މެންޗެސްޓާ (އޮކްޓޫބަރު 5) - މެންޗެސްޓާ ސިޓީ އަށް އަންނަ ސީޒަނުގެ އިނގިރޭސި ޕްރިމިއާ ލީގު ފެށުން ފަސްކޮށްދޭން ޖެހޭ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ގާޑިއޯލާ، މި ގޮތަށް ބުނެފައިވަނީ، އަންނަ ޖޫން/ޖުލައި މަހު ފީފާ ކްލަބް ވޯލްޑް ކަޕްގައި ސިޓީން ކުޅުމަށް ފަހު، އިނގިރޭސި ޕްރިމިއާ ލީގުގެ އާ ސީޒަން ފެށުމާ ދެމެދުގައި، ތިން ހަފްތާގެ ބްރޭކެއް ނުލިބޭނެތީ އެވެ. ގާޑިއޯލާ ބުނީ، ޕްރިމިއާ ލީގުގެ އާ ސީޒަންގެ ފުރަތަމަ ދެ މެޗު ފަސްކޮށްދޭން ސިޓީން ހުށަހެޅި ޕްރޮޕޯސަލަށް، އެކަށީގެންވާ ޖަވާބެއް ލިބޭނެ ކަމުގެ ޔަގީންކަމެއް ނެތް ކަމަށެވެ.
"ޕްރިމިއާ ލީގުން އަހަރެމެންނަށް ހުއްދައެއް ދޭނެ ކަމަށް ނުބެލެވޭ ފުރަތަމަ ދެ މެޗު ފަސްކުރާކަށެއް. އެއީ، އެކަމަކު އަހަރެމެންގެ ރިކަވަރީ އަށްޓަކައި ވިޔަސް އަންނަން ޖެހޭ ކަމެއް، ވަރަށް ބޮޑަށް ޝުކުރިއްޔާ،" ގާޑިއޯލާ ބުންޏެވެ.
"އަހަންނަށް ހީވަނީ ކްލަބުން އެދުނީ އާ ސީޒަން ފެށުން ދެ ހަފްތާއެއް ނޫނީ ތިން ހަފްތާއެއް ފަސްކޮށްލަން. އެއީ ކުޅުންތެރިންނަށް ޗުއްޓީއެއް ދޭން ބޭނުންވާ ވަގުތެއް. އެކަމަކު، އެކަން އެ ގޮތަށް ދާނެހެން ހީއެއްނުވޭ. ޕްރިމިއާ ލީގުން މި ކަމަށް ރުހޭނެ ކަމަށް ނުބެލެވޭ،"
ޕްރިމިއާ ލީގުން އަންނަ ސީޒަން ފަށާނެ ތާރީހެއް އަދި ހާމަކޮށްފައެއް ނުވެ އެވެ. އެކަމަކު، ބެލެވޭ ގޮތުގައި އޮގަސްޓް 9-16 އާ ދެމެދު ތާރީހެއްގައި ޕްރިމިއާ ލީގުގެ އާ ސީޒަން ފަށާނެ އެވެ. މާނަ އަކީ، ޖުލައި 12 ވަނަ ދުވަހު ނިމޭ ފީފާ ކްލަބް ވޯލްޑް ކަޕާއި ޔޫރަޕްގެ ފުޓްބޯޅަ ސީޒަން ފެށުމާ ދެމެދު އޮންނާނީ، ގާތްގަނޑަކަށް މަހެއްހާ ދުވަހެވެ.
