ކެލިފޯނިއާ، ޔުނައިޓެޑް ސްޓޭޓްސް (އޮކްޓޫބަރު 8) - ޕްރީ ސީޒަަން މެޗެއްގައި ފީނިކްސް ސަންސްއާ ދެކޮޅަށް ކުޅުނު މެޗެއްގައި، ލޮސް އެންޖެލްސް ލޭކާސް (އެލްއޭ ލޭކާސް) އަށް ކުޅޭ ބާސްކެޓްބޯޅަ ލެޖެންޑް، ލެބްރަން ޖޭމްސް އާއި އޭނާގެ ދަރިފުޅު، ބްރޯނީ ޖޭމްސް އެކުގައި ފުރަތަަމަ ފަހަރަށް ރަސްމީ މެޗެއްގައި ކުޅެފި އެވެ.
މީގެ ކުރިން ބައްޕަ އާއި ދަރިފުޅު، އެންބީއޭ ލެވަލްގެ އެއްވެސް މެެޗެއްގައި އެކުގައި ކުޅެފައި ނުވެ އެވެ. އެހެންކަމުން، ޖޭމްސް ދެބަފައިންނަށް މި ހާސިލްކުރެވުނީ ތާރީހީ ކަމެކެވެ.
ލެބްރަން ޖޭމްސް، 39 އާއި ބްރޯނީ ޖޭމްސް، އެކުގައި ފުރަތަމަ ފަހަރަށް މެޗެއްގައި މި ގޮތަށް ކުޅުނުއިރު، މި މެޗު ކުޅެފައިވަނީ ބްރޯނީ ޖޭމްސްގެ 20 ވަނަ އުފަން ދުވަހުގަ އެވެ. ލޭކާސް އަތުން 118-114 އިން ސަންސް މޮޅުވި މެޗުގައި، ބްރޯނީ ކުޅެން އެރީ ދެ ވަނަ ކުއާޓަރުގަ އެވެ.
"މިއީ އަހަރެން ހީވެސް ނުކުރާ ކަމެއް. ޓައިމްއައުޓަށް ފަހު ކުޅެން އަރައި، އޭނަ (ބްރޯނީ) ހުރީ އަހަރެން ގާުތުގައި. އަހަރެން އެ ހިސާބުން ހުރެވުނީ ހުއްޓިފައި، މިއީ އަސްލަށް ވެސް ހިނގާ ކަމެއްގެ ގޮތުގައި ސުވާލު އުފެދިފަައި،" އެ މެޗުގައި، 19 ޕޮއިންޓް ސްކޯކުރި، ލެބްރަން ޖޭމްސް ބުންޏެވެ.
ބްރޯނީ، ލޭކާސް ޓީމަށް ނެގީ، ދެ ވަނަ ރައުންޑްގެ ކުރިން ޑްރާފްޓުންނެވެ. އޭރު އޭނާ އައީ، ޔުނިވާސިޓީ އޮފް ސަދާން ކެލިފޯނިއާ ޓީމަށް ވެސް ކުޅެމުންނެވެ. ބްރޯނީ ގެނައުމާ އެކު، ލެބްރަން ޖޭމްސް ވަނީ ލޭކާސްއާ އެކު، ދެ އަހަރުގެ ކޮންޓްރެކްޓެއްގައި ސޮއިކޮށްފަ އެވެ.
ލެބްރަން ޖޭމްސް އަކީ އެންބީއޭގެ އެންމެ ގިނަ ޕޮއިންޓް ސްކޯކުރުމުގެ ރެކޯޑް ހޯލްޑަރެވެ. އޭނާ ވަނީ ހަތަރު ފަހަރު އެންބީއޭ ކާމިޔާބުކޮށްފަ އެވެ. ކުރިއަށް އޮތީ، އެންބީއޭގައި ލެބްރަން ޖޭމްސް ފެންނާނެ 22 ވަނަ ސީޒަނެވެ.
މި މަހު 22 ވަނަ ދުވަހު އެންބީއޭގެ އާ ސީޒަން ފަށާއިރު، ފުރަތަމަ މެޗުގައި، ލޭކާސް އިން ކުޅޭނީ މިނެސޯޓާ ޓިމްބަވޫލްވްސްއާ ދެކޮޅަށެވެ.
