ކުރިން ދެއްކެވީ އިންޑިއާގެ ސަބަބުން ރާއްޖޭގެ މިނިވަންކަމާއި އިސްތިގުލާލު ގެއްލިދާނެ ކަމުގެ ބިރުގެ ވާހަކަ އެވެ. އިންޑިއާ އަސްކަރިއްޔާ ރާއްޖޭގައި ގާއިމުވެފައި އޮތް އޮތުމާއި ހަނިމާދޫ އެއާޕޯޓާއި އުތުރު ތިލަފަޅާއި އައްޑޫގައި އިންޑިއާ ކޮންސިއުލޭޓެއް ހެދުމުގެ ނުރައްކާ ބޮޑު ވާހަކަ އެވެ.
އިންޑިއާގެ ބޮޑުވަޒީރު ނަރެންދުރަ މޯދީއަށް މަލާމާތް ކުރި އެވެ. އިންޑިއާ އަށް ކުޑައިމީސްކޮށް، ރައީސް މުއިއްޒު އާއި އެ މަނިކުފާނުގެ ސަރުކާރުގެ ވެރިންވެސް ވާހަކަ ދެއްކެވި އެވެ.
މިހާރު އިންޑިއާ އަށް ކުރައްވަމުން ގެންދަވާ ދަތުރުގައި ރައީސް މުއިއްޒު އުނބަށް ޖައްސަވައި، ގިނަ ކަންތައްތަކަށް ވަނީ އެއްބަސްވެވަޑައިގެންފަ އެވެ. ދެ ގައުމުގެ މަޝްވަރާތަކަށް ފަހު ނެރެފައިވާ ޖޮއިންޓް ޕްރެސް ރިލީޒްގައި ހިމެނޭ ބައެއް ކަންކަން ހިމަނައިލާނަމެވެ.
- ހދ އަތޮޅުގައި ފަތުރުވެރިކަމުގެ އިންވެސްޓްމަންޓްތައް ގާއިމުކުރުމާއި، "އެގްރިކަލްޗާ އިކޮނޮމިކް ޒޯން" ގާއިމުކުރުމާއި، އިންޑިއާގެ އެހީގައި ހއ. އަތޮޅުގައި މަސް ޕްރޮސެސްކުރުމާއި ކޭނިން ފެސިލިޓީ ގާއިމުކުރުމަށް ގުޅިގެން މަސައްކަތްކުރުން
- އިންޑިއާގެ ފާމަކޮޕިއާގެ އަގު ވަޒަންކުރުމަށް ދިވެހި ސަރުކާރުން މަސައްކަތްކުރުމާއި، އިންޑިއާއިން އަގު ހެޔޮ، ފެންވަރު ރަނގަޅު ޖެނެރިކް ބޭސް ތައް ފޯރުކޮށްދީ، ރާއްޖޭގެ ސިއްހީ ރައްކާތެރިކަމަށް ކުރާ މަސައްކަތްތަކަށް އެހީތެރިވުމުގެ ގޮތުން، ރާއްޖޭގެ އެކި ކަންކޮޅުތަކުގައި އިންޑިއާ-މޯލްޑިވްސް ޖަން އޯޝަދީ ސެންޓަރުތައް ޤާއިމުކުރުން.
- އިންޑިއާގެ ފާމަކޮޕިއާ ދިވެހި ސަރުކާރުން ބަލައިގަތުމަށްފަހު، ރާއްޖޭގައި ގާއުމު ކުރެވޭ އިންޑިއާ-މޯލްޑިވްސް ޖަން އޯޝަދީ ސެންޓަރުތައް މެދުވެރިކޮށް ފެންވަރު ރަނގަޅު ބޭސް ހެޔޮ އަގެއްގައި ރާއްޖޭގެ ހުރިހާ ކަންކޮޅަކަށް ފޯރުކޮށްދިނުން.
- އިމާޖެންސީ މެޑިކަލް އިވެކުއޭޝަންތައް ހެދުމަށްޓަކައި ރާއްޖޭގެ ކެޕޭސިޓީ އިތުރުކުރުމަށް ގުޅިގެން މަސައްކަތްކުރުން.
- ރާއްޖޭން އިސްކަންދޭ ގޮތުގެ މަތިން، ކަނޑުމަތީގެ އަދި ސަލާމަތީ ކަންކަން ކުރިއެރުވުމުގައި، ސިފައިންނާއި، ދިވެހި ސަރުކާރުގެ ގާބިލުކަން އިތުރުކުރުމަށް، ދިފާއީ ޕްލެޓްފޯމްތައް (އަސްކަރީ އުޅަނދުތައް) އަދި އެސެޓްތައް ރާއްޖެއަށް ފޯރުކޮށްދިނުމަށް
- ރާޑަރު ސިސްޓަމްތަކާއި އެހެނިހެން އާލާތްތައް ފޯރުކޮށްދީ އެމްއެންޑީއެފްގެ ސަވައިލަންސް އަދި މޮނިޓަރިންގެ ގާބިލުކަން އިތުރުކުރުން
- ހައިޑްރޯގްރެފިކް ކަންކަމުގައި، ދިވެހި ސަރުކާރުން ބޭނުންވާ ގޮތުގެމަތިން، ކެޕޭސިޓީ ބިލްޑިން އާއި ތަމްރީނުގެ ޒަރިއްޔާއިން ރާއްޖެއަށް އެހީތެރިކަން ފޯރުކޮށްދިނުން
އިތުރު ގިނަ ކަންތައްތަކަށް ވެސް ދެ ގައުމުން އެއްބަސްވި އެވެ.
އިންޑިއާ އައުޓު ކެމްޕޭނުން ވެރިކަން ހޯއްދެވި ރައީސް މުއިއްޒު ރާގު ބަދަލުކޮށް، އަދި އިންޑިއާ ގުޅުން ބަދަހިކޮށް، ތައުރީފު އޮއްސަމުން ގެންދަނީ، ސަރުކާރުގެ ހަރަދު ބޮޑުވުމާއި މާލިއްޔާ މެނޭޖުކުރަން ނޭނގުމުގެ ސަބަބުން ޑޮލަރުގެ ތާށިކަން ބޮޑުވެ، ރާއްޖެ ދަރާނެ ކަމުގެ ބިރު ބޮޑުވެފައި ވަނިކޮށެވެ.
އިންޑިއާ އިން ވަނީ ރާއްޖެއަށް 400 މިލިއަން ޑޮލަރާއި 30 ބިލިއަން ރުޕީސްގެ ކަރަންސީ ސްވަޕެއްގެ ދީފަ އެވެ.
މިހާތަނަށް އިންޑިއާއިން ފިޔަވައި ރައީސް މުއިއްޒުގެ ސަރުކާރަށް މާލީ ލުޔެއް ދީފައެއް ނުވެ އެވެ.
