭ ޝުކުރު އަދާކުރެއްވި އެވެ.
"އަޅުގަނޑުމެންގެ ގައުމުގައި އެހެން ގައުމެއް ސިފައިން ވަޒަންވެރިވާނޭ، އަޅުގަނޑުމެންގެ ކަންކަން ކުރުމުގައި އެހެން ގަައުމެއްގެ އަތްމައްޗަށް ކަންތައްތައް ދޫކޮށްލާނޭ. ނޫން. އަޅުގަނޑުމެން މި ދަތުރުގައި އިއުލާނުކުރި ދެ ގައުމުގެ ގުޅުމުގެ ތެރެއިން ނިންމައިގެން އިއުލާނުކުރި ވިޝަން ފޯ ކޮމްޕްރިހެންސިވް ޕާޓްނާޝިޕް އޮން އިކޮނޮމިކް އެންޑް މެރިޓައިމް ސެކިއުރިޓީއަކީ ލިޔެވިފައި އޮތް އެއްޗެއް،" ނޫސްވެރިން ހަވާލާދިން ލިޔުމާ ގުޅުވާ ރައީސް ރޭ ވިދާޅުވި އެވެ.
ރައީސް ރޭ ވާހަކަ ދައްކަވަމުން އިންޑިއާއަކީ ރާއްޖެއާ އެންމެ ގާތް ގަދީމީ ގުޅުމެއް އޮތް ގައުމެއް ކަމަށާއި ރާއްޖޭގެ އެންމެ ގާތް މިތުރުގެ ގޮތުގައި ސިފަކުރައްވާފަ އެވެ. އަދި ކެމްޕޭނުގަ އަދި ވެރިކަމުގެ ކުރީކޮޅު އެ ގައުމާ ދެކޮޅަށް ގެންގުޅުއްވި ބަސްމަގު އެކީހެން ވަނީ ބަދަލުކުރައްވާފަ އެވެ.
ވިޝަން ޑޮކިއުމެންޓުގައި އެއްބަސްވި ކަންކަމާ ގުޅޭގޮތުން ނޫސްވެރިން ދޮގުހެދި ކަމަށް ރައީސް ވިދާޅުވުމާއެކު މި ނޫހުން ވާނީ އެ ޑޮކިއުމެންޓުގެ ފުރިހަމަ ދިވެހި ތަރުޖަމާއެއްވެސް އާންމުކޮށްފަ އެވެ.
